30 قاراشا كۇنى نۇر-سۇلتان قالاسىندا قازاقستاننىڭ ۇلتتىق وليمپيادا كوميتەتى جىلدى قورىتىندىلاپ, «Altyn Samgay-2019» ۇلتتىق سپورت سىيلىعىن تابىستادى.
قاراشا ايىنىڭ 15-ءى مەن 30-ى ارالىعىندا awards.olympic.kz سايتىندا ءارتۇرلى اتالىمدار بويىنشا ۇمىتكەرلەرگە داۋىس بەرۋ جۇرگىزىلدى.
ەكى اپتا ىشىندە ەلىمىزدىڭ سپورتسۇيەر قاۋىمىمەن 820 مىڭ داۋىس بەرىلىپ, ساراپتاۋدان ءوتتى.
داۋىس بەرۋ ناتيجەسىندە, 2019 جىلعى «ۇزدىك جاس سپورتشى» بولىپ چيليدە وتكەن جاستار اراسىنداعى WKF نۇسقاسى بويىنشا كاراتەدەن الەم بىرىنشىلىگىنىڭ جۇلدەگەرى - ءابىلمانسۇر باتىرعالي تانىلدى.
اتىراۋلىق سپورتشى ءوز اتالىمىندا 5633 داۋىس جيناپ, جامبىل وبلىسىنىڭ تۋماسى, دزيۋدوشى نۇرقانات سەرىكباەۆتى باسىپ وزدى.
سپورتشىنىڭ اتا-اناسى ابىلمانسۇرعا قولداۋ بىلدىرگەن جانكۇيەرلەرى مەن ونىڭ جەتىستىكتەرىن مويىنداعان بارشاعا العىس ءبىلدىردى.
- وتكەن جىلى ءابىلمانسۇرىمىز اتىراۋ وبلىسىنىڭ ۇزدىك جاس سپورتشىسى اتانىپ ەدى, بيىل ونى قازاقستاننىڭ ۇزدىك جاس سپورتشىسى دەپ تانىپ وتىر. بويىمىزدى قۋانىش پەن ماقتانىش كەرنەپ بارادى. بالامىزعا داۋىس بەرىپ, وعان قولداۋ بىلدىرگەن بارشاعا, ودان بولەك «قايسار» سپورت كلۋبىنىڭ جاتتىقتىرۋشىلار قۇرامىنا ەرەكشە العىس بىلدىرەمىز, - دەيدى ءابىلمانسۇر باتىرعاليدىڭ اكەسى.
ەستەرىڭىزگە سالا كەتەيىك, «قايسار» سپورت كلۋبىنىڭ شاكىرتى ءابىلمانسۇر باتىرعالي بىلتىر وتكەن جاستار اراسىنداعى وليمپيادا ويىندارىنىڭ قولا جۇلدەگەرى اتانعان ەدى. وسى جەتىستىك ونىڭ جىگەرىن جانىپ, جاڭا بەلەستەردى باعىندىرۋىنا ۇلكەن ىنتا بەردى.
- كەلەر جىلى «قايسار» سپورت كلۋبىنىڭ قۇرىلعانىنا 30 جىل تولادى. العاشىندا «گەولوگتاعى» سپورتزالدا كىشكەنتاي عانا سەكتسيا بولىپ باستاپ, بۇگىندە اتىراۋ قالاسىنىڭ جاس ورەندەرىن عانا ەمەس, وبلىستىڭ شالعاي اۋىلدارىنداعى دا جاس سپورتشىلاردى دايىندايتىن ۇلكەن سپورت كلۋبىنا اينالدىق. ء بىزدىڭ كلۋب وليمپيادا جۇلدەگەرىن, كاراتە مەن مۋاي-تايدان الەم چەمپيوندارىن, ونىڭ ىشىندە ءابىلمانسۇر باتىرعاليدى دا تاربيەلەپ شىعارعانىن ماقتان تۇتامىن. قاي-قاي شاكىرتىمىز دە قازاقستاننىڭ كوك بايراعىن الەمنىڭ قاي سپورت دوداسىندا دا ابىرويمەن الىپ جۇرگەنىن ماقتانىش تۇتامىن, - دەيدى سپورتتىق جانە ءداستۇرلى كاراتە مەن مۋاي-تاي وبلىستىق فەدەراتسيالارىنىڭ ۆيتسە-پرەزيدەنتى, «قايسار» سپورت كلۋبىنىڭ جەتەكشىسى ايبات راحمان.
بۇگىندە «قايسار» سپورت كلۋبىنىڭ جۇمىسى اتىراۋ وبلىستىق اكىمدىگىنىڭ قولداۋىنا يە. جەرگىلىكتى اتقارۋشى بيلىكتىڭ قارجىلىق قولداۋىنىڭ ارقاسىندا سپورت كلۋبى ەلىمىز بەن الىس-جاقىن شەتەلدەردىڭ شەبەرلەرىن شاقىرىپ, قالالىق, وبلىستىق, قالا بەردى رەسپۋبليكالىق دەڭگەيدەگى سەمينارلار مەن جارىستار وتكىزىپ كەلەدى. جەرگىلىكتى بيۋدجەتتەن سپورتشىلاردىڭ حالىقارالىق تۋرنيرلەر مەن جارىستارعا بارۋى دا قارجىلاندىرىلادى. وسىدان بىرنەشە جىل بۇرىن «قايسار» كلۋبى نۇرسايا ىقشام اۋدانىندا سپورت زالعا ارنالعان جاڭا عيماراتقا قول جەتكىزگەن ەدى.
