ءبارى دە بالالىق شاقتان باستالادى عوي, ونىڭ بالالىق شاعى كەرەمەت ءتاتتى بولماسا دا, اناۋ ايتقانداي اششى دا بولعان جوق. ءتاتتى بولماعانى, جاندار سوعىس جەڭىسپەن اياقتالعان جىلى مەكتەپكە بارعان. ەل ءالى ەسىن جيناي قويماعان كەز. كوپ نارسە جەتىسپەيدى. اسىرەسە وقۋ قۇرالدارى. ال بالالاردىڭ وقۋعا ىنتا-ىقىلاسى ەرەكشە. اششى بولماعانى, امىرەقىز انانىڭ بار تىلەۋى جالعىز ۇلدىڭ ۇستىندە. وتاعاسى ەرتە قايتىس بولعان. جانداردىڭ الدىنداعى 5 قىز تۇرمىستا. ۇيدە انالى-بالالى ەكەۋى عانا. ءالى مۇشەلگە دە تولماعان 12 جاستاعى بالاعا 14 شاقىرىم جەردەگى اۋدان ورتالىعى ۆاننوۆكاعا (قازىرگى ت.رىسقۇلوۆ) جاياۋ قاتىناپ وقۋ وڭاي ەمەس. وسىنى ەسكەرگەن مەكتەپ ديرەكتورى, لەنين وردەندى ۇستاز سەرج ءامىرحانوۆ اعاي وعان مەكتەپ جانىنداعى ينتەرناتتان ورىن بەرگىزگەن.
«اناشىم دا ەكى كوزى ءتورت بولىپ ىنتىعا, قارا جولعا قاراۋمەن بولادى-اۋ دەيمىن. ونى مەن كەلگەندە «كەلدىڭ بە, ق ۇلىنىم!» دەپ قۇشاعىنا العان كەزدە داۋسىنىڭ دىرىلىنەن, جانارىندا مولتىلدەپ ماڭدايىما تىرس-تىرس تامعان جاسىنان بايقايتىن ەدىم. داستارقان جايىپ بارىن اۋزىما توسادى. اسىرەسە, جۇمىرتقا تۋراپ بەرەتىن, مەن جاقسى كورەتىن نانسالما. نە اپكەلەرىم, نە جەڭگەلەرىم, تاماقتى تاتىمدى ەتىپ ىستەيتىن. قۇداي قوسقان قوساعىم دا وسى كۇنگە دەيىن قانشا تىرىسسا دا, ءدال انامداي نانسالمانى ءدامدى دايىنداي العان ەمەس. انامنىڭ تاماعىن اڭساۋمەن ءومىر ءسۇرىپ كەلەمىن.
«اناما نە جاقسىلىق جاسادىم؟» دەپ ءجيى-ءجيى ويعا قالامىن. ء«تۇن ۇيقىسىن ءتورت ءبولىپ, شىعارعا جانى بەيىل, اۋىرىپ قالسام بايەك بولىپ بىرگە اۋىرعان, جالعىز ۇلىنىڭ اماندىعىن اللادان جالبارىنا تىلەگەن, ۋايىممەن جۇدەگەن ونىڭ ءبىر كۇنى تۇگىلى ءبىر ءساتىن دە وتەي المادىم-اۋ» دەپ وكىنەمىن. كانيكۋل كەزىندە وعان جاردەم بولسىن دەپ الىمە قاراي كولحوزدا جۇمىس ىستەدىم. كەزەك كەلگەندە پادانىڭ مالىن باقتىم. وگىز جەككەن ماجار اربامەن فەرماعا ءشوپ تاسىدىم, ءۇيدىڭ تىرلىگىنە قاراستىم. قارلىعاشتىڭ قاناتىمەن سۋ سەپكەنىندەي بولسا دا, اناما پايدام ءتيسىن دەپ قاراپ وتىرمادىم. ونىنشىنى بىتىرگەن سوڭ سەرج اعاي «الماتىداعى شەت تىلدەر ينستيتۋتىنا ءبىر ورىن بەرىپ جاتىر, نەمىس تىلىنەن بەرەتىن اپايىڭ ليديا يۆانوۆنا شتراۋس سەنى ۇسىنىپ وتىر, بارعانىڭ دۇرىس, شىراعىم» دەپ اقىلىن ايتقاندا, «راحمەت, اعاي, انام ەگدە تارتىپ قالدى. الىسقا ۇزاي المايمىن. جامبىلداعى زووتەحنيكالىق-مالدارىگەرلىك تەحنيكۋمعا بارعىم كەلەدى» دەگەنمىن. ۇستاز ءسال ويلانىپ, «مۇنىڭ دا ءجون» دەپ قۇپتاعان-دى.
