قىركۇيەك ايىندا الماتىدا «باۋىرجان» قايىرىمدىلىق قورى بالالار ءۇيىنىڭ تاربيەلەنۋشىلەرى اراسىندا فۋتبولدان ءداستۇرلى «ارمانىڭا جاقىندا» اتتى تۋرنير ۇيىمداستىردى. ەلىمىزدىڭ ءار ايماعىنان 12 كوماندا قاتىسقان دوپ دوداسىندا تاراز قالاسىنىڭ جەتىم بالالار ءۇيىنىڭ جەتكىنشەكتەرى توپ جارىپ, يسپانيانىڭ باس شاھارى – مادريد قالاسىنا ساياحاتتاۋعا جولداما ۇتىپ العان بولاتىن. جۋىردا كومانداداعى سەگىز كىشكەنتاي فۋتبولشى اتاقتى «رەال» كلۋبىنىڭ فۋتبولشىلارىمەن كەزدەسىپ, «سانتياگو بەرنابەۋ» ستاديونىن ارالاۋعا مۇمكىندىك الدى. سونداي-اق ولار يسپانيا پاتشاسىنىڭ سارايىنا جانە مادريدتەگى ويىن-ساۋىق ساياباعىندا كوڭىلدى ۋاقىت وتكىزدى.
سونىمەن قاتار تارازدىق سپورتشىلار كلۋبتىڭ بارلىق ماراپاتتارى جيناعىن «رەال مادريد» كومانداسىنىڭ مۇراجايىنا باردى. التىن بۋتسا, ايگىلى كۋبوكتار مەن تروفەيلەر, تاريحتا قالعان فۋتبولشىلار كيىمدەرى – بالالار ءۇيىنىڭ تاربيەلەنۋشىلەرىنىڭ كورگەن ەكسپوناتتاردىڭ كىشكەنتاي عانا بولىگى بولدى. بالالاردىڭ ەندىگى ماقساتى – ايگىلى ستاديونىندا جۇلدىزدى ماتچ ويناپ, بولاشاقتا كاسىبي فۋتبولشى اتانۋ.
بۇگىنگى تاڭدا قازاقستاندا 40-تان استام بالالار ءۇيى جانە جەتىم بالالار مەن اتا-اناسىنىڭ قامقورلىعىنسىز قالعان بالالاردى قولداۋ ورتالىعى جۇمىس ىستەيدى. وسىنداي بالالار ءۇيىنىڭ ارقايسىسىندا قولداۋعا مۇقتاج كوپتەگەن تالانتى, دارىندى جەتىم بالالاردى كەزدەستىرۋگە بولادى. ءوز كەزەگىندە «باۋىرجان» قايىرىمدىلىق قورى, بالالار ءۇيىنىڭ تاربيەلەنۋشىلەرى اراسىندا سپورتتى قولداۋ مەن دامىتۋعا باستى نازار اۋدارادى.
بۇعان دەيىن جەڭىمپاز اتانعان 64 تاربيەلەنۋشى «بارسەلونا», «ميلان», «باۆاريا» «اتلەتيكو مادريد», «چەلسي», «پسج» كلۋبتارىنا بارىپ, مەسسي, روببەن, توررەس, نەيمار سياقتى فۋتبول الەمىنىڭ جۇلدىزدارىمەن كەزدەسكەن.
