ءماجىلىستىڭ ماڭىزى جايلى تۇسىندىرگەن ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان بارلىق مادەني-سپورتتىق شارالار ەلباسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى» اتتى ماقالالارىندا ايتىلعان باعدارلامالىق يدەيالاردى ىسكە اسىرۋ ماقساتىندا جاسالىپ جاتقانىن اتاپ ءوتتى.
ودان كەيىن اتالعان قاۋىمداستىقتىڭ اتقارۋشى ديرەكتورى نۇرسۇلتان يبراگيموۆ القالى جيىنعا قاتىسۋشىلارعا بيىل اتقارىلعان جۇمىستار جايلى ەسەپ بەردى. ونىڭ ايتۋىنشا, كوكپاردان 2 حالىقارالىق, 4 رەسپۋبليكالىق جارىس, 2 رەسپۋبليكالىق تۋرنير; اۋدارىسپاقتان 1 حالىقارالىق, 5 رەسپۋبليكالىق جارىس, 2 رەسپۋبليكالىق تۋرنير; تەڭگە ىلۋدەن 1 حالىقارالىق, 4 رەسپۋبليكالىق جارىس, 1 رەسپۋبليكالىق تۋرنير; جامبى اتۋدان 6 حالىقارالىق, 4 رەسپۋبليكالىق جارىس, 1 رەسپۋبليكالىق تۋرنير; بايگە تۇرلەرىنەن 1 رەسپۋبليكالىق جارىس, 2 رەسپۋبليكالىق تۋرنير; قۇسبەگىلىكتەن 1 حالىقارالىق, 3 رەسپۋبليكالىق جارىس, 1 رەسپۋبليكالىق تۋرنير وتكىزىلىپتى. ياعني, سپورتشىلارىمىز وسى جىلى 13 حالىقارالىق, 22 رەسپۋبليكالىق جارىس پەن 9 رەسپۋبليكالىق تۋرنيرگە قاتىسىپتى.
سونىمەن قاتار بيىلعى 19-22 ءساۋىر ارالىعىندا الماتى قالاسىندا دۇنيەجۇزىلىك ەتنوسپورت كونفەدەراتسياسىنىڭ ءىى حالىقارالىق قۇرىلتايى ءوتىپ, وعان الەمنىڭ 40-تان استام ەلىنەن 150-گە جۋىق وكىل كەلىپ قاتىسسا, 30 مامىر مەن 2 ماۋسىم ارالىعىندا نۇر-سۇلتان قالاسى اكىمدىگىمەن بىرلەسىپ ۇيىمداستىرعان «Nur-Sultan Ethno Fest» مەرەكەسى ەلوردا تۇرعىندارى تاراپىنان كەڭ كولەمدە قولداۋ تاپقان ەكەن.
سول سياقتى بيىل جالپى جۇلدە قورى 54 ميلليون تەڭگەنى قۇرايتىن اتىراۋ وبلىسى ماحامبەت اۋدانى تالدىكول اۋىلىندا وتكەن «دارابوز-2019» حالىقارالىق ءتۋرنيرى; الماتى وبلىسى رايىمبەك اۋدانىندا ۇيىمداستىرىلعان «سونار-2019» حالىقارالىق قۇسبەگىلەر ءتۋرنيرى; اقمولا وبلىسى بۋراباي وڭىرىندە قۇسبەگى ءماسىپ باتىرحان ۇلى اتىنداعى بۇركىتشىلەردىڭ حالىقارالىق جارىسى قاتارلى شارالار ۇلتتىق سپورتتىڭ اجارىن اشسا, الداعى 2020 جىلعى اقپان ايىندا اۋدارىسپاقتان «قازاقستان قابىلانى» اتتى جوبا جالاۋىن كوتەرمەك كورىنەدى.