انا بىتكەن پەرزەنتىنىڭ جاقسى بولعانىن قالايدى عوي. ۇلىنىڭ مەكتەپتى ۇزدىكتەر قاتارىندا جاقسى ۇلگەرىممەن بىتىرگەنىن بىلەتىن امىرەقىز انا: «جاندارجان, جالعىزدىڭ جارى – قۇداي, ماعان الاڭدايمىن دەپ ويداعى وقۋىڭدى وقي الماي قالما» دەگەن مەكتەپ ءبىتىرىپ جاتقانىندا. بىراق ۇلى ءوز قالاۋىمەن «مال دوقتىردىڭ» وقۋىنا باراتىنىن ايتقان. شىن مانىندە, جۇرەك تۇكپىرىندە «قازمۋ-ءدىڭ جۋرناليستيكا فاكۋلتەتىندە وقىسام عوي» دەگەن ارمان جاتقان-دى. «وعان كەيىن ۇلگەرە جاتارمىن. ازىرگە ەرتەرەك ماماندىق الىپ, اپاما نان جەگىزسەم» دەگەن تاعى ءبىر وي ونى جامبىل زووتەحنيكالىق-مالدارىگەرلىك تەحنيكۋمىنا جەتەلەي جونەلگەن. بۇل وقۋ ورنى سول كەزدە وسى توڭىرەكتەگى مىقتىلاردىڭ ساناتىندا.
بۇل جاندار اعانىڭ «اناشىم – ارداعىم» اتتى ەستەلىك-ەسسەسىنەن ءۇزىندى.
تەحنيكۋمدى ۆەتتەحنيك ماماندىعى بويىنشا قىزىل ديپلومعا بىتىرگەن جاندار اپاسىنىڭ اقىلىمەن جامبىل وبلىسى جامبىل اۋدانى تانتى اۋىلدىق كەڭەسىنىڭ توراعاسى قىزمەتىندەگى ناعاشىسى ايتابان تىلەۋقابىلوۆقا بارعان. ول كىسى: «سەن ەرتەڭ جامبىل اۋداندىق اتقارۋ كوميتەتىنىڭ توراعاسى ايتباي نازاربەكوۆكە بار, ديپلومىڭدى كورسەت, جاعدايىڭدى ايت, ول جاقسى ادام, كومەكتەسەدى», – دەدى. باردىم. كورىكتى, بيازى كىسى ەكەن. مۇقيات تىڭدادى دا, بىرەۋگە تەلەفون شالىپ: «قازىر ساعان ءبىر جىگىت بارادى, ونى «وكتيابر» كولحوزىنداعى ۆەتۋچاسكىگە جىبەر», – دەدى. باردىم. باستىق قولىما بۇيرىقتى ۇستاتتى.
العاشقى ايلىعىمدى العاندا قۋانىشىم قوينىما سىيماي جەلدەي ەسىپ اۋىلعا كەلىپ انامنىڭ الاقانىنا سالدىم. سول ءتۇنى انام ەكەۋمىز قۋانىشتان تاڭعا كوز ىلمەدىك. انام « ۇلىم جىگىت بولدى» دەپ قۋانعان شىعار, «مەن اناما العاشقى نانىمدى جەگىزدىم-اۋ» دەپ قۋاندىم. تاعدىردىڭ جازعانى دا, قۋانىشىمىز ۇزاققا بارمادى. ەكى اپتادان سوڭ, 1960 جىلدىڭ 21 مامىر كۇنى, «اناڭ قايعىلى قازاعا ۇشىرادى» دەگەن حابار كەلدى. مەن اكەلگەن اقشاعا العانى ءبىر قوراپ ءشاي, ءبىر كيلو قانت, قالعانى قالتاسىندا ەكەن. ءومىرىم استان-كەستەن بولدى, جالعىز قالدىم. اپكەلەرىم, اتامنىڭ ءىنىسى, ناعاشىلارىم وزدەرىمەن-وزدەرى. قورجىن تامدا كەشكە دەيىن پاتەفون ويناتىپ تىڭدايتىنىم – قۇرمانعازىنىڭ «قايران شەشەم» كۇيى.
