بايقاۋعا مادەنيەت جانە ونەر سالاسىنىڭ ماماندارى, ادەبيەتشىلەر, تاجىريبەلى اۋدارماشىلار جانە ساحنا شەبەرلەرىنەن قۇرالعان قازىلار القاسى تورەلىك ەتتى. سونىمەن قاتار م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ رەكتورى داريا قوجامجاروۆا, بەلگىلى قوعام جانە مەملەكەت قايراتكەرلەرى, ابايتانۋشى عالىمدار, جوعارى وقۋ ورىندارىنىڭ تاربيە سالاسىنىڭ جەتەكشىلەرى, قالانىڭ بەلسەندى جاستار قاۋىمى قوناق رەتىندە قاتىستى.
جيىندى قازۇاۋ رەكتورى, اكادەميك تىلەكتەس يساباي ۇلى ەسپولوۆ اشتى. تىلەكتەس يساباي ۇلى: «الداعى 2020 جىلى قازاقستان رەسپۋبليكاسى پرەزيدەنتىنىڭ جارلىعىمەن حالقىمىزدىڭ دانا تۇلعاسى, ۇلى ابايدىڭ 175 جىلدىق مەرەيتويى كەڭىنەن اتاپ وتىلەدى.
ءبىزدىڭ ۋنيۆەرسيتەتىمىزدىڭ 90 جىلدىعى وسى ۇلكەن مەرەكەمەن سايكەس كەلىپ وتىر. ءبىز مۇنى جاقسى ىرىمعا بالاپ وتىرمىز. ويتكەنى اباي – قازاق حالقىنىڭ عانا ماقتانىشى ەمەس, ول – بۇكىل تۇركى دۇنيەسىنە ورتاق رۋحاني قۇبىلىس, الەمدىك تۇلعا.
بۇگىن وسى بايقاۋدىڭ قورىتىندى سالتاناتتى شاراسىنا جينالىپ وتىرمىز. بۇل بايقاۋ جاستاردىڭ ۇلتتىق ساناسىن جاڭعىرتۋدى, ۇلى اباي شىعارمالارىن ۇرپاق اراسىندا كەڭىنەن ناسيحاتتاۋدى, ستۋدەنتتەردى الەم تىلدەرىن ۇيرەنۋگە ىنتالاندىرۋدى, جوعارى وقۋ ورىندارىندا ءبىلىم الۋشى جاستاردىڭ رۋحاني بايلانىسىن ارتتىرۋدى كوزدەيدى».
شارانى قازاق ۇلتتىق اگرارلىق ۋنيۆەرسيتەتى «ALQA Foundation» حالىقارالىق مادەنيەت قورى, قازاقستان حالقى اسسامبلەياسى جانە دوستىق ۇيىمەن بىرلەسىپ ۇيىمداستىردى. 2019 جىلدىڭ قازان ايىندا الماتى قالاسى جوعارى وقۋ ورىندارىنىڭ ستۋدەنتتەرى اراسىندا «اباي – الەم تىلدەرىندە» اتتى مانەرلەپ وقۋ بايقاۋى جاريالانعان بولاتىن.
بايقاۋ ستۋدەنت جاستاردىڭ ۇلتتىق ساناسىن جاڭعىرتۋدا ادەبيەتتىڭ ورنىن نىعايتىپ, وعان قىزىعۋشىلىعىن ارتتىرۋ, جاستار اراسىندا ۇلى اباي شىعارمالارىن ناسيحاتتاۋ, ستۋدەنت جاستاردىڭ الەم تىلدەرىن ۇيرەنۋگە ىنتاسىن ارتتىرۋ, جاستاردىڭ شىعارماشىلىق الەۋەتىن دامىتۋ, پوليمادەنيەتتى تۇلعا قالىپتاستىرۋ, جوعارى وقۋ ورىندارىندا وقيتىن ستۋدەنت جاستاردىڭ رۋحاني بايلانىسىن ارتتىرۋدى كوزدەيدى.
