باسپانالى بولىپ، باقىتقا بولەندى

باعدارلامالار • 06 جەلتوقسان، 2019

باسپانالى بولىپ، باقىتقا بولەندى

24 رەت كورسەتىلدى

ايماقتاردا «نۇرلى جەر» مەملەكەتتىك باعدارلاماسى اياسىندا سالىنعان تۇرعىن ءۇي ءوز يەسىن تاۋىپ جاتىر. ماسەلەن، الماتى وبلىسىنىڭ اۋماعىندا «نۇرلى جەر» باعدارلاماسى بويىنشا 18 كوپ پاتەرلى تۇرعىن ءۇي جانە 288 جەكە تۇرعىن ءۇي قۇرىلىسى ءجۇرىپ جاتىر. كەزەڭ-كەزەڭىمەن تولىق اياقتالاتىن پاتەر سانى 1 243 بولسا، بۇگىنگە دەيىن 545 پاتەر قولدانىسقا بەرىلدى.

قالماحانبەت مۇقامەتقالي

– مەملەكەت باسشىسى قاسىم-جومارت توقاەۆ حالىققا ارناعان جولداۋىندا تۇرعىن ۇيگە قولجەتىمدىلىكتى، اسىرەسە حالىقتىڭ الەۋمەتتىك از قامتىلعان توپتارىنىڭ قولجەتىمدىلىگىن ارتتىرۋ قاجەتتىگىن اتاپ ءوتتى. قازىر وبلىستا تۇرعىن ءۇي الۋ كەزەگىندە 51 مىڭ ادام تۇر، ولاردىڭ ىشىندە كوپ بالالى وتباسىلار سانى – 6039. بيىل بارلىق باعىتتار بويىنشا 1 447 كوپ بالالى وتباسىن تۇرعىن ۇيمەن قامتاماسىز ەتۋ جوسپارلانعان ەدى، قازىرگە دەيىن 1 093 وتباسى ءۇيلى بولدى. بۇل ورايدا «نۇرلى جەر» باعدارلاماسىنىڭ دا ۇلەسى بار. وسى باعدارلاما بويىنشا 151 وتباسى باسپانالى بولسا، ساتىپ الۋ ەسەبىنەن 346 وتباسى، مەتسەناتتار ەسەبىنەن 169 وتباسى جانە «باقىتتى وتباسى» باعدارلاماسى بويىنشا 427 وتباسى تۇرعىن ۇيمەن قامتىلدى، – دەيدى وبلىس اكىمى اماندىق باتالوۆ.

باسپانالى بولۋ باقىتى جەتىسۋ ءوڭىرىنىڭ اۋىلدارىنا دا بۇيىردى. جاقىندا كەربۇلاق اۋدانىنىڭ ورتالىعى سارىوزەك اۋىلىندا 18 وتباسى جاڭا قونىسقا كوشتى. سارىوزەك اۋىلىندا سالىنعان جاڭا ءۇيدىڭ قۇرىلىسىنا جەرگىلىكتى بيۋدجەتتەن 285،500 ملن تەڭگە قارجى ءبولىنىپتى. ال تۇرعىن ءۇي الابىنىڭ ينجەنەرلىك-كوممۋنيكاتسيالىق جەلىلەرىن جاساقتاۋ ءۇشىن 106،756 ملن تەڭگە قاراجات قاراستىرىلعان ەكەن.

جالپى، اۋىل شارۋاشىلىعىنا ارقا سۇيەگەن كەربۇلاق ءوڭىرى بيىلعى جىلدى تابىسپەن قورىتىندىلاپ وتىر. اۋداندا وندىرىلگەن اگروونەركاسىپ ونىمدەرى 35 ملرد تەڭگەدەن اسىپ، جىل باسىندا بولجانعان كورسەتكىش اسىرا ورىندالعان. اۋىل شارۋاشىلىعى سالاسىن قارجىلاي قولداۋدىڭ ناتيجەسىندە ديقان مەن شارۋانىڭ ءىسى وڭعا باستى. بيىلدىڭ وزىندە 3 شارۋا قوجالىعى مەن 12 جەكە كاسىپكەر 65 ميلليون تەڭگە كولەمىندە جەڭىلدەتىلگەن نەسيە العان. بۇل ءوز كەزەگىندە اۋدانداعى جەر يگەرۋگە جان ءبىتىرىپ، ەگىستىك القابىنىڭ كولەمىن ۇلعايتقان. مال شارۋاشىلىعى دا دامىپ، ءتورت ت ۇلىك تۇياعى كوبەيدى. ونەركاسىپ تە ىلگەرىلەۋدە. اۋدانداعى ون شاقتى قايتا وڭدەۋ كاسىپورنى 17 مىڭ توننا شيكىزاتتى وڭدەپ، 9 690 توننا ءونىم شىعارعان ەكەن. ەندى وسىنداي ەڭبەگى اقتالعان ءوڭىردىڭ تۇرعىندارى ءۇشىن باسپانالى بولۋ باقىتى بۇيىرسا، قۋانىش ەكى ەسەلەنبەي مە؟

– سارىوزەكتە جاڭا شاعىن اۋدان دا بوي كوتەردى. «نۇرلى جەر» مەملەكەتتىك باعدارلاماسى بويىنشا سالىنعان 18 تۇرعىن ءۇي يەسىن تاپتى. باسپانا نەگىزىنەن از قامتىلعان، كوپ بالالى وتباسىلارعا، مۇمكىندىگى شەكتەۋلى جاندارعا، اۋعان سوعىسىنىڭ ارداگەرلەرىنە، مۇعالىمدەر مەن دارىگەرلەرگە جانە مەملەكەتتىك قىزمەتكەرلەرگە بەرىلدى. تۇرعىنداردى باسپانامەن قامتاماسىز ەتۋ جۇمىسى الداعى ۋاقىتتا دا جالعاسا بەرەدى. قازىر اۋداندا سەگىز جۇزدەن اسا ادام ءۇي كەزەگىندە تۇر، ونىڭ اراسىندا 148 كوپ بالالى انا بار، – دەيدى كەربۇلاق اۋدانىنىڭ اكىمى ماحاببات بيگەلديەۆ.

توق ەتەرىن ايتقاندا، ايماقتار ءۇشىن «نۇرلى جەر» باعدارلاماسى بويىنشا سالىنىپ جاتقان تۇرعىن ۇيلەردىڭ قولجەتىمدى بولۋى – باسپاناعا مۇقتاج جانداردىڭ ماسەلەسىن شەشۋگە جاسالعان وڭ قادامعا اينالىپ وتىر.

الماتى وبلىسى