ەلوردالىق مەكتەپتە وتكەن كەزدەسۋگە ۇستازدار قاۋىمى, اتالعان زاڭ جوباسى بويىنشا جۇمىس توبىنىڭ مۇشەلەرى, قۇزىرلى مينيسترلىكتىڭ وكىلدەرى قاتىستى. ءماجىلىس توراعاسى ءوز سوزىندە:
– ەلباسى نۇرسۇلتان نازارباەۆتىڭ جانە مەملەكەت باسشىسى قاسىم-جومارت توقاەۆتىڭ مۇعالىمدەر مەن وقۋشىلار جۇكتەمەسىن قىسقارتۋ, ءوز مىندەتتەمەلەرىنە كىرمەيتىن جۇمىستان بوساتۋ تۋرالى باسقا دا تاپسىرمالارى بار. بىرنەشە ايدان بەرى زاڭ جوباسى ءماجىلىستىڭ بارلىق كوميتەتتەرىندە تياناقتى ءارى جان-جاقتى قارالۋدا, – دەدى.
ءماجىلىس سپيكەرى اتاپ وتكەندەي, بۇگىنگە دەيىن جۇمىس توبىنىڭ 21 وتىرىسى ءوتىپ, 100-دەن استام تۇزەتۋلەر قارالعان. دەگەنمەن, زاڭ جوباسىن بۇگە-شىگەسىنە دەيىن تىڭعىلىقتى ازىرلەۋ ءۇشىن پارلامەنت وكىلدەرى وسى كەزدەسۋدى ۇيىمداستىرىپ وتىر.
كەزدەسۋ بارىسىندا ءماجىلىس توراعاسى ۇستازداردىڭ مىندەتتەمەلەرىنە كىرمەيتىن جۇمىستاردى ورىنداۋعا ماجبۇرلەۋدەن قورعاۋ, نەگىزسىز تەكسەرۋلەرگە تىيىم سالۋ سىندى ماسەلەلەرگە باسا نازار اۋداردى.
سونداي-اق مۇعالىمدەردىڭ اتاق-ابىرويىن قورعاۋعا دا كوڭىل ءبولىندى. ءماجىلىس سپيكەرى نورماتيۆتىك وقۋ جۇكتەمەسىنە توقتالىپ, مۇعالىمدەر جۇكتەمەسىن قىسقارتۋدى قاراعان كەزدە, وقۋشىلاردىڭ دا اپتالىق جۇكتەمەسىن ازايتۋدى ويلانۋ قاجەتتىلىگىنە توقتالدى.
ءوز كەزەگىندە ۇستازدار قاۋىمى زاڭ جوباسىنىڭ ماڭىزدى نورمالارىن تالقىلاۋعا زور قىزىعۋشىلىق تانىتتى.
كەزدەسۋ سوڭىندا ن. نىعماتۋلين اتالعان زاڭ جوباسىنىڭ بارلىق تالاپتارعا ساي, ساپالى بولۋى ءۇشىن ۇستازدار تاراپىنان ايتىلعان بارلىق ۇسىنىس-پىكىرلەر جان-جاقتى تالدانىپ, بارىنشا ەسكەرىلەتىنىن اتاپ ءوتتى.
پەداگوگتار ماڭىزدىلىعىن ەسكەرە وتىرىپ, ۇيىمداستىرىلعان كەزدەسۋ ءۇشىن ءوز ريزاشىلىقتارىن ءبىلدىردى.
