ەۋروپالىق وداق ۇيىمداستىرعان شارا قازاقستان, قىرعىزستان, تاجىكستان, تۇركمەنستان جانە وزبەكستان اراسىنداعى ءوزارا ايماقتىق ءىس-قيمىلدى نىعايتۋعا مۇمكىندىك بەرەدى. شارا 2019 جىلعى 17 ماۋسىمدا ەۋروپالىق وداقتىڭ ورتالىق ازيا جونىندە قابىلداعان جاڭا ستراتەگياسى اياسىندا ءوتىپ وتىر.
كونفەرەنتسيانىڭ ءبىرىنشى كۇنى جالپى بيۋدجەتى 28 ملن ەۋرو بولاتىن ەۋروپالىق وداق قارجىلاندىرىپ وتىرعان كوپ جىلعى كولەمدى ءۇش باعدارلامانى ىسكە اسىرۋ باستالعانى رەسمي تۇردە جاريالاندى. ولار ورتالىق ازيا ەلدەرىندەگى ساۋدانى, زاڭ ۇستەمدىگىن, ينۆەستيتسيالار مەن ەكونوميكا ءوسىمىن قولداۋعا باعىتتالعان.
ەۋروپالىق وداقتىڭ ەلشىسى سۆەن-ولوۆ كارلسسوننىڭ, ەۋروپا كەڭەسى باعدارلامالارى جونىندەگى باس ديرەكتور كەڭسەسىنىڭ باسشىسى ۆەرەنا تەيلوردىڭ, حالىقارالىق ساۋدا ورتالىعى مەملەكەتتەر باعدارلامالارى بولىمشەسىنىڭ باسشىسى اشيش شاح جانە ەىدۇ ەۋرازيا ەلدەرىمەن جۇمىس بولىمشەسىنىڭ باسشىسى ۋيليام تومپسوننىڭ قاتىسۋىمەن اتالعان ءۇش باعدارلاماعا قول قويۋ ءراسىمى بولدى.
رەسمي شارادان كەيىن مينيسترلەردىڭ دەڭگەيىندە ساراپتامالىق تۇرعىدا پىكىر الماسىلدى. وندا ەۋروپالىق وداقتىڭ ورتالىق ازيا جونىندەگى جاڭا ستراتەگياسىنىڭ مىندەتتەرى, سونداي-اق ەۋروپالىق وداق ايماعى مەملەكەتتەرىنىڭ باسشىلارى, ولاردىڭ سەرىكتەستەرى جانە جەكەمەنشىك سەكتوردىڭ وكىلدەرى جوسپاردان ناقتى ارەكەتكە كوشۋىنە قاجەتتى قابىلداناتىن ناقتى شارالار تالقىلاندى. پىكىرسايىسقا قاتىسۋشىلار, ونىڭ ىشىندە ەكونوميكا جانە ادىلەت مينيسترلەرى مەن ولاردىڭ ورىنباسارلارى ورتالىق ازيا مەملەكەتتەرىنىڭ ينۆەستيتسيا تارتۋ جانە ورنىقتى ءارى ءبارى قامتىلاتىن ءوسۋدى قامتاماسىز ەتۋگە قاتىستى باسىمدىقتارى ماسەلەسىن قوزعادى, ايماقتىق جانە حالىقارالىق ساۋدا ينتەگراتسياسىن كۇشەيتۋ جوسپارلارى جانە زاڭ ۇستەمدىگىن نىعايتۋ جولىندا جاڭادان قابىلدانعان شارالار تۋرالى ايتىپ بەردى.
كونفەرەنتسيانىڭ ەكىنشى كۇنى ەۋروپالىق وداقتىڭ «ورتالىق ازيا ينۆەست» ايماقتىق باعدارلاماسىنا ارنالادى.