كەلەسى كەزەكتە ءسوز العان مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتى ۇلتتىق سپورت تۇرلەرى باسقارماسىنىڭ باسشىسى قارلىعاش رامازانوۆا كەلتىرگەن رەسمي مالىمەتتەن تۇيگەنىمىز, ۇلتتىق سپورت تۇرىمەن 2017 جىلى 343 مىڭ ادام شۇعىلدانسا, وتكەن جىلى بۇل كورسەتكىش 376 مىڭ ادامدى قۇراعان. قازىرگى تاڭدا ەلىمىز كولەمىندە ۇلتتىق سپورت تۇرلەرىنەن 8 مامانداندىرىلعان سپورت كلۋبى جانە 13 مامانداندىرىلعان سپورت مەكتەبى جۇمىس ىستەپ تۇر. وتكەن جىلدىڭ قورىتىندىسى بويىنشا رەسپۋبليكالىق دەڭگەيدە 86 ءىس-شارا, ونىڭ ىشىندە 50 رەسپۋبليكالىق, 36 حالىقارالىق جارىس وتكەن.
– قازىرگى تاڭدا كۇن تارتىبىندە تۇرعان باستى ماسەلە 2021 جىلى ەلىمىزدە ءوتۋى ءتيىس بۇكىلالەمدىك ەتنوسپورت ويىندارى, – دەدى قارلىعاش اسەتقىزى. بۇل باعىتتا مينيسترلىك پەن قاۋىمداستىق جانە ۇلتتىق سپورت تۇرلەرى فەدەراتسيالارى بىرلەسە جۇمىس جاساۋىمىز قاجەت. ۇيىمداستىرۋ كوميتەتى قۇرىلىپ, ونىڭ تۇراقتى وتىرىستارىندا ويىنداردى ۇيىمداستىرۋ مەن وتكىزۋ ماسەلەلەرى تالقىلانۋى ءتيىس.
القالى جيىن بارىسى تۇستەن كەيىن ۇزدىكتەرگە ارنايى بەرىلەتىن «التىن تۇعىر-2019» ماراپاتىنا ۇلاستى. وسىمەن جەتىنشى مارتە ۇيىمداستىرىلىپ وتىرعان سىيلىقتىڭ «ۇزدىك مەرگەندەر» ساناتى بويىنشا – ايكوز ەرالحان مەن باباجان باقداۋلەت, «ۇزدىك بايگە اتتارى» – «قويانقاسقا», «ۇشقوڭىر», «قىزجيرەن», «ۇزدىك اۋدارىسپاقشىلار» – امانجول نۇربەك, قۇرالباي ەرمەك, نارماعانبەت يمانعازى ۇلى, اعابەك عابيت, «قازاق كۇرەسىنىڭ ۇزدىك بالۋانى» – ناريمان تۇتقىشەۆ, «ۇزدىك توعىزقۇمالاقشى» – عالىمجان تەمىرباەۆ, «ۇزدىك بۇركىتشى» – سەرىكبولسىن جالعاس ۇلى, «ۇزدىك تەڭگە ءىلۋشى» – عالىمجان ءىزجانوۆ, «ۇزدىك كوكپار كومانداسى» – جاستار قۇراماسى, «ۇزدىك كوكپارشى» – قۇرمانبەك تۇرعانبەك, «ۇزدىك تورەشى» – ەرلان ءجۇسىپوۆ, «ۇزدىك جاتتىقتىرۋشى» – ارسلان قابجانوۆ, «ۇزدىك ۇلتتىق سپورت كلۋبى» – «اۋليە اتا» سپورت كلۋبى, «جاپپاي كوكپار ۇزدىكتەرى» بولىپ عالىمجان مىرزاباەۆ پەن جومارت زيابەك تانىلدى.
سونداي-اق ۇلتتىق سپورتقا ەڭبەك سىڭىرگەن تۇلعالارعا بەرىلەتىن «ەلىمجان» مەدالى الماتى وبلىسىنىڭ اكىمى اماندىق باتالوۆ پەن ۇلتتىق وليمپيادا كوميتەتىنىڭ باس حاتشىسى ساكەن مۇسايبەكوۆكە تابىس ەتىلدى.
