جيىندى اشقان مەملەكەتتىك حاتشى «بولاشاق» باعدارلاماسىنىڭ ادام كاپيتالىن دامىتۋ سالاسىنداعى سەرپىندى جوبا ەكەنىن اتاپ ءوتتى.
كوميسسيا وتىرىسىندا ءبىلىم جانە عىلىم ءمينيسترى ا.ايماعامبەتوۆتىڭ شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرمالارىنىڭ ورىندالۋى تۋرالى ەسەبى تىڭدالدى, سونداي-اق «بولاشاق» باعدارلاماسىنىڭ ىسكە اسىرىلۋىنا قاتىستى بىرقاتار ماسەلە تالقىلاندى.
كوميسسيا شەشىمىمەن ماگيستراتۋرا مەن دوكتورانتۋرادا ءبىلىم الۋ ءۇشىن 234 ۇمىتكەرگە ستيپەنديا تاعايىندالدى, سونىمەن قاتار ولار الەمنىڭ جەتەكشى عىلىمي جانە وندىرىستىك ۇيىمدارىنا تاعىلىمداماعا جىبەرىلەدى.
وتىرىس قورىتىندىسى بويىنشا كوميسسيا «بولاشاق» حالىقارالىق ستيپەندياسىنىڭ تيىمدىلىگى مەن اشىقتىعىن ارتتىرۋ ءۇشىن بىرقاتار ناقتى تاپسىرما بەردى. اسىرەسە ەكونوميكا سالاسىن دامىتۋدىڭ پەرسپەكتيۆالارى نەگىزىندە ەڭبەك رەسۋرسى بالانسىنداعى وزگەرىستەردى ەسكەرۋ جايى ايتىلدى.
مىسالى, 2020 جىلدان باستاپ «بولاشاق» حالىقارالىق ستيپەندياسىن ىسكە اسىرۋدىڭ جاڭا تاسىلدەرى ەنگىزىلەتىن بولادى. بۇل كونكۋرستىق ىرىكتەۋدى جۇرگىزۋ تەتىكتەرىن جەتىلدىرۋدى جانە اۆتوماتتاندىرۋدى, ونىڭ كەزەڭدەرىن قىسقارتۋدى, شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ جۇمىسىن وڭتايلاندىرۋدى, جۇمىس ورگانىنىڭ جاۋاپكەرشىلىگىن ارتتىرۋدى كوزدەيدى. سونىمەن قاتار ستيپەندياتتاردى وقىتۋعا بايلانىستى بارلىق اكادەميالىق ۇدەرىستەر قوسىمشا رەتتەلەدى.