بايقاۋدىڭ ىرىكتەۋ تۋرىندا الماتى قالاسىنىڭ 12 جوعارى وقۋ ورنىنان 21 قاتىسۋشى ونەرلەرىن ورتاعا سالدى. كونتسەرتتىك باعدارلامامەن ورنەكتەلگەن شارادا ستۋدەنتتەر اباي قۇنانباەۆتىڭ ولەڭدەرىن قازاق, ورىس, اعىلشىن جانە تاعى باسقا تىلدەردە وقىدى.
«ALQA Foundation» حالىقارالىق مادەنيەت قورىنىڭ پرەزيدەنتى الۋا تاڭجارىقوۆا تورەلىك ەتكەن قازىلار القاسىنىڭ قۇرامىندا ەگيپەت مادەني جانە ءبىلىم بەرۋ ىستەرى بويىنشا اتتاشە, دوكتور راندا ماحمۋد ريزك, و.سۇلەيمەنوۆ اتىنداعى الەۋمەتتىك-گۋمانيتارلىق ءبىلىم بەرۋ جانە تاربيە ينستيتۋتىنىڭ ديرەكتورى ەسەنكەلدى مەدەۋوۆ, قازاقستان-بريتان تەحنيكالىق ۋنيۆەرسيتەتىنىڭ پروفەسسورى جانات داۋلەتبەكوۆا, ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ عىلىمي قىزمەتكەرى, تۇركولوگ تيمۋر تالعات ۇلى بولدى.
بايقاۋدىڭ شەشۋشى كەزەڭىندە جەڭىمپازدارعا جۇلدەلى ورىندار مەن سىيلىقتار تابىس ەتىلدى. باس جۇلدە جانە 100 مىڭ تەڭگە سىياقىنى بوتاكوز يۆاش (ابىلايحان ات. قازحقجاتۋ), 1 دارەجەلى ديپلوم جانە 50 مىڭ تەڭگە سىياقىنى ناريمان باقىتجان (اباي ات. قازۇپۋ), ۇلپان جولداسبەكوۆا (قازۇاۋ), 2 دارەجەلى ديپلوم مەن 25 مىڭ تەڭگە سىياقىنى قارجاۋباي قاناعات (نۇر-مۇباراك ەگيپەت يسلام مادەنيەتى ۋنيۆەرسيتەتى), اقبوتا ءسىلام (س.دەميرەل ات. ۋنيۆەرسيتەت), 3 دارەجەلى ديپلوم مەن 15 مىڭ سىياقىنى ايان جولدىعاليەۆ (نۇر-مۇباراك ەگيپەت يسلام مادەنيەتى ۋنيۆەرسيتەتى), ايگەرىم ماراتقىزى (اباي ات. قازۇپۋ), ايگۇل جۇسىپقاليەۆا (س.اسفەندياروۆ اتىنداعى قازۇمۋ) يەلەندى.
سونىمەن قاتار و.سۇلەيمەنوۆ اتىنداعى الەۋمەتتىك-گۋمانيتارلىق ءبىلىم بەرۋ جانە تاربيە ينستيتۋتىنىڭ ديرەكتورى ەسەنكەلدى ءومىرجان ۇلى قازۇاۋ رەكتورى تىلەكتەس يساباي ۇلىنىڭ اتىنان تاعايىندالعان ارنايى جۇلدەنى (50 مىڭ تەڭگە) كاريما باتتالوۆاعا ء(ال-فارابي اتىنداعى قازۇۋ) تابىس ەتتى. بارلىق قاتىسۋشىلار گراموتالارمەن, جوعارى وقۋ ورنىنان كەلگەن جەتەكشىلەر سەرتيفيكاتتارمەن, سىيلىقتارمەن ماراپاتتالدى.
شارا سوڭىندا «ALQA Foundation» حالىقارالىق مادەنيەت قورىنىڭ پرەزيدەنتى الۋا تاڭجارىقوۆا جيىندى قورىتىندىلادى, قازاقستان حالقى اسسامبلەياسىنىڭ ساراپشىسى گۇلميرا بيليالوۆا قۇتتىقتاۋ ءسوز سويلەپ, بارلىق قاتىسۋشىلارعا اسسامبلەيا اتىنان كىتاپتار تابىس ەتتى.