بۇگىندە سەكسەننىڭ سەڭگىرىنە شىعىپ وتىرعان قازىنالى قاريا جاندار كارىباي ۇلى, ءارى قاراي اناسى دۇنيەدەن وزعاننان كەيىن ارتىندا الاڭدايتىن ەشتەڭە قالماعان جاندار باياعى ءبىر ارماننىڭ جالىنا جارماسىپ, قازمۋ-گە قۇجات تاپسىرعان. 1965 جىلى وسى وقۋ ورنىنىڭ فيلولوگيا فاكۋلتەتىن قىزىل ديپلومعا ءبىتىرىپ, جولدامامەن جامبىل وبلىسىنا كەلدى. وبلىستىق ءبىلىم ءبولىمى مەركى اۋدانىنا جۇمساعان. جانداردىڭ جامبىلدان الىسقا ۇزاعىسى جوق. جۇرەك تۇكپىرىندە سول باياعى «جۋرناليست بولسام» دەگەن وي بۇعىپ جاتىر. بىراق, جولدامامەن كەلگەن مامان كەمىندە ەكى جىل جۇمىس ىستەۋى كەرەك. وبلىس جامبىل اۋدانىنىڭ ورتالىعى اسا اۋىلىنداعى مەكتەپ-ينتەرناتقا نەمىس تىلىنەن مۇعالىم بولىپ بارۋدى ۇسىنعان.
مۇعالىم بولا ءجۇرىپ ءارتۇرلى تاقىرىپتا جازعان ماقالالارى اۋداندىق, وبلىستىق گازەتتەردە ارا-تۇرا جاريالانىپ تۇرعان. جۋرناليست بولۋدان ءۇمىتى ۇزىلگەن ەمەس.
ساباقتى ينە ساتىمەن, جازعاندارى جوعارىداعىلاردىڭ نازارىنا ىلىككەن جاندار كارىباەۆ ءبىر كۇنى وبلىستىق پارتيا كوميتەتىنەن شاقىرتۋ الدى. شاقىرعان – ۇگىت-ناسيحات ءبولىمى ءباسپاسوز سەكتورىنىڭ مەڭگەرۋشىسى, اقىن جاقسىلىق ساتىبەكوۆ. ول كىسىنىڭ قابىلداۋىندا سول كەزدە وردابۇزار وتىزدىڭ ورتاسىنان اسقان, كوزىلدىرىكتى كىسى وتىر ەكەن.
– بۇدان بۇرىن جابىلىپ قالعان جامبىل اۋدانى قايتادان اشىلعالى جاتىر, – دەدى جاقسىلىق ساتىبەكوۆ اماندىق-ساۋلىق سۇراسقاننان كەيىن. – اۋدان اشىلعاننان كەيىن ونىڭ ورگانى بولاتىنى بەلگىلى. مىنا كىسى سول ورگان اۋداندىق «شۇعىلا-رادۋگا» گازەتىنىڭ رەداكتورلىعىنا تاعايىندالعان ساعات ارىنوۆ اعاڭ. سەنىڭ جازاتىنىڭدى ەسكەرىپ, وسى گازەت رەداكتسياسىنان قىزمەت ۇسىنعالى وتىرمىز. كەلىسەسىڭ بە؟
كەلىسپەگەندە شە, قۋانا كەلىسكەن. جۋرناليست بولۋ جانداردىڭ ارمانى عوي. سول ارمان ورىندالعالى وتىرعاندا!..
– ارينە, كەلىسەمىن! – دەدى قۋانىشىن جاسىرا الماي.
– كەلىسسەڭ, ءارى قاراي جۇمىس جاعدايىن رەداكتورىڭ شەشەدى, – دەدى جاقسىلىق اعاسى «اڭگىمە ءبىتتىنى» اڭعارتىپ.
