الماتىعا بەدەلدى ەۋروپالىق ساۋلەتشى راينەر ماحلامياكي كەلدى

ايماقتار • 05 جەلتوقسان، 2019

الماتىعا بەدەلدى ەۋروپالىق ساۋلەتشى راينەر ماحلامياكي كەلدى

94 رەت كورسەتىلدى

الماتىعا قازىرگى زاماننىڭ ايتۋلى ساۋلەتشىلەرىنىڭ ءبىرى راينەر ماحلامياكي كەلدى. Urban Forum Kazakhstan قورى مەن Tikkurila كومپانياسىنىڭ «قالالار مەن ادامدار» ءبىلىم بەرۋ باعدارلاماسىنىڭ اياسىندا شاقىرىلعان راينەر ماحلامياكي زاماناۋي ارحيتەكتۋرا جانە ۋربانيستيكا تۋرالى كاسىبي قاۋىمداستىقتىڭ ءبىلىمىن كەڭەيتۋدى كوزدەپ وتىر. ساۋلەتشى ءدارىسىنىڭ نەگىزىن سوڭعى 100 جىلداعى فين ساۋلەتشىلىك ونەرىنىڭ تاريحى قۇرايدى.

ايناش ەسالى

ماسەلەن، فين ساۋلەت مەكتەبىنىڭ تاجىريبەسى – وبەكتىلەردى جوبالاۋدا ءوزىنىڭ گۋمانيستىك تاسىلىمەن قىزىقتى. فين كونتسەپتسياسىنا قۇرىلعان ءبىلىم بەرۋ مەكەمەلەرى – وقۋعا ىنتالاندىرادى، مونۋمەنتالدى عيماراتتارى رۋحتاندىرادى، ال تۇرعىن ۇيلەرى الەممەن ۇيلەسىمدە ءومىر سۇرۋگە كومەكتەسەدى.

«ارحيتەكتۋرالىق شەشىم ەشبىر جاعدايدا ورتا ديزاينىن باسىپ كەتپەۋى ءتيىس. الەمدى قايتا قۇرۋ يدەياسىنىڭ ىعىنا جىڭىلىپ كەتپەي، قالا تۇرعىندارى ءۇشىن قولايلى جاعداي جاساۋ ماڭىزدى. ويتكەنى، ارحيتەكتۋراداعى ەڭ باستىسى–قابىرعالار نەمەسە جابىندار ەمەس، كەڭىستىك پەن اتموسفەرا»، – دەيدى راينەر ماحلامياكي.

ماحلامياكيدىڭ پىكىرىنشە، قازىرگى زامانعى ارحيتەكتۋرانىڭ دامۋى ءوزارا بايلانىسقان ءۇش ترەندكە – سىرتقى اسەرلەرگە تۇراقتىلىققا، قالا بەلسەندىلەرى مەن تۇرعىندارىن قالالاردىڭ كەلبەتىن جوبالاۋعا تارتۋعا، سونداي-اق جەرگىلىكتى مانماتىنگە نازار اۋدارۋعا بەيىم.

سىرتقى اسەرلەرگە تۇراقتىلىق – بۇل قالانىڭ ءوز كەلبەتىن ساقتاي وتىرىپ، ءوسۋ جانە وزگەرۋ قابىلەتى. قالا تۇرعىندارى مەن كوزقاراس كوشباسشىلارىنىڭ ارالاسۋىنسىز شاھارلاردى اباتتاندىرۋ مۇمكىن ەمەس. ولار كوبىنەسە قالانىڭ ناقتى مۇقتاجدىقتارىن انىقتاۋعا عانا ەمەس، سونىمەن قاتار ونىڭ بىرەگەي ساۋلەت-قۇرىلىس داستۇرلەرىن ساقتاۋعا كومەكتەسەدى. ساۋلەت كومپانيالارىنىڭ قالالىق قوعامدىق كەڭەستەرمەن ىنتىماقتاستىعى الەمدىك نورما بولىپ تابىلادى. مىسالى، حەلسينكيدە راينەر ماحلامياكيدىڭ بيۋروسى كولىك جانە تەمىرجول ۆوكزالىن، تۋريستىك جانە ساۋدا ورتالىعىن، وفيستىك جايلار مەن تۇراق ايماعىن قامتيتىن Tikkurila ساۋدا-تۋريستىك ورتالىعىن جوبالاۋعا جۇمىس ىستەيدى. تاريحي عيماراتتار ءانسامبلىنىڭ تۇتاستىعىن بۇزباي، كولىك باعىتتارىنا كەدەرگى كەلتىرمەي، قورشاعان ورتامەن ورگانيكالىق ۇيلەسىم تابۋ ءۇشىن ساۋلەتشىلەر كومانداسى قالالىق دامۋ توبىمەن ءوزارا ءىس-قيمىل جاسايدى.

قازىر قازاقستاندا دا «بىرگە جوبالاۋ» قاعيداتتارى ەنگىزىلۋ ۇستىندە. ماسەلەن، فرەسكانىڭ ەۆوليۋتسيالانعان ءتۇرى بولىپ تابىلاتىن قالالىق شىعارماشىلىق وبەكتىلەرى – مۋرالداردى قۇرۋدا Tikkurila كومپانياسى تۇراقتى باستاماشى ءارى سەرىكتەستەردىڭ ءبىرى بولىپ تابىلادى.

الماتى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز