ء«ىس-شاراعا پارلامەنت ءماجىلىسىنىڭ دەپۋتاتتارى, ورتالىق مەملەكەتتىك ورگانداردىڭ, اكىمدىكتەر مەن ارداگەرلەر ۇيىمدارىنىڭ وكىلدەرى قاتىستى.
وتىرىستا ءسوز العان ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ بۇل زاڭ سوعىس جانە ەڭبەك ارداگەرلەرىنىڭ قازاقستان رەسپۋبليكاسىنىڭ پارلامەنتىنە, ۇكىمەتكە جانە ەڭبەك جانە حالىقتى الەۋمەتتىك قورعاۋ مينيسترلىگىنە جولداعان كوپتەگەن وتىنىشتەرىنە بايلانىستى ازىرلەنگەنىن اتاپ ءوتتى. قۇجات قولدانىستاعى زاڭناماعا سايكەس ارداگەرلەرگە بەرىلەتىن بارلىق جەڭىلدىكتەر مەن كەپىلدىكتەردى بىرىكتىرەدى.
«زاڭ جوباسىنىڭ اياسىندا: ارداگەرلەردىڭ 5 الەۋمەتتىك قورعالاتىن ساناتىن انىقتاۋ; اۋعانستانداعى جانە باسقا ەلدەردەگى ۇرىس قيمىلدارىنا قاتىسقان اسكەري قىزمەتشىلەردى باسقا مەملەكەتتەردىڭ اۋماقتارىنداعى ۇرىس قيمىلدارىنىڭ ارداگەرلەرىنە جاتقىزۋ; باسقا مەملەكەتتەردىڭ اۋماقتارىنداعى ۇرىس قيمىلدارىنىڭ ارداگەرلەرىنىڭ ساناتتارىن كەڭەيتۋ; ينتەرناتسيوناليست-جاۋىنگەرلەردى, چەرنوبىلعا قاتىسۋشىلارىن, سونداي-اق سوتسياليستىك ەڭبەك ەرلەرىن الەۋمەتتىك قولداۋ بويىنشا شارالاردى كۇشەيتۋ ۇسىنىلادى», دەدى ەڭبەكمينىنىڭ باسشىسى.
ءمينيستردىڭ ايتۋىنشا, 5 الەۋمەتتىك قورعالاتىن ساناتتاعى ارداگەرلەرگە: ۇلى وتان سوعىسىنىڭ ارداگەرلەرى; باسقا مەملەكەتتەردىڭ اۋماقتارىنداعى ۇرىس قيمىلدارىنىڭ ارداگەرلەرى; جەڭىلدىكتەر مەن كەپىلدىكتەر بويىنشا ۇلى وتان سوعىسىنىڭ ارداگەرلەرىنە تەڭەستىرىلگەن ارداگەرلەر; ەڭبەك ارداگەرلەرى; زاڭنىڭ كۇشى قولدانىلاتىن باسقا دا ساناتتاعى تۇلعالار جاتادى.
«اۋعانستانداعى, سونداي-اق باسقا مەملەكەتتەردىڭ اۋماقتارىنداعى ۇرىس قيمىلدارىنا قاتىسقان اسكەري قىزمەتشىلەر سوعىس قيمىلدارىنىڭ ارداگەرلەرى ساناتىنا وتەدى, سونىمەن قاتار بارلىق قولدانىستاعى جەڭىلدىكتەر مەن جاردەماقىلار ساقتالادى», دەپ تولىقتىردى ءبىرجان نۇرىمبەتوۆ.
باسقا مەملەكەتتەردىڭ اۋماعىنداعى جاۋىنگەرلىك ءىس-قيمىل ارداگەرلەرى ساناتىنا اۋعان جاۋىنگەرلەرىنەن باسقا 1992 جىلدان 2001 جىلعا دەيىنگى كەزەڭدە تاجىك-اۋعان شەكاراسىندا تمد-نىڭ سىرتقى شەكاراسىن كۇزەتۋدى كۇشەيتۋگە, 1968 جىلى چەحوسلوۆاكياداعى جانجالدى رەتتەۋگە, تاۋلى قاراباحتاعى ەتنوسارالىق جانجالدى رەتتەۋگە قاتىسقان ادامداردى, سونداي-اق يراكتاعى بىتىمگەرشىلىك وپەراتسيالارىنا قاتىسقان ۇلتتىق كونتينگەنتتى قوسۋ جوسپارلانىپ وتىر.
