شەت مەملەكەتتەردە 2013 جىلدان باستاپ وتكىزىلىپ كەلە جاتقان «زيورنا» فەستيۆالى نەگىزىنەن پەداگوگتەر مەن پسيحولوگ ماماندارعا, ءتۇرلى ءبىلىم بەرۋ ورىندارىنداعى تاربيەشىلەرگە ارنالعان. شارانىڭ باستى يدەياسى – ءاربىر بالانىڭ شەكسىز مۇمكىندىككە يە ەكەندىگىن, تاربيە مەن دامۋ ءوزارا قاتار جۇرەتىنىن, ەرەسەكتەردىڭ تاماشا اتا-انا مەن پەداگوگ بولا الاتىنىن جۇرتشىلىققا كورسەتۋ جانە ناسيحاتتاۋ.
الماتىدا وتكەن شارادا پەداگوگتەر ءۇشىن شەبەرلىك-سىنىپتارى ۇيىمداستىرىلدى. اتا-انالارعا اشىق كەڭەس بەرىلىپ, بالالار مەن جاسوسپىرىمدەرگە ارنالعان قىزىقتى شارالار وتكىزىلدى. پسيحولوگيا عىلىمدارىنىڭ دوكتورى, رەسەي ءبىلىم اكادەمياسىنىڭ اكادەميگى شالۆا اموناشۆيلي, حالىقارالىق ادامگەرشىلىك پەداگوگيكا ورتالىعىنىڭ پرەزيدەنتى پااتا اموناشۆيلي, «ايب» ءبىلىم بەرۋ قورىنىڭ نەگىزىن قالاۋشى ارام پاحچانيان, «Razum Life» قوعامدىق بىرلەستىگىنىڭ توراعاسى مارينا تارگاكوۆا, «بوبەك» ۇلتتىق ورتالىعىنىڭ پەداگوگ عالىمدارى ءسوز سويلەپ, بالا تاربيەسىنە قاتىستى اتا-انالاردى جانە ءبىلىم بەرۋ سالاسى ماماندارىن الاڭداتقان ساۋالدارعا جاۋاپ بەردى.
فەستيۆالعا ءاليا نازارباەۆا قاتىستى. ول:
– مەن ءۇشىن جانە بارلىعىمىز ءۇشىن بۇل وتە جاۋاپتى ميسسيا. بۇل فەستيۆال ەرەسەكتەر مەن بالالارىمىزدى, تۋعان-تۋىستارىمىزدى ءبىر-بىرىمىزگە بۇرىنعىدان دا جاقىنداستىرا تۇسەتىنىنە, وزىمىزگە بەيمالىم بولىپ كەلگەن جاڭا دۇنيەلەر اشاتىنىنا سەنەمىن, سوعان شىن جۇرەكتەن تىلەكتەسپىن! – دەدى.
شارا بارىسىندا «بوبەك» ۇلتتىق عىلىمي-پراكتيكالىق, ءبىلىم بەرۋ جانە ساۋىقتىرۋ ورتالىعى رمقك باسشىسى ەلەنا ساكەنوۆا شالۆا اموناشۆيليگە ء«وزىن-ءوز تانۋ» ادامگەرشىلىك-رۋحاني ءبىلىم بەرۋ باعدارلاماسىنىڭ اۆتورى سارا الپىسقىزى بەكىتكەن «اسىل جۇرەك» توسبەلگىسىن تابىستادى.
فەستيۆال اياسىندا العاش رەت گۋمانيتارلىق عىلىمدار نەگىزىندەگى قازاقستاندىق ءبىلىم بەرۋ-دامىتۋ پلاتفورماسىنىڭ t-EACH جوباسى, سونداي-اق «قازاقستان مۇعالىمى» ۇلتتىق سىيلىعى تانىستىرىلدى.
ايزەرە سامارقان
