كونفەرەنتسياعا زاڭگەر عالىمدار, ۇستازدار, الماتى قالالىق پروكۋراتۋرا, ادىلەت دەپارتامەنتى وكىلدەرى مەن قۇقىق قورعاۋ ورگاندارى ماماندارى, «زاڭ گازەتى» جانە «يۋريديچەسكايا گازەتا» باسىلىمدارىنىڭ العاشقى جانە كەيىنگى رەداكتورلارى, باق وكىلدەرى قاتىستى.
العاشقى ساندارى 1994 جىلى 3 قاراشادان باستاپ جارىق كورگەن «زاڭ» گازەتى مەن «يۋريديچەسكايا گازەتا» ەلىمىزدەگى العاشقى رەسپۋبليكالىق قۇقىقتىق باسىلىمدار. كونفەرەنتسيا بارىسىندا گازەتتەردىڭ وتكەنى مەن بۇگىنى, قۇقىقتىق باسىلىمنىڭ قۇقىقتىق مەملەكەت قالىپتاستىرۋداعى ءرولى, گازەت-جۋرنالداردىڭ قازىرگى تاڭداعى حال-احۋالى مەن ءسوز بوستاندىعى جانە وزگە دە وزەكتى تاقىرىپتار كەڭىنەن تالقىلانىپ, باياندامالار جاسالدى. 25 جىلدان بەرى ەلىمىزدىڭ ساياسي, الەۋمەتتىك, ەكونوميكالىق, مادەني, ەڭ باستىسى – قۇقىقتىق ومىرىندەگى تاقىرىپتاردى ارقاۋ ەتكەن ماقالالار "زاڭ گازەتى" مەن "يۋريديچەسكايا گازەتا" باسىلىمدارىنىڭ تۇراقتى وقىرماندارىن قالىپتاستىرىپ, قازاقستاندىق جۋرناليستيكا سالاسىندا ءوز ورنىن ايشىقتاپ بەردى. جۇرتشىلىقتى قۇقىقتىق رەفورمانىڭ جۇرگىزىلۋ بارىسىمەن تانىستىرىپ, حالىقتىڭ قۇقىقتىق ساناسىن ارتتىرىپ, زاڭدى بىلۋىنە اتسالىستى.
پارلامەنت ماجىلىسىندە تالقىلانىپ جاتقان ءاربىر زاڭدى گازەت بەتىندە ساراپقا سالىپ, تاۋەلسىزدىكتىڭ العاشقى جىلدارى زاڭ تەرميندەرىنىڭ قالىپتاسۋىنا ىقپال ەتكەن باسىلىم جىل وتكەن سايىن قاناتىن كەڭ جايىپ كەلەدى. ۋاقىت وتە «زاڭ» جانە «فەميدا» جۋرنالدارىمەن قاتارى تولىققان كورپوراتسيا ۋاقىت كوشىنەن قالماي, Zanmedia.kz سايتىن دا ومىرگە اكەلدى. ادىلدىك ىزدەگەن تالاي جاننىڭ ارىز-شاعىمدارىن ءتيىستى ورىندارعا جەتكىزىپ, زاڭدى شەشىمىن تابۋىنا ىقپال ەتىپ كەلە جاتىر.
گازەتتىڭ العاشقى رەداكتورى مارات توقاشباەۆ: «بۇگىندە ەلىمىزدىڭ بۇقارالىق اقپارات كەڭىستىگىندە ءوز ورنى بار وسىناۋ باسىلىمدى قۇرۋعا, العاشقى نومىرىنەن باستاپ گازەتتى ءۇش جىل باسقارۋ باقىتى ماعان ءناسىپ بولىپتى. بۇل باسىلىمنىڭ دۇنيەگە كەلۋىنە مۇرىندىق بولعان, قيىن ساتتەردىڭ بارىندە قول ۇشىن بەرىپ وتىرعان ەلىمىزدەگى قۇقىقتىق رەفورمالاردىڭ اتاسى, تاۋەلسىز قازاقستاننىڭ تۇڭعىش ادىلەت ءمينيسترى, كورنەكتى زاڭگەر, مارقۇم ناعاشىباي شايكەنوۆ ەدى. دەموكراتيانىڭ اتاسى سانالاتىن توماس دجەففەرسون «تابيعات زاڭدارىنا قايشى زاڭدار قابىلداۋ – ارتىنان ءوزىمىز ولاردى جازالايتىنداي قىلمىستار تۋعىزۋ» دەگەن ەكەن. گازەت ءوز قىزمەتىندە مەملەكەتتى تەك حالىققا پايدالى زاڭدار قابىلداۋگا شاقىردى. ءار ازاماتتى ءوز قۇقىعىن بىلۋگە ۇندەدى. قۇقىقتىق تۇرعىدان شولىركەگەن وقىرمانعا قۇقىقتىق كاۋسارلاردان ءدام تاتۋعا مۇمكىندىك بەردى» دەيدى.
الماتى
