«اۋىل» پارتياسىنىڭ توراعاسى ءالي بەكتاەۆ ءوز بايانداماسىندا پارتيانىڭ 2015-2019 جىلدارداعى قىزمەتىنىڭ قورىتىندىلارىن, اوك, الەۋمەتتىك سالا, عىلىم مەن ءوندىرىستىڭ وزەكتى ماسەلەلەرىن اتاپ ءوتتى.
ونىڭ ايتۋىنشا, قازاقستاندا جىل سايىن اۋىل شارۋاشىلىعىن مەملەكەتتىك قولداۋ كولەمى ارتىپ, اگرارلىق بيزنەس ءۇشىن جاعداي جاسالۋدا. دەسەكتە, شالعايداعى اۋىلداردىڭ بارلىعىندا تازا سۋ, ەلەكتر جەلىسى جانە ينتەرنەت جوق. پارتيا توراعاسى الداعى ءۇش جىلدا بۇل ماسەلەلەر جۇيەلى تۇردە شەشىلەتىنىن اتاپ ءوتتى. مىسالى, «اۋىل - ەل بەسىگى» جوباسى اياسىندا جولداردى, ەلەكتر, جىلۋ, گازبەن جابدىقتاۋ جۇيەلەرىن جوندەۋ, ەمحانا, مەكتەپتەر مەن بالاباقشالاردى رەتكە كەلتىرۋ, دەنە شىنىقتىرۋ-ساۋىقتىرۋ كەشەندەرى مەن ت. ب. رەتكە كەلتىرۋ جوسپارلانۋدا.
ءالي بەكتاەۆتىڭ بايانداماسىنان كەيىن پارتيا مۇشەلەرى مەن اگرارلىق سالانىڭ وكىلدەرى اۋىل شارۋاشىلىعىنداعى تۇيىتكىلدى ماسەلەلەردى تالقىلاۋعا كوشتى. مال شارۋاشىلىعى بويىنشا سۋبسيديالار تولەۋ, سونداي-اق اوك دامىتۋ مەملەكەتتىك باعدارلاماسىن ىسكە اسىرۋ تاسىلدەرىنىڭ وزگەرۋىنە بايلانىستى شارۋالاردىڭ تاپ بولعان كەدەرگىلەردى الىپ تاستاۋ ماسەلەلەرى ايتىلدى.
ءوز كەزەگىندە اۋىل شارۋاشىلىعىنىڭ ءبىرىنشى ۆيتسە-ءمينيسترى ايداربەك سەيپەل ۇلى قازىرگى ۋاقىتتا مينيسترلىك ماسەلەلەردى شەشۋ بويىنشا جۇمىس ىستەپ جاتقانىن مالىمدەدى. مىسالى, مينەرالدى تىڭايتقىشتاردى ساتىپ الۋعا سۋبسيديا الۋعا قول جەتكىزۋدى جەڭىلدەتۋ ءۇشىن 2 جىلعا اگروحيميالىق كارتوگراممالاردىڭ مىندەتتى بولۋى تۋرالى تالاپ مەرزىمى كەيىنگە قالدىرىلدى, ينۆەستيتسيالىق جوبالار بويىنشا ساراپتامالىق قورىتىندى الىنىپ تاستالدى, ينتەرنەت جەلىسى جوق جەرلەردە سۋبسيديالاۋعا ءوتىنىم بەرۋ مۇمكىندىگى قاعاز تۇرىندە قالدىرىلدى. سونداي-اق ساپاروۆ اۋىل شارۋشىلىعى مينيسترلىگى وتاندىق مال ءۇشىن سۋبسيديا تولەي باستاعانىن مالىمدەدى.
«الايدا, مۇنىڭ ءبارى بيۋدجەتكە بايلانىستى. سوندىقتان ءبىز ماسەلەنى كەزەكپەن شەشۋگە مىندەتتىمىز. جاقىندا ينۆەستسۋبسيديالار بويىنشا قارىز تولەندى. اقشا الماعان فەرمەرلەرگە 2020 جىلدىڭ باسىندا تولەيمىز. مال شارۋاشىلىعى سالاسىنداعى بەرەشەككە كەلەر بولساق: 2020 جىلدىڭ ءبىرىنشى جارتىجىلدىعىندا رەسپۋبليكالىق بيۋدجەتتىك كوميسسيا «رەسپۋبليكالىق بيۋدجەتتى» ناقتىلاۋ كەزىندە وسى ماسەلەنى قارايدى جانە 36,8 ملرد تەڭگە بىردەن تولەنەدى. ارينە, ماسەلەلەر از ەمەس, بىراق اۋىل شارۋاشىلىعى – كۇردەلى, ۇلكەن سالا ەكەنىن ءتۇسىنۋ قاجەت. اۋىل شارۋاشىلىعىنىڭ بارلىق سالالارى وكىلدەرىنىڭ مۇددەسىن قورعاۋ ءۇشىن ءبىز بىرلەسىپ جۇمىس ىستەۋىمىز كەرەك», دەدى اۋىل شارۋاشىلىعىنىڭ ءبىرىنشى ۆيتسە-ءمينيسترى ايداربەك ساپاروۆ.
«اۋىل» پارتياسى سەزىنىڭ جۇمىسىنا وڭىرلەردەن 200-دەن استام دەلەگات, سونداي-اق مەملەكەتتىك ورگانداردىڭ وكىلدەرى مەن سالا قىزمەتكەرلەرى قاتىستى. سەزدە پارتيا توراعاسى, ونىڭ ساياسي كەڭەسى تاڭدالدى, سونداي-اق ۇيىمنىڭ جارعىسىنا وزگەرىستەر مەن تولىقتىرۋلار ەنگىزىلدى», دەلىنگەن حابارلامادا.
