اتىراۋ وبلىسىنىڭ 144 تۇرعىنى «نۇرلى جەر» باعدارلاماسى اياسىندا باسپانالى بولدى. «بەرەكە» ىقشام اۋدانىنداعى جاڭا پاتەرلەر كىلتىن اتىراۋ قالاسى اكىمىنىڭ ورىنباسارى رينات جاڭعىلىشوۆ پەن «تۇرعىنۇيجيناقبانكى» اق باسقارما توراعاسىنىڭ ورىنباسارى نۇرلان اقشانوۆ تابىستادى.
- قازىرگى تاڭدا اتىراۋ قالاسىندا تۇرعىن ءۇي قۇرىلىسىنىڭ قارقىنى جەدەل. جىل باسىنان بەرى «نۇرلى جەر» باعدارلاماسى بويىنشا 256 پاتەر بەرىلگەن ەدى. بۇگىن تاعى 144 پاتەر كىلتىن تابىس ەتتىك. وسىلايشا, بيىل 400 اتىراۋلىق جاڭا باسپاناعا يە بولدى, - دەدى رينات جاڭعىلىشوۆ.
«نۇرلى جەر» باعدارلاماسى اياسىندا باسپانا كونكۋرستىق نەگىزدە, 50/50 قاعيداتى بويىنشا بولىنەتىنىن اتاپ ءوتۋ كەرەك. ياعني, پاتەرلەردىڭ 50%-دان كەم ەمەس بولىگى تۇرعىن ءۇي كەزەگىندە تۇرعان اتىراۋلىقتارعا بەرىلسە, قالعان 50%-ى ەشقانداي كەزەكتە جوق بانك سالىمشىلارى اراسىندا ۇلەستىرىلەدى.
- بۇگىندە اتىراۋ وبلىسىنىڭ 68 مىڭداي تۇرعىنى «تۇرعىنۇيجيناقبانكىنىڭ» ەسەپ-شوتتارىندا قاراجات جيناۋدا. بيىل 14 مىڭعا جۋىق اتىراۋلىقپەن كەلىسىم شارت جاسالىپ, بانكتىڭ وبلىستىق فيليالى جالپى سومماسى 11,6 ملرد تەڭگە بولاتىن 1047 نەسيە بەردى, - دەدى «قازاقستاننىڭ تۇرعىنۇيجيناقبانكى» اق باسقارما توراعاسىنىڭ ورىنباسارى نۇرلان اقشانوۆ.
«نۇرلى جەر» باعدارلاماسىنا قاتىسۋ ءۇشىن تۇرعىنۇيجيناقبانكىندە سالىمشى بولۋى, جانە ەسەپ-شوتىنا باسپانا قۇنىنىڭ 20%-ىن جيناۋى كەرەك. باعدارلامانىڭ باستى باسىمدىعى – باعاسى, باسپانانىڭ ءبىر شارشى مەترى 180 000 مىڭ تەڭگە. بۇل نارىق باعامىنان ەكى ەسەگە دەيىن تومەن.
