سەسسيانىڭ باسىندا وبلىستىق قحا توراعاسىنىڭ قوعامدىق ورىنباسارلارى سايلاندى. دەلەگاتتاردىڭ ءبىراۋىزدان ماقۇلداۋىمەن بۇل وكىلەتتىكتەرگە قوعامدىق كەلىسىم كەڭەسىنىڭ توراعاسى, وبلىستىق ءماسليحاتتىڭ دەپۋتاتى بەكزات التىنبەكوۆ پەن «ۆايناح» چەشەن-ينگۋش ۇلتتىق-مادەني ورتالىعىنىڭ توراعاسى ۋۆايس دجاناەۆ يە بولدى.
القالى جيىن جۇمىسىنا قاتىسقان وبلىس اكىمى جەڭىس قاسىمبەك ەلباسىنىڭ قازاقستاندىق تابىستىڭ ءۇش كىلتىن انىقتاعانىن ەسكە سالدى.
– ونىڭ ءبىرىنشىسى – دەدى ءوڭىر باسشىسى, – ۇلتى مەن ءدىني سەنىمى ءارتۇرلى قازاقستاندىقتارعا قاجەت بىرلىك. ەكىنشىسى – بىزدەرگە جانە ارقايسىمىزعا ءتان توزىمدىلىك. ءۇشىنشىسى – تاريحي تاعدىردىڭ ورتاقتىعى جانە ورتاق بولاشاق.
سونىمەن قاتار, جەڭىس قاسىمبەك تاياۋدا نۇر-سۇلتان قالاسىندا ماراپاتتالعان قاراعاندىلىق مەتسەناتتاردىڭ ەڭبەگىن ەرەكشە اتاپ ءوتتى. ەسكە سالساق, قحا مۇشەلەرى, كاسىپكەرلەر يۆان گەورگيادي, شاميل وسين جانە «نامۋس» ازەربايجان ۇلتتىق-مادەني ورتالىعىنىڭ جەتەكشىسى گۋلاگا ۆەكيل-وگلى رزاەۆ قايىرىمدىلىقپەن بەلسەندى تۇردە اينالىسقاندارى ءۇشىن ارنايى جۇلدەلەرگە يە بولعان-تۇعىن.
اتالعان سەسسيادا ءسوز العان ليتۆادان كەلگەن قوناق, ۆيلنيۋس ۋنيۆەرسيتەتىنىڭ پروفەسسورى, ساۋلەتشى الگيس ۆيشنيۋناس ءوزىنىڭ وتانىندا ەلباسىنىڭ تاريحي جادىنى ساقتاۋعا جانە ەلدەر اراسىنداعى دوستىقتى نىعايتۋعا قوسقان ۇلەسىنىڭ ەرەكشە باعالاناتىنىن ايتتى. «بقعان دالەل – نۇرسۇلتان نازارباەۆتىڭ ليتۆا ۇلى كنيازى گەديميناس وردەنىمەن ماراپاتتالۋى», دەدى قۇرمەتتى قوناق.
سونىمەن قاتار, القالى جيىندا وبلىستىق ەتنومادەني بىرلەستىكتەردىڭ جەتەكشىلەرى ءسوز سويلەپ, ەلباسى ساياساتىنىڭ دانالىعى مەن ەلدەگى بەيبىتشىلىك پەن كەلىسىمدى نىعايتۋعا ىقپال ەتەتىن ماڭىزدى شەشىمدەر تۋرالى باياندادى. سونداي-اق, ارىس قالاسىنا جارىلىستان زارداپ شەككەندەرگە ءوز ەركىمەن بارىپ كومەك كورسەتكەن قاراعاندىلىق ەۆگەني حيسمەتوۆ ازاماتتاردى ەرىكتىلەر قاتارىنا كىرۋگە شاقىردى. شەت اۋدانىنىڭ جاستار بەلسەندىسى ەۆگەني يانكە «رۋحاني جاڭعىرۋ» باعدارلاماسى يدەيالارىنىڭ قۇندىلىعى جايىندا تازا قازاق تىلىندە پايىمدى پىكىر ايتتى.
قازاقستان حالقى وبلىستىق اسسامبلەياسىنىڭ ءححىى سەسسياسىنىڭ سوڭىندا وبلىس اكىمى جەڭىس قاسىمبەك ەتنومادەني بىرلەستىكتەردىڭ باسشىلارىنا سىي-سياپات كورسەتتى.