جاندار كارىباەۆ «جۋرناليستيكانىڭ مەكتەبى» سانالاتىن اۋداندىق گازەت رەداكتسياسىندا قىزمەتتى بەت وقۋشىدان باستاعان. سودان كوررەكتور, ادەبي قىزمەتكەر, اعا ءتىلشى, ءبولىم مەڭگەرۋشىسى, جاۋاپتى حاتشى, رەداكتوردىڭ ورىنباسارى, رەداكتور سىندى قىزمەت ساتىلارىنىڭ بارىنەن ءوتتى.
– ءتىلشى كەزىمدە ماقالا دايىنداۋ ءۇشىن اۋداننىڭ كەيبىر شارۋاشىلىقتارىنا جاياۋ بارعان ساتتەرىم بولعان. كوزبەن كورىپ, كوڭىلگە ءتۇيىپ جازعان ماقالا كوپشىلىك كوڭىلىنەن شىعاتىنى ءسوزسىز. جۋرناليست ءۇشىن ەڭ جاقسى جەتىستىك تە وسى. قازىر ينتەرنەتتەن الىپ جازىلعان ماقالا ونشا تۇششىمدى بولا بەرمەيتىنىن ويلاسا ەكەن سول «جازعىشتار».
بىردە «قاراكەمەر» سوۆحوزىنىڭ جامانكول شۇراتىنداعى تاۋارلى-ءسۇت فەرماسىنان تاڭعى ساۋىن تۋرالى رەپورتاج دايىنداۋ جونىندە تاپسىرما الدىم. ءبىر كۇن بۇرىن بارىپ, قونا جاتىپ جازاتىنداي وندا مەنىڭ قايبىر ناعاشىمنىڭ ءۇيى بار. ون شاقىرىمداي شاماسىنداعى فەرماعا ءتۇن جامىلىپ بارۋعا تۋرا كەلدى. ابىروي بولعاندا, اي جارىق. تاڭەرتەڭگى ساۋىنعا ۇلگەردىم-اۋ ايتەۋىر. ساۋىنشىلاردىڭ كەيبىرى تاڭعالىپ, ەندى بىرەۋلەرى اياپ جاتىر. سول جولعى رەپورتاجىم ءساتتى ءارى شىنايى شىقتى. رەداكتور دا, ءبولىم مەڭگەرۋشىسى دە ريزا. سول ريزاشىلىق شارشاعانىمدى, كورگەن مەحناتىمدى دا ۇمىتتىرىپ جىبەردى, – دەيدى جاندار اعا ءوزىنىڭ تىلشىلىك قىزمەتىندە باستان كەشكەن ءبىر وقيعانى ەسكە الىپ.
كەڭەستىك كەزەڭدەگى پارتيالىق ءتارتىپ, قالىپتاسقان ءۇردىس بويىنشا رەداكتورلىقتان الماتى جوعارى پارتيا مەكتەبىنە وقۋعا جىبەرىلگەن جاندار كارىباەۆ بۇل وقۋ ورنىن دا قىزىل ديپلومعا ءبىتىرىپ, اۋدانعا يدەولوگيالىق حاتشى بولىپ ورالعان. اۋدانداعى الەۋمەتتىك-تۇرمىستىق, ءبىلىم, مادەنيەت, مەديتسينا, ساۋدا سىندى سالالاردىڭ جۇمىسىن جانداندىرۋ, سولارعا قولداۋ كورسەتىپ كومەكتەسۋ – مىندەتى.
وتكەن عاسىردىڭ ورتاسىندا وبلىستىق پارتيا كوميتەتىنە ۇگىت-ناسيحات ءبولىمىنىڭ مەڭگەرۋشىسى بولىپ اۋىسقان جاندار اعا پارتيا تاراعاندا وبلىستىق مادەنيەت باسقارماسىنا باسشىلىققا تاعايىندالعان.
– 1991 جىلى پارتيا تاراپ, كەڭەس ءداۋىرى كەلمەسكە كەتتى. مەن ول كەزدە وبكومدا كادرلارمەن جۇمىستى ۇيىمداستىرۋ ءبولىمىنىڭ مەڭگەرۋشىسىمىن. ومىربەك بايگەلدى – وبلىس باسشىسى. ومەكەڭ ماعان وبلىس مادەنيەتىن باسقارۋدى تاپسىرعان. 1995 جىلى قازاقستان رەسپۋبليكاسى پارلامەنتىنىڭ دەپۋتاتى بولىپ سايلانعانعا دەيىن مادەنيەت باسقارماسىنا جەتەكشىلىك ەتتىم.
