ترەنينگتەردى وتكىزۋگە رەسەي, قىتاي جانە قازاقستاننىڭ ۇزدىك بيزنەس-ترەنەرلەرى مەن قحر عىلىمي قاۋىمداستىعىنىڭ وكىلدەرى ارنايى شاقىرىلعان بولاتىن.
قوناقۇي بيزنەسى وكىلدەرىنە ارنالعان ۇشكۇندىك شەبەرلىك ساباقتارى كەزىندە قوناقۇي كاسىپورىندارىنىڭ قارجىلىق كورسەتكىشتەرىن جاقسارتۋ, داۋلى جاعدايلاردى باسقارۋ, جانە ءتيىمدى كوممۋنيكاتسيالاردى ورناتۋدى ۇيرەتتى. پراكتيكالىق داعدىلاردى مەڭگەرۋ كەزىندە جاعداياتتىق كەيستەردى تالقىلاۋ, رولدىك ويىندار ويناتۋ جانە بەينەجازبالاردىڭ ساراپتاماسى قولدانىلدى. سونداي-اق وتاندىق تۋر وپەراتورلار قازاقستانعا تۋريستەردى تارتۋداعى ماركەتينگتىك قۇرالداردى, جانە تۋريستەرمەن ءتىل تابىسۋدىڭ جولدارىن مەڭگەردى.
رەسەيلىك بيزنەس-كوۋچ ميحايل ەليزاروۆتىڭ پىكىرىنشە, مۇنداي شارالاردىڭ تۋريستىك سالادا جۇمىس ىستەيتىندەر ءۇشىن تيگىزەر پايداسى كوپ.
«تەگىن ترەنينگتەر وتكىزۋ ارقىلى تۋر بيزنەسكە قامقورلىق تانىتقان ۇيىمداستىرۋشىلارعا جانە قازاقستان ۇكىمەتىنە باسىمدى يەمىن. الداعى ۋاقىتتا دا مۇنداي شارالاردىڭ اۋقىمىن كەڭەيتىپ, ءجيى ۇيىمداستىرعان ابزال,» - دەيدى ماسكەۋلىك باسقارۋ كوللەدجىنىڭ لەكتورى.
قاراعاندىلىق تۋر وپەراتور پاۆەل ماكەەۆتىڭ پىكىرىنشە, مۇنداي ترەنينگتەردى كەلەسى جىلى مىندەتتى تۇردە تۋريستىك باسىم باعىتتاردىڭ توپ-10 ايماعىندا وتكىزۋ قاجەت.
«اتالعان وڭىرلەردەگى قوناقۇي بيزنەسىن باسقارۋعا ءجىتى كوڭىل ءبولىنۋ كەرەك. سوندىقتان, كادرلاردىڭ دايارلىعىنا نازار اۋدارىلسا, نۇر ۇستىنە نۇر بولار ەدى. وعان قوسا, وسىنداي پىكىر الماسۋ الاڭدارى بولاشاق ارىپتەستەرمەن بايلانىس ورناتۋعا مول سەپتىگىن تيگىزەدى», دەيدى قاراعاندىلىق تۋر وپەراتور.
بۇدان بولەك, ترەنينگكە قاتىسۋشىلار تۋريستىك نارىقتىڭ, ونىڭ ىشىندە رەسەي جانە قىتايدىڭ نارىعىن تەرەڭىرەك زەرتتەۋگە مۇمكىندىك الدى. سەبەبى, قازاقستان اتالعان ەلدەردىڭ تۋريستىك نارىعىنا شىعۋدى كوزدەيدى.
ءۇش كۇنگە سوزىلعان شارانىڭ قورىتىندىسى بويىنشا, بارلىق قاتىسۋشىلارعا سەرتيفيكاتتار تابىستالدى.
