جاقىندا ۇلتتىق اكادەميالىق كىتاپحانادا «پەداگوگتاردىڭ كاسىبي كرەاتيۆتى قۇزىرەتتىلىگىن جەتىلدىرۋدە ۇلتتىق ويىنداردىڭ ءرولى» تاقىرىبىندا قالالىق سەمينار ءوتتى. ءتۇرلى ويلار مەن ويىنداردان, ءتالىمدى ترەنينگ, باياندى باياندامالار مەن سۇبەلى سۇحبات تۇرىندە وربىگەن جيىندا №48 «اق كوگەرشىن» بالاباقشاسىنىڭ ەكسپەريمەنتتىك الاڭىنىڭ عىلىمي جەتەكشىسى, پەداگوگيكا عىلىمدارىنىڭ كانديداتى اقجارقىن بادەل «مەكتەپكە دەيىنگى ۇيىمداردا وقىتۋدىڭ كرەاتيۆتى تەحنولوگيالارىن پايدالانۋ» تاقىرىبىندا بايانداما جاساپ, پەداگوگتارمەن «كرەاتيۆتى شەڭبەر» ويىنىن ۇيىمداستىردى.
«بۇگىندە «كرەاتيۆتى پەداگوگ», «كرەاتيۆتى مامان» تەرمينى ءجيى قولانىلۋدا. پەداگوگتىڭ شىعارماشىلىق جانە كرەاتيۆتىلىك قابىلەتىن دامىتۋ وزەكتى ماسەلەگە اينالدى. كرەاتيۆتىلىك ءسوزىن اعىلشىن تىلىنەن اۋدارعاندا «create» – تۋدىرۋ, جاساۋ, شىعارۋ دەگەندى بىلدىرەدى. كرەاتيۆتىلىك – تۇلعانىڭ ايرىقشا يدەيالاردى شىعارۋ, ويلاۋدىڭ ءداستۇرلى سىزبالارىنان كەتە الۋ, پروبلەمالىق جاعداياتتاردى شەشە الۋ قابىلەتى. كرەاتيۆتىلىك ينتەللەكتۋالدىق قابىلەتتەردىڭ ىشىندە ەرەكشە تيپ رەتىندە ءبولىنىپ شىقتى. وتاندىق عالىم ش.تاۋباەۆا: «كرەاتيۆتىلىك دەگەنىمىز – جەكە شىعارماشىلىق ارەكەتتىڭ جەمىسى» دەگەن. ءار پەداگوگ ءوزىنىڭ ىشكى مادەنيەتىن سويلەۋ مەن ءوز ويىن جەتىلدىرۋ شەبەرلىگىن ارتتىرىپ وتىرۋ كەرەك. ول ءۇشىن كىتاپتار وقۋ, وزگەرىستەر مەن جاڭالىقتاردان حاباردار بولۋ, ءوز ءبىلىمىن جەتىلدىرۋ, جاڭاشا يدەيالار مەن جاڭاشا وقىتۋ تەحنولوگيالارىن ءتيىمدى پايدالانۋ, كرەاتيۆتىك تەحنولوگيا بويىنشا ۇلتتىق ءبىلىم بەرۋ مودەلىن جاساۋ, وقىتۋدىڭ ستاندارت شەڭبەرىمەن شەكتەلمەي, بالاما باعدارلامالار پايدالانۋ, بالانىڭ بىلىمىنە, قابىلەتىنە, دارىندىلىعىنا, سۇرانىسىنا, ونەرىنە سايكەس دەڭگەيلەپ, سارالاپ وقىتۋ, ۇلتتىق ءتىل, سالت-ءداستۇر, دۇنيەتانىم, اتاكاسىپ, ۇلتتىق باي تاجىريبە نەگىزىندە تاربيەلەۋ, وقىتۋدى ىزگىلەندىرۋ كەرەك. مىسالى, ساكەن قاسىقباي ۇلى دەگەن ازامات «قازاقى جەتى ويىنشىق» جوباسىن جاساعان. ول ويىنشىقتاردىڭ ىشىندە مىنالاردى ەرەكشە اتاپ وتۋگە بولادى. ءبىرىنشىسى – «بوبەك دومبىرا». بۇل كىشكەنتاي بالالار قۇراستىرىپ, جيناي الاتىن دومبىرا. «كەرەمەت ءۇي». كادىمگى كيىز ءۇي. ونى دا بالالار قۇراستىرىپ, وزدەرى وينايدى, بولشەكتەرىن ايتادى. «ويلاندىرار ويۋلار». ويۋلاردىڭ ءتۇر-ءتۇسى قۇراستىرىلاتىن ويىن. «اسەم ءۇي». ەدەندەگى ويۋلارى دا قۇرالادى, ءۇي دە قۇرالادى. «ساز اسپاپتارى». بالالار ۇلتتىق اسپاپتاردى قۇراستىرادى, تانىسادى. «اۋەندى بەسىك». بالالار بەسىكپەن, بەسىك جىرىمەن تانىسادى. «استانا-بايتەرەك». ەلوردامەن تانىستىرۋ, بالالاردىڭ تۋعان ەلگە, جەرگە دەگەن سۇيىسپەنشىلىكتەرىن ارتتىرۋ. بۇل دا وقىتۋدىڭ كرەاتيۆتى تەحنولوگيالارىن پايدالانۋ بولىپ تابىلادى», دەيدى اقجارقىن بادەل.
شارا بارىسىندا اتالعان بالاباقشا مەڭگەرۋشىسى ۇلجان ابەنقىزى سەمينارعا قاتىسۋشىلاردى قۇتتىقتاپ, باعدارلامامەن تانىستىردى. مادەنيەت قايراتكەرى سارا ورازوۆا جەتەكشىلىك ەتەتىن بالاباقشا بالدىرعاندارىنان قۇرىلعان حور سەميناردىڭ شىمىلدىعىن اشتى. سەمينارعا نۇر-سۇلتان قالاسى ءبىلىم بەرۋدى جاڭعىرتۋ ورتالىعىنىڭ ءبولىم باسشىسى اقمونشاق نۇرتازاقىزى «جاڭعىرتىلعان ءبىلىم بەرۋ جاعدايىندا ويىن تۇرلەرىن قولدانۋ ەرەكشەلىكتەرى» تاقىرىبىندا بايانداما جاسادى. بالاباقشا ادىسكەرى بانۋ تۇكەنقىزى بالا دەنساۋلىعىن نىعايتۋدا ىنتالاندىرۋ تەحنولوگياسىن اسىقپەن كىرىكتىرە قولدانۋ ادىستەمەسىن ءتۇسىندىرىپ, بالاباقشا پەداگوگتارىنا بالاباقشا دەڭگەيىندە ۇلتتىق ويىنداردى ويناتۋدىڭ جاڭا باعىتى بويىنشا شەبەرلىك سىنىپ وتكىزدى.
