ەلباسى كىتاپحاناسىنا باردى
ماسەلەن, باس قالاداعى №9 «زەردە» مامانداندىرىلعان مەكتەبىنىڭ 9-سىنىپ وقۋشىلارى ەلباسى كىتاپحاناسىنا بارىپ, ونداعى ارحيۆ, مۋزەي جانە كىتاپ جيناقتارىمەن تانىستى. سونداي-اق بالالار «قازاقستانداعى وليمپيادالىق قوزعالىس» ەكسكۋرسياcى جانە ينتەراكتيۆتى ايماق ايالداماسىندا وتكەن كۆەست-ەكسكۋرسياعا قاتىستى.
ەكسكۋرسيانى جۇرگىزگەن كىتاپحانا قىزمەتكەرى بوتاگوز اياپبەرگەنوۆا وقۋشىلارعا ەلباسى نۇرسۇلتان نازارباەۆتىڭ ەڭبەگىن تانىستىرا كەلىپ, ەلىمىزدىڭ سپورت سالاسىنداعى جەتىستىكتەرىنە توقتالدى. وسىدان كەيىن قازاقستاننىڭ وليمپيادا تاريحى تۋرالى تولىق اقپارات العان جاسوسپىرىمدەر كۆەست ويىنىن وينادى.
«ەكسكۋرسياعا وقۋشىلار بەلسەندى قاتىستى. تۇڭعىش پرەزيدەنتتىڭ بالالىق شاعى مەن ەڭبەك جولىنا, تاۋەلسىزدىك جىلدارىنداعى قۇندى جادىگەرلەرگە قانىققان بالالار ەلباسىنىڭ ەلەكتروندى كىتاپتارىن تاماشالادى. سپورت ساڭلاقتارىنىڭ جەتىستىكتەرىمەن تانىسقان وقۋشىلارعا كۆەست ويىندارى ءتىپتى دە قىزىق بولدى», دەيدى №9 «زەردە» مامانداندىرىلعان مەكتەبىنىڭ الەۋمەتتىك پەداگوگى كامشات تاسبولاتوۆا.
وسكەلەڭ ۇرپاققا ونەگە
ال №72 مەكتەپ-ليتسەيدە اتاۋلى مەرەكەگە وراي «ماڭگى وشپەس جارىق جۇلدىز» اتتى كەش ءوتتى. جيىنعا كورنەكتى كومپوزيتور, مەملەكەتتىك سىيلىقتىڭ لاۋرەاتى تولەگەن مۇحامەدجانوۆ پەن ونىڭ جارى, بەلگىلى وپەرا ءانشىسى, مەملەكەتتىك سىيلىقتىڭ لاۋرەاتى نۇرجامال ۇسەنباەۆا قاتىسىپ, وسكەلەڭ ۇرپاققا ونەگە بولارلىق ۇلاعاتتى اڭگىمە ايتىپ, اسەم اننەن شاشۋ شاشتى. كوشباسشى جولى مەن مۇراتى, ىنتىماعى مەن بىرلىگى جاراسقان بۇگىنگى قازاقستاننىڭ جاڭا كەلبەتى تۋرالى ءسوز قوزعادى.
– تاۋەلسىز قازاقستاننىڭ جاڭا داۋىرىندەگى حالىقتىق مەرەكەگە اينالعان تۇڭعىش پرەزيدەنت كۇنى – ەلىمىز ءۇشىن ەرەكشە ەلەۋلى ۋاقيعا. كورەگەن شەشىمى مەن حالىق ءۇشىن اتقارعان ەڭبەگى ۇشان-تەڭىز. ەڭ اۋەلى ەگەمەندىگىمىزدىڭ بەرىك ىرگەسىن قالاپ, شەكاراسىن شەگەلەپ, ەكونوميكا, ءبىلىم, مادەنيەت سالالارىن الدىڭعى قاتارعا شىعاردى. ونىڭ باسشىلىعىمەن قۇرىلعان ەل استاناسى ەل يگىلىگىنە ارقاۋ بولعان ديپلوماتيالىق ميسسيالاردىڭ ورداسىنا اينالدى. سوندىقتان كەلەر ۇرپاق ءۇشىن جاستىق ارمانعا قانات بىتىرەر وسىنداي ارناۋلى كۇننىڭ ماڭىزىن ايتۋ, ناسيحاتتاۋ وتە ماڭىزدى, – دەگەن ت.مۇحامەدجانوۆ بارشا قازاقستاندىقتاردى مەرەكەمەن قۇتتىقتادى.
