كونتسەرت الدىندا ەلباسى نۇرسۇلتان نازارباەۆ «تاريحي تاڭداۋ» كورمەسىن ارالاپ كوردى. كورمەگە ۇسىنىلعان ءاربىر بىرەگەي زاتتىڭ تاريحتان سىر شەرتەتىنىن اڭعارۋعا بولادى. مۇندا تۇڭعىش پرەزيدەنتتىڭ تاۋەلسىز قازاقستاننىڭ قالىپتاسۋىنداعى تاريحي ءرولىن جان-جاقتى زەردەلەيتىن ەلباسى كىتاپحاناسىنىڭ مۋزەي كوللەكتسياسىنداعى مۇراعاتتىق ماتەريالدار مەن بىرەگەي زاتتار, ۇلت كوشباسشىسىنىڭ ءومىربايانى مەن شىعارماشىلىق جولى, قازاقستان تاۋەلسىزدىگىنە قول جەتكىزۋى جانە دامۋى جولىنداعى قۇجاتتار قويىلعان. سونداي-اق مۇندا تۇڭعىش پرەزيدەنت – ەلباسىنىڭ جەكە كىتاپحاناسىنان 145 كىتاپ پەن 220 ەكسپونات ۇسىنىلعان. ەلباسى كورمەگە ۇسىنىلعان ءاربىر مۇراعاتتىق دۇنيەگە زەر سالىپ, ەرەكشە ىقىلاسپەن قارادى.
كورمەدەن سوڭ ەلباسى مادەنيەت جانە سپورت مينيسترلىگى جانە مەملەكەتتىك كۇزەت قىزمەتىنىڭ ۇيىمداستىرۋىمەن وتكەن «ەلىن سۇيگەن, ەلى سۇيگەن ەلباسى» اتتى مەرەكەلىك كونتسەرتتى تاماشالادى. مۇندا مەملەكەتتىك كۇزەت قىزمەتىنىڭ پرەزيدەنتتىك وركەسترىنىڭ جانە «قازاقكونتسەرت» مەملەكەتتىك كونتسەرتتىك ۇيىمىنىڭ ارتىستەرى, بەلگىلى وپەرا جانە ەسترادا انشىلەرى ونەر كورسەتتى.
مەرەكەلىك كەشكە كەلگەن قوناقتار اۋەزدى ءان تىڭداپ, تاۋەلسىز قازاقستاننىڭ قۇرىلۋى مەن قالىپتاسۋىنداعى پرەزيدەنت رولىنە تاعى ءبىر كۋا بولدى.
