قاتىسۋشىلارعا استانا مەملەكەتتىك قىزمەت حابى باسقارۋشى كوميتەت توراعاسى ءاليحان بايمەنوۆ, بۇۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش, بۇۇ ەكونوميكالىق جانە الەۋمەتتىك ماسەلەلەر بويىنشا دەپارتامەنتىنىڭ مەملەكەتتىك باسقارۋ ماسەلەلەرى بويىنشا اعا قىزمەتكەرى گارەگين مانۋكيان, الماتىداعى سىرتقى ىستەر مينيسترلىگى وكىلدىگى باسشىسى ەرلان ىسقاقوۆ, سونداي-اق پرەزيدەنت جانىنداعى مەملەكەتتىك باسقارۋ اكادەمياسى ۆيتسە-رەكتورى ايگۇل كوشەرباەۆا جىلى لەبىزدەرىن ءبىلدىردى.
بايمەنوۆ مىرزا تۇراقتى دامۋ ماقساتتارىنا (تدم) قول جەتكىزۋ ءۇشىن ساپالى مەملەكەتتىك باسقارۋدىڭ ماڭىزىنا توقتالدى. «مەملەكەتتىك باسقارۋ ساپاسى, ءوز كەزەگىندە, كوبىنە ءبىلىم بەرۋ مەكەمەلەرى مەن مەملەكەتتىك باسقارۋ ينستيتتارى اينالىساتىن كادرلار دايىنداۋ ساپاسىمەن انىقتالادى. بۇل اسپەكتىلەر قازىرگىدەي VUCA الەمدە ءاربىر ەلدىڭ دامۋ باسىمدىلىقتارىنا جەتۋ جولىندا وزەكتى بولا تۇسۋدە», دەدى سپيكەر.
بۇۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش مەملەكەتتىك قىزمەتتى دامىتۋ ماقساتىندا كوپتەگەن ەلدىڭ ۇكىمەتتەرىنە وزىق, زاماناۋي تاسىلدەرمەن تانىسۋعا, ءتيىمدى وقىتۋ باعدارلاماسىن دايارلاۋدا قولداۋ كورسەتەتىندەرىن جەتكىزدى. «بۇۇ دامۋ باعدارلاماسى قازاقستاندا مەملەكەتتىك قىزمەت رەفورماسىنا, ونىڭ ىشىندە مەملەكەتتىك قىزمەتكەرلەر الەۋەتىن ارتتىرۋعا قولداۋ كورسەتۋدە. مەملەكەتتىك قۇرىلىمدارعا استانا مەملەكەتتىك قىزمەت حابىمەن بىرگە جاڭا, بەلسەندى, يننوۆاتسيالىق مەحانيزمدەر قولدانۋدا قولعابىس جاسايمىز. سونداي-اق قازاقستاننىڭ مەملەكەتتىك قىزمەت اگەنتتىگىنە مەملەكەتتىك قىزمەتكەرلەردىڭ بىرىڭعاي قۇزىرەتتەر شەڭبەرىن جانە ەڭبەكاقى جۇيەسىن ازىرلەۋدە قولداۋ كورسەتەمىز. استانا حابى ءوز ميسسياسىن جۇزەگە اسىرۋدا مەملەكەتتىك قىزمەتكەرلەر الەۋەتىن ارتتىرۋ ماسەلەسىنە ۇنەمى, جۇيەلى تۇردە كوڭىل بولەتىندىگى قۋانتادى», دەدى قازاقستانداعى بۇۇ دب تۇراقتى وكىلى.
بۇل جيىننىڭ ورتاق ماقساتى – تۇراقتى دامۋ ماقساتتارىن جۇزەگە اسىرۋدى قولداۋدا مەملەكەتتىك قىزمەتكەرلەر الەۋەتىن ارتتىرۋ, مەملەكەتتىك باسقارۋ ينستيتۋتتارى دامۋى جايلى اقپارات الماسۋ.
سەمينارعا قاتىسۋشىلار مەملەكەتتىك باسقارۋ وقۋ ورىندارىنىڭ وزەكتى ماسەلەلەرىن, ولاردىڭ ترانسفورماتسيالانۋى جولى مەن يننوۆاتسيالىق كوشباسشىلىعى جايىندى وي ءبولىستى. ال مەملەكەتتىك باسقارۋ سالاسىنداعى وزىق تاجىريبەمەن نيدەرلاندى, اقش, ءباا جانە باسقا ەلدەردەن كەلگەن ساراپشىلار پىكىر الماستى.
