شىمكەنت قالاسىندا ۇكىمەت باسشىسى «قازاقستاننىڭ ينۆەستيتسيالىق قورى» اق جانە «Alliance Textile» وزبەك جەڭىل ونەركاسىپ كاسىپورىندارى قاۋىمداستىعىنىڭ بىرلەسكەن كاسىپورنى - «Alliance» ساۋدا-ونەركاسىپ پالاتاسى» جشس ءجىپ ءيىرۋ فابريكاسىنىڭ اشىلۋ راسىمىنە قاتىستى.
جوبا بيىل ماۋسىم ايىندا قر جانە ءور ۇكىمەتتەرىنىڭ اراسىندا بىرلەسكەن توقىما كلاستەرىن قۇرۋ تۋرالى قول جەتكىزىلگەن كەلىسىمدەر اياسىندا ىسكە اسىرىلدى. تاراپتاردىڭ كۇش-جىگەرىنىڭ ارقاسىندا قىسقا ۋاقىت ىشىندە جوندەۋ-قالپىنا كەلتىرۋ جۇمىستارى جۇرگىزىلىپ, كوممۋنالدىق قىزمەتتەر تارتىلدى, بۇل كوپ جىلداردان بەرى جۇمىسى توقتاپ تۇرعان فابريكانى ىسكە قوسۋدى قامتاماسىز ەتتى.
«قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ ءبىزدىڭ الدىمىزعا «قاراپايىم زاتتار ەكونوميكاسىن» دامىتۋ مىندەتىن قويدى, وندا جەڭىل ونەركاسىپكە ەرەكشە ءرول بەرىلەدى. ءبىز ونىڭ العاشقى ناتيجەلەرىن كورىپ وتىرمىز», - دەدى ا. مامين.
پرەمەر-مينيستر فابريكانى ىسكە قوسۋ قازاقستاننىڭ توقىما كلاستەرىن دامىتۋعا زور سەرپىن بەرەتىنىنە سەنىم ءبىلدىردى.
«مەملەكەت باسشىسى قاسىم-جومارت كەمەل ۇلى توقاەۆ قازاقستان ەكونوميكاسىنىڭ شيكىزاتتىق ەمەس سەكتورلارىنا شەتەلدىك ينۆەستيتسيالاردى تارتۋدىڭ ماڭىزدىلىعىن بىرنەشە رەت اتاپ ءوتتى. وزبەكستاننىڭ توقىما ونەركاسىبىن دامىتۋداعى وڭ تاجىريبەسىن ەسكەرە وتىرىپ, بيىل 22 ماۋسىمدا وتكەن قازاقستان مەن وزبەكستان اراسىنداعى ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ 18-ءشى وتىرىسى اياسىندا شىمكەنت قالاسىندا توقىما كلاستەرىن بىرلەسىپ ىسكە قوسۋ تۋرالى كەلىسىمگە قول قويىلدى», - دەدى ا. مامين.
كاسىپورىندا ءبىرىنشى كەزەڭدە 120 جاڭا جۇمىس ورنى قۇرىلعان. ماقتا-تالشىقتى وڭدەۋ كولەمى جىلىنا 6 مىڭ توننانى قۇرايدى. جوباعا وزبەك تاراپىنىڭ ينۆەستيتسيالارى شامامەن 4,6 ملرد تەڭگە.
شىمكەنت قالاسىنىڭ توقىما كلاستەرىن قالپىنا كەلتىرۋ جونىندەگى جول كارتاسى اياسىندا قوسىمشا ەكى فابريكانى ىسكە قوسۋ جوسپارلانعان, بۇل قازاقستاندا وڭدەلەتىن ماقتا كولەمىن 2 ەسەگە ارتتىرۋدى قامتاماسىز ەتەدى جانە 800 جاڭا جۇمىس ورنىن قۇرادى.
تۇركىستان وبلىسى قازىعۇرت اۋدانى مايلىوشاق اۋىلىندا ا. مامين جىلدام ازىرلەنەتىن تاماق ونىمدەرىن وندىرەتىن زاۋىتتىڭ اشىلۋ راسىمىنە قاتىستى.
الەمدەگى اسا ءىرى جىلدام ازىرلەنەتىن كەسپە ءوندىرۋشى - «CG Foods Central Asia» كومپانياسى جوباعا 5,7 ملرد تەڭگە ينۆەستيتسيا سالدى جانە 300-گە جۋىق قازاقستاندىقتى جۇمىسپەن قامتاماسىز ەتۋدى جوسپارلاپ وتىر.
شىعارىلاتىن ءونىم كولەمى جىلىنا 4,5 مىڭ توننادان اسادى. ءوندىرىس پروتسەسىندە تەك وتاندىق شيكىزات پايدالانىلادى. ءونىمدى ىشكى نارىققا عانا ەمەس, سىرتقى نارىقتارعا دا جەتكىزۋ جوسپارلانعان.
