تاتارستان – رەسەي اۋماعىنداعى تابىستى ايماقتىڭ ءبىرى ەكەنىنە توقتالعان نۇرلان نىعماتۋلين ءبىزدىڭ ەلىمىزدىڭ تاتارستانمەن ىنتىماقتاستىعى جالپى قازاقستاندىق-رەسەيلىك ءوزارا ءىس-قيمىلدى دامىتۋعا ايتارلىقتاي ۇلەس قوساتىنىن اتاپ ءوتتى.
ن.نىعماتۋليننىڭ ايتۋىنشا قازاقستاننىڭ تۇڭعىش پرەزيدەنتى نۇرسۇلتان نازارباەۆ پەن رەسەي پرەزيدەنتى ۆلاديمير ءپۋتيننىڭ دوستىعى جانە بىرلەسكەن ەڭبەگى قازاقستاندىق-رەسەيلىك قارىم-قاتىناسقا سەرپىن بەردى.
وسى رەتتە ءماجىلىس سپيكەرى مەملەكەت باسشىسى قاسىم-جومارت توقاەۆ سىرتقى ساياساتتاعى ساباقتاستىقتى جالعاستىرا وتىرىپ, قازاقستان مەن رەسەي ارىپتەستىگىن جاڭا دەڭگەيگە جەتكىزەتىنىنە سەنىم ءبىلدىردى.
ءوز كەزەگىندە مەملەكەتتىك كەڭەس توراعاسى باۋىرلاس قوس مەملەكەتتىڭ مىزعىماس مادەني, رۋحاني, ەكونوميكالىق بايلانىستارىنا توقتالدى.
فاريد مۋحامەتشين اتاپ وتكەندەي, بۇگىندە مىقتى ەكونوميكاسى مەن سەنىمدى بولاشاعى بار قازاقستاننان كوپ نارسەنى ۇيرەنۋگە بولادى. تاتارستان پارلامەنتىنىڭ سپيكەرى ءوز حالقىن ورتاق ماقسات جولىندا بىرىكتىرە وتىرىپ, تابىستى مەملەكەت قۇرعان قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ەرەن ەڭبەكتەرىن اتاپ ءوتتى. جانە قازاقستاندىق جولدى مەملەكەت باسشىسى قاسىم-جومارت-توكاەۆتىڭ ءساتتى جالعاستىرىپ كەلە جاتقانىن ايتتى.
تاراپتار بارلىق سالادا ىقپالداستىقتى تەرەڭدەتۋدىڭ ماڭىزدىلىعىنا نازار اۋداردى.
ال, پارلامەنتارالىق ءوزارا ارىپتەستىكتى كۇشەيتۋ باعىتىندا قاجەتتى زاڭنامالىق بازا قالىپتاستىرۋ قازاقستان مەن رەسەي مۇددەسى جولىنداعى ورتاق ماقساتتاردى جۇزەگە اسىرۋعا ىقپال ەتەتىنىنە سەنىم ءبىلدىردى, دەپ حابارلادى ءماجىلىستىڭ ءباسپاسوز قىزمەتى.