شارا بارىسىندا التى ەلدەن – قازاقستان, قىرعىزستان, تاجىكستان, تۇرىكمەنستان, وزبەكستان جانە اۋعانستاننان – تۇراقتى دامۋ ماقساتتارى بويىنشا ۇيلەستىرۋشىلەر, ۋاكىلەتتى ورگان وكىلدەرى مەن مەملەكەتتىك باسقارۋ بويىنشا ساراپشىلار مەملەكەتتىك ينستيتۋتتاردى دامىتۋ مەن قۇرىلىمدىق وزگەرىستەر جاساۋ جولدارى, مەملەكەتتىك قىزمەتكەرلەردىڭ كاسىبي بىلىكتىلىگىن ارتتىرۋ ماسەلەلەرىن قاراستىردى. بۇل الاڭ جان-جاقتى پىكىر الماسۋعا, يننوۆاتسيالىق يدەيالاردى جەتكىزۋگە جانە جاڭا ارىپتەستىككە جول اشادى.
سەمينار بارىسىندا قوناقتار حالىققا قىزمەت كورسەتۋ ورتالىعى جۇمىسىمەن جانە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ پرەزەنتاتسياسىمەن تانىسادى.
سەميناردى استانا مەملەكەتتىك قىزمەت حابى بۇۇ ەكونوميكا جانە الەۋمەتتىك ماسەلەلەر بويىنشا دەپارتامەنتى, بۇۇ دامۋ باعدارلاماسى ۇيىمداستىرىپ, پرەزيدەنت جانىنداعى مەملەكەتتىك باسقارۋ اكادەمياسى جانە «ازاماتتارعا ارنالعان ۇكىمەت» مەملەكەتتىك كورپوراتسياسى قولداۋىمەن وتۋدە.
سەمينار ءۇزىلىسى كەزىندە استانا مەملەكەتتىك قىزمەت حابى باسقارۋشى كوميتەت توراعاسى ءاليحان بايمەنوۆ ءوتىپ جاتقان شارا جونىندە جۋرناليستەرگە بىلاي تۇيىندەدى:
«بۇۇ باس اسسامبلەياسى بەكىتكەن ادامزاتتىڭ تۇراقتى دامۋ ماقساتتارى اياسىندا مەملەكەتتىك باسقارۋدىڭ ساپاسى وتە ماڭىزدى ءرول اتقارادى. سەبەبى 17 ماقساتتىڭ ءبارىن ۇيلەستىرۋشى ۇلتتىق ۇكىمەتتەر بولسا, سول ۇلتتىق ۇكىمەتتەردىڭ جۇمىس ساپاسى بۇل مەملەكەتتىك قىزمەتشىلەردىڭ بىلىكتىلىگىمەن دە انىقتالادى. وسى تۇرعىدان العاندا جالپى وسى ادامزاتتىڭ 2030 جىلعا دەيىن بەلگىلەنگەن مەجەلەرىنە جەتۋ ءۇشىن, ءبىز مەملەكەتتىك قىزمەتشىلەردىڭ دە بىلىكتىلىگىن كوتەرىپ, ولارعا وسى اتالعان ماقساتتاردىڭ ءبىر-بىرىمەن بايلانىسىن ءتۇسىندىرۋىمىز قاجەت. ادامزاتتىڭ ورتاق ماقساتتارىنا جەتۋ ءۇشىن بارلىق ۇكىمەتتەر بىرلەسىپ جۇمىس جاساۋ قاجەت ەكەنىن ءتۇسىنۋىمىز كەرەك. بۇل تۇرعىدان العاندا مەملەكەتتىك قىزمەتشىلەردىڭ بىلىكتىلىگىن جەتىلدىرىپ, ولاردى دايىندايتىن مەملەكەتتىك باسقارۋ اكادەميالارى, ينستيتۋتتارداعى ۇستازدار, ۇجىمدار وسى تۇراقتى دامۋ ماقساتتارىن تەرەڭىرەك ءتۇسىنىپ, مەملەكەتتىك قىزمەتشىلەرگە قانداي جاڭا ءبىلىم بەرۋ كەرەكتىگىن تالقىلاۋ قاجەت».
