ايماقتار • 29 قاراشا، 2019

جامبىلدىق شارۋالار قوي ەتى ەكسپورتىنا ۇلەس قوسادى

139 رەتكورسەتىلدى

بۇگىنگى تاڭدا اۋىل شارۋاشىلىعىنا ەرەكشە كوڭىل ءبولىنىپ كەلەدى. اسى­رەسە مال شارۋاشىلىعىمەن اينالىسامىن دەۋشىلەر ءۇشىن مەم­لە­كەتتىك باعدارلامالار ارقىلى جەڭىلدىكپەن نەسيەلەر بەرىلىپ، سا­لا­نى دامىتۋدىڭ مۇمكىندىكتەرى جان-جاقتى قاراستىرىلعان. ماسە­لەن جامبىل وبلىسىندا قوي شارۋاشىلىعىن قولعا العان شارۋا­لار كوپ. ولار دا مەملەكەتتىڭ قولداۋىنا قول جەتكىزىپ وتىر. «قازاگرو» حولدينگىنىڭ ەنشىلەس ۇيىمدارىنىڭ ءبىرى «اۋىل شارۋا­شىلىعىن قارجىلاي قولداۋ قورى» اق مال شارۋاشىلىعىن قول­داۋعا باعىتتالعان نەسيەلەۋ باعدارلامالارىن جۇزەگە اسىرىپ كەلەدى. جەڭىلدىكپەن بەرىلەتىن نەسيە قارجىسىنا شاعىن شارۋا­شى­لىقتار ءىرى قارا، ۇساق مال، جىلقى، قۇس، بال ارالارىن ساتىپ الا الادى.

جامبىل وبلىسى جۋالى اۋدانىنا قاراستى قىزىلتام قىستاعىنداعى «دياس» شارۋا قوجالىعىنىڭ باسشىسى ءمول­دىر بايساقالوۆا اۋىل شارۋاشى­لىعىن قارجىلاي قولداۋ قورىنان «سىباعا» باعدارلاماسىمەن نەسيە الىپ، قوي شارۋاشىلىعىمەن اينالىسۋعا مىقتاپ كىرىسكەن. ءمول­­دىر­دىڭ ماماندىعى قارجىگەر بول­­عانىمەن، جەكە كاسىپپەن اينا­لىسقاندى ءجون كورىپ، قوي شارۋا­شىلىعىن دامىتۋدى قولعا العان ەكەن.

مال باعۋ ءۇشىن باسقا دا تۇر­­مىستىق جاعدايلاردى جاقسارتىپ الۋ ماڭىزدى ەكەنىن ەسكەرگەن شارۋا الدىمەن مال قوراسىن تالاپقا ساي سالعان، مەملەكەتتىك قولداۋ ارقىلى قۇدىق قازىپ، سۋ تارتقان جانە كۇننەن قۋات الاتىن پانەلدەردى دە ورناتىپ قويعان. ەكى ادامدى جۇمىسپەن قامتىپ وتىرعان شارۋاشىلىق باسشىسىنىڭ العا قويعان جوسپارلارى دا اۋقىمدى. مالىنىڭ سانىن كوبەيتىپ، قوي ەتى ەكسپورتىنا ۇلەس قوسپاق. ول ءۇشىن ەت ەكسپورتىمەن اينالىساتىن «وڭتۇستىك حالال تاعامدارى» جاۋاپ­كەرشىلىگى شەكتەۋلى سەرىك­تەس­تىگىمەن كەلىسىمشارتقا وتىرىپ تا قويىپتى. كەلەر جىلى مالىنىڭ ءتولى جەتىلگەن سوڭ، وسى مەكەمەگە ەتىن وتكىزۋدى جوسپارلاپ وتىر. قارت قاراتاۋدىڭ ەتەگىنەن ورىن تەپكەن شارۋاشىلىقتىڭ جەرى شۇرايلى بولعاندىقتان ساپالى ەت تاپسىرا الاتىنىنا بەك سەنىمدى.

5

«اۋىل شارۋاشىلىعىن قار­جىلاي قولداۋ قورىنان «سىباعا» باعدارلاماسى ارقىلى 6،5 جىلعا 6 پايىزبەن 10 ملن تەڭگە نەسيە راسىمدەپ، وعان 260 باس قوي مەن 9 قوشقار جانە مالدىڭ جەم-ءشوبىن ساتىپ الدىم. «مال وسىرسەڭ قوي ءوسىر، تابىسى ونىڭ كول-كوسىر» دەگەن ءسوز بار عوي. سول ايتقانداي، قوي شارۋاشىلىعى مول تابىس تابۋعا بولاتىن سالا دەپ ەسەپتەيمىن. ارينە مال باعۋ، ءوسىرۋ دەگەن قاجىرلى ەڭبەكتى قاجەت ەتەدى. ءار جۇمىستىڭ ءوز بەينەتى بار، سوعان وراي  زەينەتى دە بولادى. سوندىقتان جۇمىستان قورىقپاۋ كەرەك. ادال ەڭبەككە نە جەتسىن؟ الداعى ۋاقىتتا وسى مالىمدى كوبەيتىپ، ەت ەكسپورتىنا ۇلەس قوسامىن دەگەن جوسپارىم بار»، دەي­دى قوجالىق باسشىسى ءمولدىر بايساقالوۆا.

