قوعام ءۇشىن قاجەتتىلىگى زور وسىناۋ مىندەتتى ورنىقتى ورىنداۋ ماقساتىندا ءبىلىم جانە عىلىم مينيسترلىگى «قارجى ورتالىعى» اق-مەن بىرلەسىپ, مەملەكەتتىك تاپسىرىستى ورنالاستىرۋ رەتتىلىگىن ازىرلەپ شىقتى. وندا ماڭىزدى ىسكە جەكە سەكتوردىڭ كەڭىنەن قاتىسۋ شارتتارى مەن تەتىكتەرى جان-جاقتى جۇيەلى نەگىزدە قاراستىرىلعان.
وسىعان وراي, بۇگىندە ينۆەستورلار مەن جەكە كاسىپكەرلەردىڭ ءوزارا ءتيىمدى شارتتار ارقىلى ستۋدەنتتىك جاتاقحانالار قۇرىلىسىن سالۋعا ات سالىسۋ مۇمكىندىگى مەيلىنشە مول. وسى تۇرعىدا ولاردىڭ بۇل ۇدەرىسكە اۋقىمدى تۇردە, ناقتىلاي تۇسسەك, تەك الەۋمەتتىك نىسان سالۋ رەتىندە ەمەس, تابىستى, تۇراقتى جانە كەلەشەگى كەمەل بيزنەس-جوبا رەتىندە نازار سالعاندارى ءجون. ەڭ باستىسى, مۇنى ءىس جۇزىنە اسىرۋدىڭ قولايلى العىشارتتارى بار.
ۇسىنىستىڭ قاشاندا سۇرانىستان باستاۋ الاتىنى بارشاعا ءمالىم جايت. ماسەلەن, بۇگىنگى تاڭدا ەل اۋماعىندا ستۋدەنتتەر ءۇشىن 75 مىڭ ورىن-جايدى قولدانىسقا ەنگىزۋ قاجەتتىلىگى تۋىنداپ وتىر. ونىڭ ىشىنە ەلىمىزدىڭ ءىرى قالالارىنان باستاپ, وبلىستىق ماڭىزى بار قالالاردى قامتيتىن بارلىق وڭىرلەر كىرەدى.
ەندى, ستۋدەنتتەر جاتاقحاناسى قۇرىلىسىنا مەملەكەت قارجىسىن سالۋ ماسەلەسىنە قايىرا ورالىپ, شارتتىلىقتاردى تالداۋعا تالپىنىس جاساپ كورسەك. ىلكىمدى ىسكە بىلەك سىبانا كىرىسكەن ينۆەستور نەمەسە جەكە كاسىپكەر نىساندى (جاتاقحانانى) ستۋدەنتتەر يگىلىگىنە پايدالانۋعا بەرگەننەن كەيىن مەملەكەت تاراپىنان 8 جىل بويى ۇزدىكسىز نەگىزدە مەملەكەتتىك تاپسىرىستى ورنالاستىرۋ جولىمەن اقشا تولەمدەرى جۇرگىزىلەتىن بولادى. وسى ورايدا, تولەمدەردىڭ مولشەرى پايدالانۋعا ەنگىزىلگەن جانە ءبىلىم الۋشى ناقتى ورنالاسقان ورىن-جايلار سانىنا بايلانىستى بولاتىنىن ەسكەرتە كەتكەن ابزال. جىل سايىن ءار ورىن-جاي ءۇشىن جاڭادان جاتاقحانا سالىنعان جاعدايدا – 122 اەك, عيماراتتى جاتاقحانا رەتىندە رەكونسترۋكتسيالاۋ جاسالعان جاعدايدا 47 اەك كولەمىندە قارجى تولەنەدى.
بۇل باستاما بۇدان دا بولەك تابىس كوزى بولۋ مۇمكىندىگىمەن ءتيىمدى. ويتكەنى, ستۋدەنتتەر تولەيتىن اي سايىنعى تۇرۋ اقىسى مەملەكەت تاپسىرىسىنىڭ قۇنىنا كىرمەيدى. ونىڭ مولشەرىن جاتاقحانانىڭ مەنشىك يەسى دەربەس رەتتەيدى جانە ول ناقتى وڭىردەگى تۇرعىن ءۇي نارىعىنىڭ شىنايى شارتتارىنا سايكەس انىقتالادى.
