بۇگىندە اتالعان تاۋ شاڭعى بازاسىنىڭ قۇرىلىس جۇمىستارىنىڭ 85 پايىزى اياقتالعان. سونىمەن قاتار مۇندا قوناقۇي كوتتەدجدەرى مەن تۋريستەرگە قىزمەت كورسەتەتىن سەرۆيستىك كەشەننىڭ قۇرىلىسى سالىنۋدا. سونداي-اق جەتى شاقىرىمدىق جول سالىنىپ, ينفراقۇرىلىم تارتۋ جۇمىستارى دا ءوز دەڭگەيىندە جۇرگىزىلۋدە. وعان قاجەتتى قۇرال-جابدىقتاردىڭ دەنى جەتكىزىلگەن. قۇرىلىس باسىندا 100-دەن استام جۇمىسشى مۇنداعى قىستىڭ قاتالدىعىنا قاراماستان, كۇن-ءتۇن دەمەي بىلەك سىبانا ەڭبەك ەتۋدە.
ايتا كەتۋ كەرەك, مۇنداعى دەمالىس كەشەنىندە قوناقتار جىلدىڭ ءتورت مەزگىلىندە دە دەمالۋعا مۇمكىندىك الادى. كەلۋشىلەردى جاز مەزگىلدەرىندە ساۋمالمەن, قىمىزبەن ەمدەيتىن, اتپەن سەرۋەن قۇراتىن ورىندار اشىلادى دەپ كۇتىلۋدە. جالپى, نىسان مەملەكەتتىك-جەكەمەنشىك ارىپتەستىك نەگىزىندە سالىنۋدا. جوبانىڭ جالپى قۇنى 4 ميلليارد تەڭگە. تۋريستىك نىسان حالىقارالىق «باتىس ەۋروپا-باتىس قىتاي» كۇرەجولىنىڭ بويىنان 7 شاقىرىم قاشىقتىقتا, الاتاۋدىڭ باۋرايىندا تەڭىز دەڭگەيىنەن 1600 مەتر بيىكتىكتە ورنالاسقان. سونىمەن قاتار الاتاۋدىڭ ۇشار باسىنان كەشەنگە دەيىن 2 500 مەتر سىرعاناۋ جولاعى تۇسكەن. سول سياقتى 2050 جانە 350 مەترلىك اسپالى جولداردىڭ قۇرىلىستارى دا جۇزەگە اسىرىلۋدا. اسپالى جول قۇرىلىسىنا قاجەتتى قوندىرعىلار مۇندا اۆستريا ەلىنەن جەتكىزىلگەن.
سونىمەن جۋالى اۋدانىنداعى «قاراالما» تاۋ شاڭعى بازاسى الداعى جەلتوقسان ايىندا پايدالانۋعا بەرىلەدى. جامبىل وبلىسىنىڭ اكىمى اسقار مىرزاحمەتوۆ اۋدانعا ارنايى بارىپ, جاۋاپتىلارعا مۇنداعى بارلىق جۇمىستاردى ساپالى اتقارۋدى, 350 مەترلىك اسپالى جولدىڭ مونتاجداۋ, ورناتۋ شارالارىن اعىمداعى جىلى 16 جەلتوقسانعا دەيىن اياقتاۋدى تاپسىردى. ال, ۇزىندىعى 2 مىڭ مەتردەن اساتىن اسپالى جولدىڭ قۇرىلىسىن ءبىر-ەكى ايدا تولىعىمەن ءبىتىرۋ كەرەكتىگىن دە ايتتى.
