ول پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە «مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى جونىندەگى قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭعا سايكەس باسشىلاردىڭ قول استىنداعى قىزمەتكەرلەرى ءۇشىن جاۋاپكەرشىلىگى زاڭنامالىق دەڭگەيدە بەكىتىلگەنىن جەتكىزدى.
ال بۇل جاڭالىق پرەزيدەنت قاسىم-جومارت توقاەۆتىڭ تىكەلەي تاپسىرماسىمەن زاڭعا ەنگىزىلدى. ويتكەنى 2019 جىلدىڭ 20 مامىرىندا سىبايلاس جەمقورلىققا قارسى ءىس-قيمىل ماسەلەلەرى بويىنشا مەملەكەتتىك ورگاندار باسشىلارىنىڭ قاتىسۋىمەن وتكەن كەزدەسۋدە قاسىم-جومارت توقاەۆ باعىنىشتى قىزمەتكەرلەردىڭ سىبايلاس جەمقورلىققا جول بەرگەنى ءۇشىن مەملەكەتتىك ورگانداردىڭ ءبىرىنشى باسشىلارىنىڭ ورنىنان ءتۇسۋ ينستيتۋتىن ەنگىزۋدىڭ ماڭىزدىلىعىن اتاپ وتكەن ەدى. سوعان ساي ساياسي مەملەكەتتىك باسشىلىق لاۋازىمداعى قىزمەتشىلەردىڭ تىكەلەي باعىنىشتى قىزمەتكەرلەرى سىبايلاس جەمقورلىق قۇقىق بۇزۋشىلىق جاساسا, مىندەتتى تۇردە جۇمىستان بوساتۋ ءۇشىن ءوتىنىش جازادى. ياعني, اتاپ ايتقاندا – مينيسترلەر مەن ولاردىڭ ورىنباسارلارى, نۇر-سۇلتان, الماتى, شىمكەنت قالالارى مەن وبلىس اكىمدەرى مەن ولاردىڭ ورىنباسارلارى, اۋدان اكىمدەرى, ولاردىڭ تىكەلەي باعىنىشتى قىزمەتكەرلەرى سىبايلاس جەمقورلىق قۇقىق بۇزۋشىلىق جاساسا, مىندەتتى تۇردە وتستاۆكاعا شىعۋعا سۇرانۋى كەرەك.
«زاڭنىڭ جاڭا رەداكتسياسىنا سايكەس, ءبىرىنشى باسشى ونىڭ تىكەلەي باعىنىشتى تۇلعاسىنا قاتىستى سوتتىڭ ايىپتاۋ ۇكىمى كۇشىنە ەنگەننەن سوڭ كۇنتىزبەلىك 10 كۇن ىشىندە نەمەسە اقتالمايتىن نەگىزدەر بويىنشا قىلمىستىق ءىس توقتاتىلعاننان كەيىن وتستاۆكاعا كەتۋگە مىندەتتى», دەدى سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى. ول سونداي-اق, قانداي تۇلعالار تىكەلەي باعىنىشتىلار رەتىندە قاراستىرىلاتىنىن ءتۇسىندىردى. ماسەلەن, ورتالىق مەملەكەتتىك ورگاننىڭ باسشىسى (مينيستر) ءۇشىن – بۇل ونىڭ ورىنباسارلارى, جاۋاپتى حاتشى نەمەسە اپپارات باسشىسى, ايماقتىق بولىمشەلەردىڭ باسشىلارى, ال وبلىس, رەسپۋبليكالىق ماڭىزى بار قالالار, استانا اكىمى ءۇشىن – ونىڭ ورىنباسارلارى, اپپارات باسشىسى, اۋداننىڭ (وبلىستىق ماڭىزى بار قالانىڭ) اكىمى جانە ورتالىق مەملەكەتتىك ورگان باسشىسىنىڭ ورىنباسارى (ۆيتسە-مينيستر) ونىڭ قاراماعىنداعى بولىمشە نەمەسە تاۋەلسىز قۇرىلىمدىق بولىمشە باسشىسى سىبايلاس جەمقورلىق قىلمىس جاساعان كەزدە قىزمەتىنەن كەتەدى. وبلىس اكىمىنىڭ ورىنباسارى جەرگىلىكتى بيۋدجەتتەن قارجىلاندىرىلاتىن اتقارۋشى ورگانداردىڭ باسشىلارىنا جاۋاپ بەرەدى. اۋدان اكىمى ءوزىنىڭ ورىنباسارلارىنا, اپپارات باسشىسىنا, جەتەكشىلىك ەتەتىن اۋداندىق اتقارۋشى ورگانداردىڭ باسشىلارىنا, اۋىل, كەنت, اۋىلدىق وكرۋگتەردىڭ اكىمدەرىنە جاۋاپ بەرەدى.
جالپى ءبىر ەسكەرەر جايت, «مەملەكەتتىك قىزمەت تۋرالى» زاڭعا سايكەس, مەملەكەتتىك قىزمەتشىنى وسى لاۋازىمعا تاعايىنداعان لاۋازىمدى تۇلعاعا ورنىنان كەتۋ تۋرالى ءوتىنىش جىبەرىلەدى. وتستاۆكانى قابىلداۋ نەمەسە قابىلداماۋ – بۇل ساياسي قىزمەتكەردى قىزمەتكە تاعايىنداعان باسشىنىڭ قۇزىرەتى. ەگەر ساياسي ەمەس, بىراق ا جانە ب كورپۋسىنىڭ اكىمشىلىك مەملەكەتتىك قىزمەتشىلەرى بولىپ تابىلاتىن بارلىق باسقا باسشىلارىنا تىكەلەي باعىنىشتى قىزمەتكەرلەر سىبايلاس جەمقورلىق قۇقىق بۇزۋشىلىق جاساعان جاعدايدا الدىڭعىلارعا تارتىپتىك جاۋاپكەرشىلىك قاراستىرىلعان.
سونىمەن قاتار مەملەكەت باسشىسى قول قويعان زاڭدا باسشىلارعا باعىنىشتى قىزمەتكەرلەردىڭ سىبايلاس جەمقورلىق قۇقىق بۇزۋشىلىق جاساۋىنىڭ الدىن الۋ مىندەتى ەنگىزىلگەن. بۇل مىندەتتىڭ ورىندالۋى نەمەسە تيىسىنشە ورىندالماۋى باسشىنى تارتىپتىك جاۋاپكەرشىلىككە تارتۋعا اكەلىپ سوعادى.
نورماتيۆتىك قۇقىقتىق اكتىلەردىڭ جوبالارىنا سىبايلاس جەمقورلىققا قارسى ساراپتامانى ەنگىزۋ دە جاڭالىق بولىپ وتىر.
