قوعام • 06 جەلتوقسان، 2019

بيىل الماتى وبلىسىندا 173 جاس دارىگەر جۇمىسقا قابىلداندى

49 رەتكورسەتىلدى

الماتى وبلىسىندا اق جەلەڭدى دارىگەرلەردىڭ جەتىسپەۋشىلىگى سەزىلە باستادى. مامان تاپشىلىعى اسىرەسە الىس اۋىلداردا بايقالىپ وتىر.

بۇگىندە وبلىستىڭ مەديتسينالىق مەكەمەلەرىندە 4 756 دارىگەر جانە 14961 مەيىربيكە ەڭبەك ەتەدى ەكەن. ياعني، 10 مىڭ ادامعا شاققانداعى ورتاشا مەديتسينالىق قىزمەت كورسەتۋمەن قامتۋ 73،8 پروتسەنت بولسا، جوعارى ءبىلىمدى دارىگەردىڭ ۇلەسى 23،2 پروتسەنت شاماسىندا. كادر جەتىسپەۋشىلىگىن زەردەلەۋ بارىسىندا ايماقتا 122 جالپى تاجىريبە دارىگەرى، 28 اكۋشەر-گينەكولوگ، 24 وتاشى، 18 انەستەزيولوگ-رەانيماتولوگ، 13 نەوناتولوگ، 13 نەۆرولوگ جانە 8 ونكولوگ دارىگەردىڭ ورنى بوس تۇرعانى انىقتالعان.

ارينە، وبلىستىق دەنساۋلىق ساقتاۋ سالاسىنىڭ باسشىلىعى بۇل ماسەلەنى شەشۋدە قول قۋسىرىپ وتىرعان جوق. بيىل 173 جاس مامان ەمحانالار مەن اۋرۋحانالارعا جۇمىسقا تۇرعان. ونىڭ ىشىندە 97 مەديتسينا قىزمەتكەرى اۋىلدىق جەردەگى مەكەمەلەرگە قابىلدانىپتى.

- ءبىز ءوز تاراپىمىزدان مامان جەتىسپەۋشىلىگىن بولدىرماۋ ءۇشىن بارلىق مۇمكىندىكتى پايدالانىپ وتىرمىز. جەرگىلىكتى اكىمدەرمەن بىرلەسىپ، جۇمىسقا تۇرعان جاس مامانداردى ۋاقىتشا باسپانامەن قامتۋعا، العاشقى كوتەرمە جاردەماقى تولەۋگە، ءۇي ساتىپ الۋعا جەڭىلدەتىلگەن نەسيە بەرۋگە كومەكتەسەمىز. بيىل جۇمىسقا تۇرعان جاس ماماننىڭ بارلىعىنا 1 ملن تەڭگەدەن كوتەرمە اقى تولەدىك. جالپى، دارىگەرلەردىڭ جەتىسپەۋشىلىگى سالاداعى الەۋمەتتىك قولداۋدىڭ السىزدىگىنەن ەمەس، ادامي فاكتورعا دا بايلانىستى. ياعني، تاجىريبەلى ماماندار زەينەتكە شىعىپ جاتىر، ولاردىڭ ورنىن جاس بۋىن تولتىرىپ ۇلگەرمەۋدە. مەديتسينا مامانى بولۋ ءۇشىن جوعارى وقۋ ورنىندا 10 جىلعا دەيىن ءبىلىم الۋعا تۋرا كەلەدى، ودان كەيىن دە ءبىراز تاجىريبە جيناپ، مىقتى مامان بولعانشا ۋاقىت ءوتىپ كەتەدى. دەمەك، دارىگەرلىك قىزمەتكە ارمانىنا ادال، ماماندىعىنا قۇلاي بەرىلگەن ادام عانا كەلەدى، - دەيدى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق. 

ال ايماقتاعى دارىگەر تاپشىلىعىن شەشۋ ءۇشىن وبلىستىق بيۋدجەتتەن 18 ملن تەڭگە قارجى قارالىپ، تالاپتى جاستاردىڭ جوعارعى وقۋ ورىندارىنا تۇسۋگە جاعداي جاسالعان. اتاپ ايتقاندا، 47 بولاشاق دارىگەر الماتى قالاسىنداعى مەديتسينالىق ءبىلىم بەرەتىن وقۋ ورىندارىندا وبلىستىڭ ەسەبىنەن وقىپ جاتىر. ونىڭ ىشىندە 26 ستۋدەنتكە وبلىس اكىمىنىڭ گرانتى تاعايىندالعان. بيىل وقۋ شىعىندارى ءۇشىن بولىنگەن قارجى تاعى 26،5 ملن تەڭگەگە كوبەيدى. كەلەر جىلعى تالاپكەرلەر ءۇشىن دە 4،6 ملن تەڭگە قاراستىرىلىپ، بيۋدجەت ەسەبىنەن وقىتۋ ءىسى جالعاسىن تابادى.

سوڭعى جاڭالىقتار

ەلباسى تۇركيا حالقىنا كوڭىل ايتتى

قازاقستان • بۇگىن، 14:17

قىزىلوردا: قازالىداعى قونىس توي

ايماقتار • بۇگىن، 09:07

ۇقساس جاڭالىقتار