قازاقستان مەن وزبەكستاندى جالعايتىن «بەينەۋ – اقجىگىت – وزبەكستان شەكاراسى» اۆتوجولى كۇردەلى جوندەۋدەن ءوتىپ, ءبىرىنشى كەزەڭى پايدالانۋعا بەرىلدى. ال, ەكىنشى كەزەڭى 2020 جىلدىڭ ءساۋىر ايىندا اياقتالادى. قازىر «جەتىباي-جاڭاوزەن-تۇركمەنىستان شەكاراسى» اۆتوموبيل جولىنىڭ قۇرىلىسى جۇرۋدە. 73 شاقىرىمدى قۇرايتىن جولدىڭ قۇنى 14,9 ملرد تەڭگە.
وبلىستىق جانە جەرگىلىكتى ماڭىزداعى «اقتاۋ-قالامقاس» جانە «تاۋشىق-شەتپە» اۆتوموبيل جولىنداعى جاساندى يماراتتاردى قايتا جاڭارتۋعا 872 ميلليون تەڭگە ءبولىندى. ماڭعىستاۋداعى كيەلى جەرلەرگە باراتىن «اتا جولى» اۆتوجولى دا قايتا جاڭارۋدا. قازىر قۇرىلىس-مونتاج جۇمىستارىنىڭ 90%-ى ورىندالدى. قۇرىق اۋىلىنان تەڭىز پورتىنا دەيىنگى 22 شاقىرىم جول دا اياقتالادى. سونداي-اق «جىڭعىلدى-شايىر-شەركالا مەكەنى» 29,5 شاقىرىم جولى, «شەتپە-قىزان» اۆتوموبيل جولىن قايتا قۇرىلىمداۋ 49-85 شاقىرىم ۋچاسكەسى جانە ت.ب. جولدار جاڭارتىلۋدا.
ايماقتا اۆتو جولدارىنىڭ جالپى ۇزىندىعى - 2846,1 شاقىرىمدى قۇرايدى. ونىڭ ىشىندە, رەسپۋبليكالىق ماڭىزداعى – 1049 شاقىرىم بولسا, وبلىستىق جانە جەرگىلىكتى ماڭىزداعى – 1 797,1 شاقىرىم.