ال جامبىل اۋدانىنىڭ ەرنا­زار اۋىلىنا قاراستى بوگوتكەل قىس­تاعىن جايلاعان جەكە كاسىپكەر اق­جول تەڭگە­باەۆ ون جىلدان بەرى مال شارۋاشى­لىعىمەن اينالىسىپ كەلەدى ەكەن. كەيىنگى جىلدارى تەك قوي شارۋاشىلىعىنا دەن قويىپتى.

«اعايىن تاتۋ بولسا – ات كوپ» دەگەن قاعيدانى ۇستانعان شارۋا ءىنىسى ەكەۋى جاڭادان قىستاق سالىپ، ۇساق مالدىڭ سانىن مىڭعا جەتكىزۋ جولىندا ايانباي ەڭبەك ەتىپ جاتىر. اۋىل شارۋاشىلىعىن قارجىلاي قولداۋ قورىنان «يگىلىك» باعدارلاماسى ارقىلى 4 ملن  تەڭگە نەسيە العان ول 110 باس ساۋلىق پەن 4 قوشقار ساتىپ العان ەكەن. ءوز مالىن قوسقاندا قازىر قوراسىندا 500-دەن استام قوي تۇر.

«ەڭبەك ەتەمىن دەگەن ادامعا مەملەكەت تاراپىنان قولداۋ كوپ. تەك كوپتەگەن ازاماتتار سول قول­داۋلاردى بىلمەي جاتادى. مەن دە ماڭايىمداعى مالشىلاردان ەس­تىپ، «باستاۋ بيزنەس» جوباسىمەن بيزنەس نەگىزدەرىنە وقىدىم، قۇجاتتارىمدى تالاپقا ساي ەتىپ جينادىم. ەش قيىندىقسىز نەسيەگە قول جەتكىزىپ، مالىمنىڭ سانىن ەسەلەپ وتىرمىن. ەندى وسى العان 4 ملن تەڭگەنى ۋاقىتىنان بۇرىن قايتارسام، تاعى قوي ساتىپ الۋ ءۇشىن «سىباعا» باعدارلاماسى ارقىلى 12 ملن تەڭگە نەسيە الامىن»، دەيدى ا.تەڭگەباەۆ.

ايتا كەتەيىك، اۋىل شارۋاشى­لىعىن قارجىلاي قولداۋ قورى­نان «ەڭبەك» مەملەكەتتىك باعدار­لا­ماسى اياسىندا «سىباعا» نەسيە ءونىمى ار­قىلى قوي شارۋاشى­لى­عىنا 12 ملن تەڭگەگە دەيىنگى نەسيە 6،5 جىلعا
6%-بەن بەرىلەدى. 2 جىلعا دەيىنگى جەڭىلدىك مەرزىمى قاراستىرىلعان. سونداي-اق «يگىلىك» نەسيە ءونىمى ارقىلى 6%-بەن 4 ملن تەڭگەگە دەيىن نەسيە بەرىلەدى جانە 9 اي جەڭىلدىك مەرزىمى بار.

اۋىل شارۋاشىلىعىن قار­جى­لاي قولداۋ قورىنىڭ جام­بىل وبلىسىنداعى فيليالى بيىل «سىباعا» مەن «يگىلىك» باع­دار­لامالارى ارقىلى 374 شارۋاعا 2،2 ملرد تەڭگە نەسيە بەرگەن بولاتىن. بۇل قارجىعا شارۋالار 48 مىڭنان استام قوي ساتىپ الدى.

بيىل قوردىڭ قۇرىلعانىنا – 25 جىل. وسى ۋاقىت ارالىعىندا جالپى سوماسى 312 ملرد تەڭگە بولاتىن 152 مىڭ نەسيە بەرىلدى. بيىلعى كورسەتكىش بويىنشا بارلىق باعىتتاردى قامتىعاندا 53،2 ملرد تەڭگەنى قۇرايتىن 12 مىڭ جوبا قارجىلاندىرىلدى.

 

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار