جيىن بارىسىندا اكىمنىڭ ورىنباسارى ءتيىستى مەملەكەتتىك ورگاندارعا بەينەباقىلاۋ كامەرالارىنىڭ جۇمىس جاعدايىن تەكسەرۋ ءۇشىن قالا مەكتەپتەرى بويىنشا بىرلەسىپ تەكسەرۋ جۇمىستارىن جۇرگىزۋدى تاپسىردى.
«ەلوردا مەكتەپتەرىندەگى قاۋىپسىزدىكتى قامتاماسىز ەتۋ ءۇشىن الدىمەن مەكتەپتەردەگى بەينەباقىلاۋ كامەرالارى ماسەلەسىن شەشىپ الۋىمىز قاجەت. ول ءۇشىن بىزدە ەڭ الدىمەن ستاتيستيكا بولۋى كەرەك. قانشا مەكتەپتە بەينەباقىلاۋ كامەراسى بار, قايسىسى جۇمىس ىستەيدى, قايسىسى جۇمىس ىستەمەيدى دەگەن سەكىلدى. وسى ورايدا قالالىق ءبىلىم باسقارماسى, مەكتەپ ديرەكتورلارى, پوليتسيا دەپارتامەنتى جانە ء«ىKOMEK» ورتالىعىنا تاپسىرما بەرەمىن. قالانىڭ بارلىق مەكتەپتەرىن ارالاپ شىعىپ, قاۋىپسىزدىك ماسەلەسىن, ونىڭ ىشىندە بەينەباقىلاۋ كامەرلارىنىڭ جۇمىس ىستەۋى بويىنشا مونيتورينگ جۇرگىزىڭىزدەر. ول ءۇشىن كوميسسيا قۇرىپ, ونىڭ قۇرامىنا ءتيىستى ورگانداردىڭ وكىلدەرىن كىرگىزىپ, جۇمىس جاساڭىزدار. اتالعان كوميسسيا قالاداعى ءاربىر مەكتەپتى ارالاپ كورىپ, بەينەباقىلاۋ كامەرالارىنىڭ جۇمىس ىستەۋ دەڭگەيىن انىقتاسىن. سوندا عانا ءبىز ەلوردا مەكتەپتەرىنىڭ قاۋىپسىزدىك ماسەلەسى مەن نەنى الدىمەن شەشۋىمىز كەرەكتىگىن بىلەتىن بولامىز», دەدى باقتيار ماكەن.
كەشەندى ءىس-شارالاردىڭ وتكىزىلۋىنە بايلانىستى ول ەلوردادا بالالار قاۋىپسىزدىگى ايلىعىنىڭ وتكىزىلەتىنىن حابارلادى. ودان بولەك, ب.ماكەن قاۋىپسىزدىككە جاۋاپ بەرەتىن كۇزەت ۇيىمدارىن تەكسەرۋدى تاپسىردى.
«قازىرگى كۇنى قالادا ءتۇرلى كۇزەت ۇيىمدارى كوبەيىپ كەتتى. سانى بار دا ساپاسى جوق. بۇل دا كەزەك كۇتتىرمەيتىن ماسەلە. كۇزەت كومپانيالارىنىڭ سانىن 3-4-كە دەيىن قىسقارتۋ كەرەك. سوندا قاۋىپسىزدىككە قاتىستى سۇراقتاردى تەك سولارعا قويىپ, سولاردان تالاپ ەتەتىن بولامىز. سەبەبى وقىس وقيعا ورىن السا, ۇنەمى كىنالى ادامدى ىزدەپ جۇرەمىز. سىزدەرگە 1 اپتا ۋاقىت بەرەمىن, ءبارىن قاراپ شىعىپ بىزگە جەتكىزىڭىزدەر. ودان ءارى ءبىز قالا اكىمىمەن ويلاسا كەلىپ ماسەلەنىڭ تۇبەگەيلى شەشۋ جولدارىن قاراستىراتىن بولامىز», دەدى اكىم ورىنباسارى.
اتالعان جيىنعا ءبىلىم باسقارماسى, پوليتسيا دەپارتامەنتىنىڭ باسشىلىعى, مەكتەپ ديرەكتورلارى مەن قالالىق اكىمدىك وكىلدەرى قاتىستى.
