بۇل رەتتە سورعى ستانسالارىن ورناتىپ, سۋارمالى القاپتى كوبەيتۋدى قولعا العان شارۋاشىلىقتارعا مەملەكەت تاراپىنان قولداۋ دا بار.
- كوكونىستىڭ ءتۇر-ءتۇرى مەن مالعا قاجەت ازىق ساپاسىن جاقسارتۋ ءۇشىن وبلىس اۋماعىنداعى 70 مىڭ گەكتار جەر سۋارىلادى. بيىل تاعى 30 گەكتار سۋارمالى ەگىستىك اينالىمعا ەنگىزىلدى. جوسپار بويىنشا 2022 جىلى بۇل كورسەتكىش 145 مىڭ گەكتارعا جەتەدى, - دەدى وبلىس اكىمى بولات باقاۋوۆ باق وكىلدەرىمەن بولعان بريفينگ بارىسىندا.
ءوڭىر بويىمەن وتەتىن ەرتىس وزەنى وبلىستىڭ 3 قالاسى مەن 7 اۋدانى اۋماعىنان ءوتىپ, شارۋالاردىڭ سۋارمالى ءادىستى قولدانۋىنا مۇمكىندىك بەرۋدە.
ال, «ەرتىس-قاراعاندى» سۋ ارناسى ارقىلى 40 مىڭ گەكتار جەردى سۋارمالى القاپقا اينالدىرۋ جوسپارلانۋدا.
ياعني, ەكىباستۇز, اقسۋ قالالارىنا قاراستى اۋىلدىق اۋماق تۇرعىندارى ءۇشىن كوكونى وسىرۋگە جاقسى جاعداي جاسالماق.
سونىمەن بىرگە «ەرتىس-ۋسپەن» سۋ ارناسىنىڭ جۇمىسى قايتا جاندانعان سوڭ, 10 مىڭ گەكتار جەر سۋارمالى القاپقا اينالماق.
وڭىردەگى پاۆلودار اۋدانى سۋارمالى جەرلەردى اينالىمعا ەنگىزۋ كورسەتكىشى بويىنشا ۇزدىك اتاندى.
اۋداندا 12 400 گەكتار سۋارمالى القاپ بار. بيىل 620 گەكتار سۋارىلا باستاسا, كەلەسى جىلى 1500 گەكتار اينالىمعا ەنگىزىلمەك. اۋدان كولەمىندە 140 شارۋاشىلىق سۋارۋ ءادىسىن قولدانادى.
سولاردىڭ ءبىرى – «اڭداس» شارۋا قوجالىعى.
- ءبىز 20 جىلعا جۋىق ۋاقىت بويى ەرتىس وزەنىنىڭ سۋىن پايدالانىپ كەلەمىز. بۇگىندە شارۋاشىلىقتىڭ يەلىگىندە 1500 گەكتار سۋارمالى جەر بار. كەلەسى جىلى تاعى 700 گەكتاردى قوسۋدى كوزدەپ وتىرمىز. سەبەبى, سۋارىلاتىن القاپتىڭ ونىمدىلىگى جوعارى, - دەيدى قوجالىق باسشىسى زەينوللا سالمەنباەۆ.
پاۆلودار وبلىسى