«جاڭادان ەنگىزىلەتىن سانات ءۇشىن 4,8 اەك مولشەرىندە ارنايى مەملەكەتتىك جاردەماقى بەلگىلەۋ ۇسىنىلادى (2020 جىلى – 12 725 تەڭگە). ارنايى مەملەكەتتىك جاردەماقىدان باسقا, اتالعان ادامدارعا اۋعانستانداعى ۇرىس قيمىلدارىنا قاتىسقان اسكەري قىزمەتشىلەر ءۇشىن, ونىڭ ىشىندە تۇرعىن ۇيگە كەزەككە قويۋ, سالىق سالۋ, تەگىن مەديتسينالىق قىزمەت كورسەتۋ, ساناتوريالىق-كۋرورتتىق ەمدەۋمەن قامتاماسىز ەتۋ جانە ت.ب. بويىنشا قولدانىستاعى بارلىق قۇقىقتار مەن كەپىلدىكتەر بەرىلەتىن بولادى. بۇل 11 مىڭنان استام ادامعا قاتىستى», دەدى ەڭبەكمينى باسشىسى.
سونداي-اق 1988-1989 جىلدارى چەرنوبىل اەس-ىندەگى اپاتتىڭ زارداپتارىن جويۋعا قاتىسقان ادامدارعا ارناۋلى مەملەكەتتىك جاردەماقى مولشەرىن 2,13 اەك-تەن (2020 جىلى-5 647 تەڭگە) 4,8 اەك-كە دەيىن (2020 جىلى-12 725 تەڭگە) ارتتىرۋ ۇسىنىلادى.
بۇدان باسقا, الەۋمەتتىك ادىلەتتىلىك قاعيداتىن قامتاماسىز ەتۋ ماقساتىندا سوتسياليستىك ەڭبەك ەرلەرى ءۇشىن ارنايى مەملەكەتتىك جاردەماقىلاردىڭ مولشەرىن قايتا قاراۋ ۇسىنىلادى.
«2019 جىلدعى 1 قاڭتاردان باستاپ «قازاقستاننىڭ ەڭبەك ەرى» اتاعىنا يە بولعان ادامدار ءۇشىن 138,63 ايلىق ەسەپتىك كورسەتكىش مولشەرىندە ارنايى مەملەكەتتىك جاردەماقى ەنگىزىلدى (2019 جىلى – 350041 تەڭگە). بۇل «قازاقستاننىڭ ەڭبەك ەرى» اتاعىن العان ادامداردا جانە وتكەن جىلدارى ەلدىڭ دامۋىنا ەلەۋلى ۇلەس قوسقان سوتسياليستىك ەڭبەك ەرلەرىنە جاردەماقى مولشەرىندە ەلەۋلى ايىرماشىلىقتارعا الىپ كەلدى. وسىعان بايلانىستى ۇلى وتان سوعىسىنا قاتىسۋشىلار قاتارىنان سوتسياليستىك ەڭبەك ەرلەرى, سونداي-اق سوتسياليستىك ەڭبەك ەرلەرى ءۇشىن جاردەماقى مولشەرىن 74,65 جانە 9,6 اەك – تەن 138,63 اەك-كە دەيىن (2020 جىلى-367 508 تەڭگە) ارتتىرۋ ۇسىنىلادى», دەپ تۇيىندەدى مينيستر.
ءوز كەزەگىندە, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ ەڭبەكمينى زاڭ جوباسىن ۇلى وتان سوعىسىنىڭ جەڭىس كۇنىنە وراي ودان ءارى قابىلداۋ ءۇشىن پارلامەنت قاراۋىنا 2020 جىلدىڭ ساۋىرىنە دەيىن ەنگىزۋدى جوسپارلاپ وتىرعانىن ايتتى.
وتىرىسقا قاتىسۋشىلاردىڭ بارلىعى ازىرلەنگەن زاڭ جوباسىنىڭ تۇجىرىمداماسىن قولدادى», دەلىنگەن حابارلامادا.