وبلىستى مەكەندەگەن ونداعان ۇلتتار مەن ۇلىستار وكىلدەرىنىڭ رۋحاني-مادەني سۇرانىستارىن قاناعاتتاندىرۋ ماقساتىندا ورىس, ۋكراين, تۇرىك, كۇردى, ازەربايجان, نەمىس, تاتار-باشقۇرت, تاعى باسقا مادەني ورتالىقتار قۇرىلىپ, نەمىستىڭ «فرويندشافت», كۇردىنىڭ «ناينۋك», تۇرىكتىڭ «دەستەگيۋل», دۇنگەننىڭ «چۋنتيان» ۇلتتىق انسامبلدەرى كورەرمەندەر كوڭىلىنەن شىعىپ, كوزايىم ەتتى. وبلىستىڭ ءار وڭىرىندە ايتىسكەر اقىندار شورابەك ايداروۆتىڭ, ازىمبەك جانقۇليەۆتىڭ, سەرىك قاليەۆتىڭ مەكتەپتەرى قالىپتاستى. تىڭدارماندارىن تالانتتارىمەن تاڭداندىرعان, قازىردە ەلدى اۋزىنا قاراتىپ جۇرگەن اينۇر تۇرسىنباەۆا, كۇمىسكۇل سارسەنباەۆا, شىرىنبەك قويلىباەۆ, التىنكۇل قاسىمبەكوۆا, مۇحامەدجان تازابەكوۆ – كەزىندە مەكتەپ وقۋشىلارى اراسىندا وزا شاۋىپ بايگە العان جەڭىمپازدار.
جىل سايىن ءبىر اۋىلدا نەمەسە قالادا وتكىزىلەتىن ەتنوگرافيالىق «دوستىق» فەستيۆالى وبلىستاعى ۇلتتار مەن ۇلىستاردىڭ سالت-داستۇرلەرىن, مادەني مۇرالارىن قايتا جاڭعىرتۋعا, ۇلتتاردى ۇيىستىرۋعا تىكەلەي ىقپال جاساعان, كەيىننەن رەسپۋبليكا كولەمىندە قازاقستان حالقى اسسامبلەياسىنىڭ قۇرىلۋىنا سەبىن تيگىزگەن شارا بولعانىن ماقتانىشپەن ايتا الامىز.
بۇگىندە ءوڭىردىڭ ابىز اقساقالىنا اينالعان قايراتكەر اعانى قازاق قوعامىنداعى جاعىمسىز جايتتار تولعاندىرادى, ويلاندىرادى. قوعامداعى كەلەڭسىز كورىنىستەر جاناشىر اعانىڭ جانىنا باتادى. ءتىپتى, «جۇرەگىنە شانشۋداي قادالادى» دەسەك تە, ارتىق ايتقاندىق بولماس.
– اتا زاڭىمىزدا جازىلعان دەموكراتيالىق, الەۋمەتتىك, قۇقىقتىق, زايىرلى جاڭا قوعام ورناتۋ جاستاردىڭ بويىنا اعا ۇرپاق ۇستانعان ادالدىق, ادەپتىلىك, جاۋاپكەرشىلىك, قايىرىمدىلىق, ادىلدىك, يماندىلىق, ادامگەرشىلىك, وتانشىلدىق سىندى اسىل قاسيەتتەردى قانشالىقتى سىڭىرە العانىمىزعا بايلانىستى. زامان وزگەرگەن, پيعىل وزگەرگەن تۇستا بۇل وپ-وڭاي وزگەرە سالاتىن ماسەلە ەمەس. ادامنىڭ قادىر-قاسيەتىن, ازاماتتىق بەدەلىن بايلىقپەن ولشەيتىن دەرت اتام زاماننان كەلە جاتقان قۇندىلىقتار جۇيەسىن جۇدەتىپ, جاس بۋىننىڭ قوعامدىق-ساياسي بەدەلىن تومەندەتەتىنى شىندىق. ول شىندىقتى جاسىرۋ – شىڭىراۋعا قۇلاعانىمىز.