ءدارىس وقىدى
س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ «قازاقستان تاريحى» كافەدراسىنىڭ اعا وقىتۋشىسى, تاريح عىلىمدارىنىڭ كانديداتى اينۇر جۇماعازىقىزى نۇر-سۇلتان قالاسىنداعى №3 مەكتەپ-گيمنازياسىنىڭ 9-11 سىنىپ وقۋشىلارىنا ەلباسىنىڭ دارا جولى جايلى ءدارىس وقىدى.
تاريحشى ەلباسىنىڭ ەڭبەگىنە وزگە ەلدەردىڭ باسشىلارىنىڭ بەرگەن باعاسىنا توقتالدى. «جاس ۇرپاققا تاربيە بەرۋ بارىسىندا ۇلگى بولارلىق تۇلعالار كوپ. مىسالى, ەلباسى ساياساتىنىڭ ارقاسىندا ەلىمىزدىڭ كوك بايراعى تالاي مارتەبەلى جيىندا جەلبىرەدى. تۇڭعىش پرەزيدەنت دەربەس مەملەكەت ەكەنىمىزدى الەم جۇرتشىلىعىنا تانىستىردى. ن.نازارباەۆتىڭ قازاقستاننىڭ دامۋىنا, ءوسىپ-وركەندەۋىنە قوسقان ۇلەسى زور. ءوزىنىڭ سارابدال ساياساتىنىڭ, پايىم-پاراساتى ارقىلى تاۋەلسىز ەلىمىزدىڭ كەرەگەسىن كەڭەيتىپ, كەلەشەگىن جارقىن ەتىپ, قيىن-قىستاۋ جولداردان شەبەر شەشىم قابىلداپ الىپ شىقتى», دەدى اينۇر جۇماعازىقىزى.
جيىن وقۋشىلاردىڭ دايىنداعان ادەبي-مۋزىكالىق كونتسەرتىمەن اياقتالدى.
ارماندار ورىندالادى
بالالاردىڭ تانىمىن كەڭەيتىپ, جىگەرلەندىرگەن وسىنداي يگى ءىس-شارانىڭ ءبىرى №63 مەكتەپ-گيمنازياسىندا ءوتتى. بۇل ساباققا مەكتەپ وقۋشىلارى دا تىڭعىلىقتى دايىندالىپ كەلىپتى.
اشىق ساباق «ارماندار ورىندالادى» دەپ اتالدى. بۇل رەتتە بالالارعا ەلباسىنىڭ دارا جولىن ۇلگى ەتە وتىرىپ, ءوز ارمانىنا جەتۋگە دەگەن جىگەرلەرىن جانيتىن بايىپتى اڭگىمە ءوربىدى. مەكتەپكە ارنايى كەلگەن بەلگىلى جۋرناليست دانيار ەسەن وسى تاقىرىپتا كەڭىنەن ءسوز قوزعادى.
– بالالارمەن سويلەسكەن قىزىق. ولار – شىنايى. ويىن بۇكپەسىز ايتادى. اتا-انالاردىڭ قاتەلىگى – بالالارىمەن ەمەن-جارقىن سويلەسە بىلمەيدى. بالاڭىزعا جاۋاپتى مەكتەپ تە, ينتەرنەت تە, تاربيەشى دە ەمەس, تەك ءوزىڭىزسىز! بالالارعا ارماندارى, وعان جەتۋ جولىندا قانداي ارەكەت كەرەكتىگى تۋرالى ايتتىم. ۇيىپ تىڭدادى. ويىن وينادىق. ءبىر-بىرىنە سۇراق قويدى. بۇل ءادىس جاپون پەداگوگيكاسىندا وڭ ناتيجە بەرگەن. جالپى, كەزدەسۋدەن العان اسەرىم ەرەكشە. بالالار ازداپ بولسا دا موتيۆاتسيا العان شىعار دەپ ويلادىم. بالالارمەن سويلەسىڭىزدەر. ەركەلەتىڭىزدەر. باۋىرىڭىزعا باسىڭىز. ولار سىزدەردىڭ ماحابباتتارىڭىزعا ءزارۋ, – دەدى ول.