سونىمەن بىرگە قۇرىلىستى سالۋشى نەمەسە عيماراتقا رەكونسترۋكتسيا جاساۋشى تاراپ (مەنشىك يەسى) تۇرمىستىق قىزمەتتەر كورسەتۋ ماقساتىندا كوممەرتسيالىق الاڭدار جاساقتاۋعا قۇقىلى. ولاردىڭ نەگىزگى تۇتىنۋشىلارى, ارينە, جاتاقحانا تۇرعىندارى بولارى كۇمانسىز.
جوباعا قاتىسۋدىڭ ءبىرشاما شارتتارى بار, ونىڭ باستىسى – قولعا العان ءىستى ىلگەرى باستىرۋ ءۇشىن باستاپقى كاپيتال مەن جەر تەلىمىنىڭ بولۋى. جەر تەلىمى بولماعان جاعدايدا ءبىز ونى مەملەكەت-جەكەمەنشىك ارىپتەستىك تەتىگى ارقىلى, وڭىرلەردىڭ الەۋمەتتىك كاسىپكەرلىك كورپوراتسيالارىمەن بىرگە جوباعا باستاماشى بولۋ نەمەسە كونسورتسيۋم قۇرۋ جولىمەن رەسۋرستاردى بىرىكتىرۋ ارقىلى الۋدىڭ بىرقاتار ءتيىمدى جولدارىن ۇسىنامىز.
سونىمەن قاتار, ەگەر بەلگىلى ءبىر تۇلعا عيماراتتىڭ مەنشىك يەسى بولسا, ونى جاتاقحاناعا بەيىمدەپ رەكونسترۋكتسيا جاساۋ جانە وعان مەملەكەتتىك تاپسىرىستى ورنالاستىرۋ ماقساتىندا تارتىنباي تالاپتانۋعا بولادى.
جوبانى ءىس جۇزىندە جۇزەگە اسىرۋ جۇمىستارى قولعا الىنعاننان بەرى جوعارىدا اتالعان مازمۇنداعى 38 الدىن الا شارت جاسالدى, سونىڭ ناتيجەسىندە 11 مىڭنان استام جاڭا ورىن-جاي قولدانىسقا تاپسىرىلىپ, ستۋدەنتتەر يگىلىگىنە اينالماق.
ماسەلەن, بيىلعى قاراشا ايىنداعى جاعداي بويىنشا 2 287 ورىندى قامتيتىن 11 نىساندى پايدالانۋعا بەرۋ قامتاماسىز ەتىلدى (شىمكەنت قالاسى: جك «كايپوۆا» – 350, «وڭتۇستىك قازاقستان مەديتسينا اكادەمياسى» اق – 250; الماتى قالاسى: قازاقستان ينجەنەرلىك-تەحنولوگيالىق ۋنيۆەرسيتەتى – 188, ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتى – 260; اقتاۋ قالاسى: جك «گۋسەينوۆ» – 180, ش.ەسەنوۆ اتىنداعى كاسپي مەملەكەتتىك تەحنولوگيا جانە ينجينيرينگ ۋنيۆەرسيتەتى – 170; قاراعاندى قالاسى: جك «رىسپاەۆا» – 100; سەمەي قالاسى: «قاينار» جوعارى كوللەدجى – 105, وسكەمەن قالاسى: «قازاقستان-امەريكاندىق ەركىن ۋنيۆەرسيتەتى» جشس – 106; پاۆلودار قالاسى – «RnR Group» جشس – 178, قىزىلوردا قالاسى – «ديلماش» جشس – 330 ورىن).
جوباعا قىزىعۋشىلىق تانىتقان مۇددەلى تاراپتارعا قاتىسۋ شارتتارىمەن تولىق تانىسۋ ءۇشىن studdom.kz سايتىنا كىرۋ جانە 8-8000-802-828 ءنومىرى ارقىلى بعم قارجى ورتالىعىنىڭ كولل-ورتالىعىنا حابارلاسۋ قاجەت. ال ودان كەيىنگى قادام – شارت جاساسۋ ءۇشىن قارجى ورتالىعىنا ءوتىنىش بەرۋ كەرەك.
ءبىز, ارينە, ماۋەلى جەمىسىن بەرەر ەكىجاقتى ءتيىمدى ارىپتەستىككە قاشان دا مۇددەلىمىز.
«قارجى ورتالىعى» اق
