تاراز قالالىق اكىمدىگىنىڭ مالىمەتىنشە, پاتەرلەر 3 بولمەدەن جوعارى, كولەمى 60-90 شارشى مەتردەن كەم ەمەس. سونداي-اق ءار پاتەردىڭ قۇنى 8 ميلليون 400,0 مىڭ تەڭگەدەن اسپايدى.
قازىرگى تاڭدا پايدالانۋعا بەرىلگەن تۇرعىن ءۇي كولەمىنىڭ جالپى اۋماعى 217,7 مىڭ شارشى مەتردى نەمەسە ناقتى كولەم يندەكسى 109,8 پايىزدى قۇراعان. ەسەپتى كەزەڭدە قالا بويىنشا 18 568 ادام تۇرعىن ءۇي كەزەگىندە تۇر ەكەن. ونىڭ ىشىندە كوپ بالالى وتباسىلار 1784, 29 جاسقا تولماعان جەتىم جانە اتا-اناسىنىڭ قامقورىنسىز قالعان بالالار 1953, الەۋمەتتىك جاعىنان قورعالاتىن توپتار 8955 جانە مەملەكەتتىك, بيۋدجەتتىك جانە اسكەري قىزمەتكەرلەر 5876 ادام بولىپ وتىر.
سونىمەن قاتار بۇگىندە تاراز قالاسىنداعى ى.سۇلەيمەنوۆ كوشەسىنىڭ سوڭىنداعى تۇرعىن القاپتا رەسپۋبليكالىق بيۋدجەت ەسەبىنەن جارتىلاي ارەندالىق جانە جارتىلاي از قامتىلعان كوپبالالى وتباسىلار ءۇشىن 80 پاتەرلى 4 تۇرعىن ۇيلەردىڭ جانە وبلىستىق بيۋدجەت ەسەبىنەن 80 پاتەرلى 1 ارەندالىق تۇرعىن ءۇيدىڭ قۇرىلىسى جۇرگىزىلۋدە. سونداي-اق اتالعان القاپتا, جەرگىلىكتى اتقارۋشى ورگانداردىڭ وبليگاتسيالار شىعارۋ جولىمەن 60 پاتەرلى 11 كرەديتتىك ۇيلەردىڭ قۇرىلىستارى جۇرگىزىلىپ جاتسا, ونىڭ 3-ەۋى اعىمداعى جىلى ىسكە قوسىلاتىن بولادى. ال, قالعان 8 ءۇي كەلەسى جىلعا وتپەلى بولىپ تابىلادى.
بۇدان بولەك, «اراي» تۇرعىن ءۇي القابى مەن «قاراسۋ» مولتەكاۋدانىندا كەزەكتە تۇرعان كوپبالالى انالارعا ارنالعان 45 پاتەرلى 8 شاعىن جاتاقحانالاردىڭ قۇرىلىسى وبلىستىق بيۋدجەت ەسەبىنەن قارجىلاندىرىلعان. اعىمدى جىلى 6 جاتاقحانانى پايدالانۋعا بەرۋ كوزدەلسە, قالعان 2 جاتاقحانا كەلەسى جىلعا وتپەلى.