قازان توڭكەرىسىنە دەيىن اباقتىسى, جەتىمدەر ءۇيى, قارتتار ءۇيى بولماعان ەلدە قازىر ۇلتتىق كەيپىمىزگە كىر كەلتىرىپ, نامىسىمىزعا داق ءتۇسىرىپ جۇرگەن كوكەك انالار, تۇنگى كوبەلەكتەر, تاستاندى بالالار, قاراۋسىز قارتتاردىڭ پايدا بولۋى دەرتتىڭ ۇلكەنى عوي. بۇل – قوعامدىق دەرت. بۇل ماسەلە بۇكىل قوعامدى قوبالجىتىپ وتىر. «قىزعا قىرىق ۇيدەن تىيۋ» دەگەن حالىقتىق قاعيدا عاسىرلار بويى قالىڭ قاۋىمعا ار جۇگىنىڭ اۋىرلىعىن مويىنداتىپ, بولاشاق انانىڭ سۇتتەن اق, سۋدان تازا پاكتىگىن قادىرلەپ-قاستەرلەۋدىڭ قاجەتتىگىن سان ۇرپاقتىڭ ساناسىنا سىنالاپ ءسىڭىرىپ كەلمەپ پە ەدى؟! ۇلت رەتىندە قالىپتاسىپ, مەملەكەت بولىپ وتىرعانىمىز سونىڭ ناتيجەسى عوي. ەرتەدەگى اقجۇنىستەر, باياندار, جىبەكتەر مەن قامارلارداي ۇرپاققا ۇران بولعان الدىرمايتىن قامالداردىڭ, مايدانعا اتتانعان ازامات – قۇداي قوسقان قوساعىن ولە-ولگەنشە توسىپ, اق توسەگىن ايالاپ, ساعىنىشىن سايالاپ ادالدىعىن باقيعا الا كەتكەن انا-دانالاردىڭ, بۇگىنگى قىزىعى مەن قۋانىشى سول شاڭىراققا شىراي بەرىپ, بەرەكەسىن ەسەلەپ, ۇل-قىز ءوسىرىپ, نەمەرە-شوبەرەلەر ءسۇيىپ, ۋىزداي ۇيىعان تاتۋلىقتى تۋ ەتىپ, وزگەلەرگە ونەگە ەتىپ وتىرعان ەنەلەر مەن كەلىندەر – مىنا ءفاني دۇنيەنىڭ ساۋلەسى سولعىن تارتپاس شوق جۇلدىزدارى سانالعانداردىڭ ۇردىستەرى قالايشا ۇمىت بولىپ بارادى؟ اي جارىق, كۇن جىلىدا نە كورىندى بىزگە؟!» – دەپ تولعانادى قاشاندا قوعام مۇددەسىن جەكە باس مۇددەسىنەن جوعارى قوياتىن قايراتكەر.
– ادالدىق, ادەپتىلىك, يماندىلىق, ارلىلىق سەكىلدى ادامي قۇندىلىقتاردىڭ ارزانداۋىن بازبىرەۋلەر نارىق زامانى الىپ كەلگەن تۇرمىستىق اۋىرتپالىقتارمەن اقتاعىسى كەلەدى. بىراق, حالقىمىز قانداي قيىندىقتار باسقا تۇسسە دە, ءتىپتى جاۋگەرشىلىك, اشارشىلىق, ناۋبەت كەزىندە دە قادىر-قاسيەتىن جوعالتپاي, ار-ۇياتتى بارىنەن بيىك ۇستاماپ پا ەدى؟! ەندەشە, ماسەلە كەسەلگە ۇشىراعان سانانى ەمدەۋدە بولىپ وتىر. ىزگىلىك قۇندىلىقتارىن جاس ۇرپاق ساناسىنا سىڭىرۋدە وتباسىنىڭ, بالاباقشانىڭ,مەكتەپتەر مەن وقۋ ورىندارىنىڭ, ەڭبەك ۇجىمدارى مەن قازىنالى قارتتاردىڭ, اق جاۋلىقتى ءازىز انالاردىڭ بىرەگەي جۇمىستارى اۋاداي قاجەت. بۇعان قوعامدىق پىكىر قالىپتاستىرىپ, قوزعالىس تۋعىزاتىن باق وكىلدەرى بەلسەنە اتسالىسسا, نۇر ۇستىنە نۇر!, – دەپ تۇيتكىلدى ماسەلەنىڭ ءتۇيىنىن شەشۋدى ۇسىنادى ومىردەن كورگەنى, كوڭىلگە تۇيگەنى كوپ كوسەمسوزشى. بۇل ەشقانداي جىلتىر ءسوز ەمەس, بۇل – ەل دەگەندە ەت جۇرەگى ەزىلەتىن قامقور قاريانىڭ ءسوزى.