دانيار ەسەن ءوزىن ىزگىلىك پەداگوگيكاسىنىڭ نەگىزىن قالاعان شالۆا اموناشۆيليگە ۇقساتاتىنىن ايتتى. سونداي-اق مەكتەپ قوناعى بالالارمەن كەزدەسۋگە ايەلى, وپەرا ءانشىسى گۇلنۇر ەرمانوۆانى دا ەرتىپ كەلدى. ول جىلى جۇزدەسۋدىڭ سوڭىندا ءان ايتىپ, وقۋشىلاردىڭ زەيىنىن كلاسسيكالىق انگە بۇردى.
ادام كاپيتالىن دامىتۋعا باسىمدىق بەردى
نۇر-سۇلتان قالاسىنداعى №77 مەكتەپ-گيمنازياسىندا وتكەن اشىق ساباق «جاسامپازدىقتىڭ 30 جىلى» تاقىرىبىندا ءوتتى. ەلباسىنىڭ ءومىرى مەن قىزمەت جولدارىنا شولۋ جاساي وتىرىپ, «مادەني مۇرا», «ماڭگىلىك ەل», «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» ءتارىزدى مەملەكەتتىك باعدارلامالارى مەن يدەيالارىنىڭ ماڭىزىن اشۋدى كوزدەگەن اشىق ساباققا «بولاشاق» باعدارلاماسى بويىنشا Amsterdam ۋنيۆەرسيتەتىن تامامداعان, نازارباەۆ ۋنيۆەرسيتەتىنىڭ ماگيسترانتى ءۋاليحان ديداربەكوۆ قاتىستى. قازاق, اعىلشىن, ورىس تىلدەرىندە قاتار وتكەن اشىق ساباقتا ۋ.ديداربەكوۆ: ء«ار مەملەكەتتىڭ باستى بايلىعى – ادام. ءبىزدىڭ ەل ءۇشىن دە ادام مەن ادامي كاپيتال ەڭ قىمبات قازىنا بولىپ ەسەپتەلەدى. ەلباسىنىڭ باستامالارى مەن باعدارلامالارىنىڭ بارلىعىندا دەرلىك ادام كاپيتالىن دامىتۋعا كوڭىل بولىنەدى. «بولاشاق» باعدارلاماسى دا ادام كاپيتالىن دامىتۋعا تەڭدەسسىز ۇلەس قوسقان باستامالاردىڭ ءبىرى. ەلباسىنىڭ وسىناۋ باعدارلاماسى ءبىزدىڭ ءبىلىم مەن بىلىكتىلىگىمىزدى ارتتىرىپ, ادام رەتىندە باسەكەلەستىككە قابىلەتىمىزدى جەتىلدىردى. ءبىزدىڭ ساپامىز ارتا ءتۇستى», دەدى.
تاۋەلسىزدىك جەمىسى
سونداي-اق №56 مەكتەپ-ليتسەيدە «ەلباسى مۇراتى – ءبىلىمدى ۇرپاق» اتتى كەزدەسۋ كەشىنە اقىن ەربول بەيىلحان مەن جازۋشى انار قابىلقاق قاتىستى.
«وقۋشىلاردىڭ بەلسەندىلىگى مەن بىلىمگە قۇشتارلىعى ۇنادى. بۇل قوعامدى العا سۇيرەيتىن قاسيەت. وقۋشىلار جوعارى دەڭگەيدە دايىندالعان ەكەن, ەلباسى ءومىرىن – بالالىق شاعى مەن قىزمەت جىلدارىن جۇپ-جۇمىر تەاترلاندىرىلعان كورىنىسكە سىيعىزىپ, شىنايى, سەنىمدى ساحنالاپ شىقتى. ولاردىڭ بەلسەندىلىگىن ارنايى ۇيىمداستىرىلعان ەسسە بايقاۋىنا قاتىسۋىنان دا كورۋگە بولادى. ءبىز جەڭىمپاز اتانعان ەكى وقۋشىنى ماراپاتتادىق. سونداي-اق كەزدەسۋ بارىسىندا وقۋشىلار قازىرگى اقىن-جازۋشىلار, ادەبيەتتىڭ دامۋ بارىسى, كىتاپ شىعارۋ جايىندا ءتۇرلى ساۋال قويدى. كوزىندە وتى بار, كوپ بىلەتىن, پىكىرىن اشىق ايتىپ, قىسىلماي سۇراق قويا الاتىن قازىرگى وقۋشىلار – تاۋەلسىزدىكتىڭ, دەموكراتيالىق قوعامنىڭ جەمىسى», دەيدى ا.قابىلقاق.
دايىنداعان «ەگەمەننىڭ» تىلشىلەر توبى
