ءىس-شارا بارىسىندا وبلىس اۋماعىنداعى 731 مال شارۋاشىلىعى قارالعان بولاتىن. دەپارتامەنتتىڭ مالىمەتى بويىنشا, جەدەل الدىن الۋ شاراسىنىڭ ناتيجەسىندە مال شارۋاشىلىقتارىنا قاراستى 19 ادامنىڭ تۇراقتى تۇرعىلىقتى جەرىنىڭ جوق ەكەنى انىقتالعان. ال, تەكسەرىلگەن 1000-عا جۋىق قارۋ يەلەرىنىڭ 63-ءى قارۋ ساقتاۋ ەرەجەلەرىن بۇزعانى ءۇشىن جاۋاپقا تارتىلىپ, 49 اتىس قارۋى تاركىلەنگەن. سونىمەن قاتار بەلگى سالىنباعان 39 باس مال انىقتالىپ, ۇرلانعان 100 باس مال تابىلدى. سونداي-اق «قاشار» ءىس-شاراسى كەزىندە پوليتسيا قىزمەتكەرلەرى ىزدەۋدە جۇرگەن ەكى قىلمىسكەردى ۇستادى.
سونىمەن قاتار قازاقستان رەسپۋبليكاسىنىڭ كوشى-قون زاڭناماسىن بۇزۋدى انىقتاۋ ءۇشىن دە جامبىل وبلىسىنىڭ اۋماعىندا ۇيىمداستىرىلعان «قاشار» جەدەل پروفيلاكتيكالىق ءىس-شاراسى ءوز ناتيجەسىن بەردى. وعان جامبىل وبلىستىق پوليتسيا دەپارتامەنتى كوشى-قون قىزمەتى باسقارماسى قىزمەتكەرلەرىنىڭ جەكە قۇرامى قاتىستى. جامبىل وبلىسىنىڭ بايزاق اۋدانى, تەگىستىك اۋىلىندا جەكە شارۋاشىلىقتى تەكسەرۋ بارىسىندا زاڭسىز كوشى-قونعا قارسى كۇرەس جونىندەگى ارنايى جەكە روتا قىزمەتكەرلەرى زاڭسىز ەڭبەك قىزمەتىمەن اينالىساتىن وزبەكستان رەسپۋبليكاسىنىڭ ءتورت ازاماتىن انىقتادى. قازىرگى تاڭدا شەتەلدىك ازاماتتارعا قاتىستى قازاقستان رەسپۋبليكاسىنىڭ اكىمشىلىك-قۇقىقبۇزۋشىلىق كودەكسىنىڭ 517-بابى بويىنشا اكىمشىلىك حاتتاما تولتىرىلىپ, ولاردى ەل اۋماعىنان شىعارىپ جىبەرۋ ماسەلەسى شەشىلۋدە.