مىنە, ويىنداعى وسىنداي يگىلىكتى ىستەردى جۇزەگە اسىرۋدا ەكى رەت قاتارىنان پارلامەنت سەناتىنىڭ دەپۋتاتى بولعان جاندار كارىباي ۇلى كوپ تىرلىكتەر تىندىردى. سەناتتا ايماقتىق دامۋ جانە ءوزىن-ءوزى باسقارۋ جونىندەگى كوميتەتتىڭ جاۋاپتى حاتشىسى بولعان حالىق قالاۋلىسى حالىق مۇددەسىنە ساي كەلەتىن زاڭدار قابىلدانۋىنا بەلسەنە ارالاسىپ, وزگەرتۋلەر مەن تولىقتىرۋلار ەنگىزىلگەن كەيبىر زاڭدارعا ءوزىنىڭ ۇسىنىس-پىكىرىن بىلدىرگەن كەزدەرى كوپ. سەناتور جاندار كارىباي ۇلى 20 زاڭ جوباسىن دايىنداۋعا جەتەكشىلىك ەتكەن. وسى زاڭ جوبالارى قارالعان كوميتەت وتىرىسىندا ول ءوز تۇجىرىمدارىن دالەلدى قورعاي ءبىلدى. قازاقتىڭ «جەتى رەت ولشەپ, ءبىر رەت كەسۋ» تۋرالى قاعيداسىنداعىداي, وندايدا ون ويلانىپ, توقسان تولعانۋ كەرەك.
جانداي كارىباي ۇلى جاۋاپتى حاتشىسى بولعان كوميتەتتە نەگىزىنەن الەۋمەتتىك, دەنساۋلىق, ءبىلىم, مادەنيەت, سپورت ماسەلەلەرى قارالاتىن. سوندا كوميتەت وتىرىستارىندا سەناتوردىڭ جوعارىداعى وي تولعانىستارى دا نازاردان تىس قالعان ەمەس.
جاندار كارىباي ۇلىنىڭ «ات تۇياعىن قىزدىرعان اتامەكەن» اتتى كىتابى بار.وندا اۆتوردىڭ دەپۋتاتتىق قىزمەتىنىڭ قىر-سىرىن اشىپ كورسەتەتىن ماقالالار دا ورىن العان. ولاردى وقىپ وتىرىپ كەيبىر كوبىكاۋىز كوپىرمەلەردىڭ «دەپۋتاتتار قول كوتەرىپ قويىپ قاراپ وتىرادى» دەگەن سيپاتتاعى ويعا ىرىتكى سالاتىن كەرەعار پىكىرلەرىنە جاۋاپ العانداي بولاسىڭ.
جاندار اعا سەناتتاعى دەپۋتاتتىق وكىلەتتىگى اياقتالعان سوڭ بىرقاتار جىل «قازتەلەكوم» اكتسيونەرلىك قوعامىندا جاۋاپتى قىزمەت اتقارعان. سوڭعى كەزدەرى جامبىل وبلىستىق قوعامدىق كەڭەسىنىڭ توراعاسى بولدى.
سانالى عۇمىرىندا اتتان تۇسپەي قىزمەت اتقارعان ازامات قازىر دە قوعامدىق جۇمىستاردىڭ بەل ورتاسىندا. ول – وبلىستىق ارداگەرلەر كەڭەسىنىڭ القا مۇشەسى. بەدەلدى ۇيىمنىڭ بەلسەندىسى.
جاندار اعا – وركەنى وسكەن اۋلەتتىڭ اكەسى. شاتتىق ۇيالاعان شاڭىراقتىڭ وتاعاسى, قازىنالى قاريا.
بولات جاپپار ۇلى,
قازاقستان جۋرناليستەر وداعىنىڭ مۇشەسى
جامبىل وبلىسى
