جاستار جىلى مەن قازاق ۇلتتىق قىزدار پەداگوگيكالىق ۋنيۆەرسيتەتىنىڭ 75 جىلدىعى اياسىنداعى كەش قىسقى ەرتەگى جەلىسىمەن وتەدى. كەش دەبيۋتانتتاردىڭ ورىنداۋىنداعى بيمەن اشىلادى. بالعا قىزدار ۋنيۆەرسيتەتىنىڭ ستۋدەنتتەرى مەن قر ۇقك اسكەري اكادەمياسىنىڭ كۋرسانتتارى قاتىسپاق.
سونداي-اق شارا شەڭبەرىندە پەداگوگيكالىق وقۋ ورنىنىڭ وقىتۋشىلارى مەن ستۋدەنتتەرىنىڭ شىعارماشىلىق جۇمىستارى مەن ەرەكشە ونەر تۋىندىلارى اۋكتسيونعا قويىلىپ, باعالى جادىگەرلەر ويناتىلادى. بالدان جانە اۋكتسيوننان تۇسكەن قاراجات I-توپتاعى مۇگەدەك ايسۇلتان اسىلحان ەسىمدى جەتكىنشەكتىڭ ەمىنە جۇمسالادى.
ۆەنالىق ۇلگىدەگى بالعا ساياسات پەن بيزنەس وكىلدەرى, شەتەلدىك جانە وتاندىق جەتەكشى جوعارى وقۋ ورىندارىنىڭ باسشىلارى, عالىمدار, مەملەكەت جانە قوعام قايراتكەرلەرى جانە مادەنيەت سالاسى مەن ماسس-مەديا ماماندارى قاتىسادى دەپ كۇتىلۋدە. سونىمەن قاتار وعان قايىرىمدىلىق پەن مەتسەناتتىقتى ءومىرىنىڭ باستى قاعيداسى رەتىندە سانايتىن ازاماتتار دا شاقىرىلىپ وتىر.
– الماتى قالاسىنىڭ قوعامدىق جانە مادەني ومىرىندەگى ايتۋلى شارانىڭ باستى ماقساتى – جاستاردى بەكزات ونەرگە تارتۋ ارقىلى ولاردى جوعارى مادەنيەتتىلىككە, يناباتتىلىق پەن قايىرىمدىلىققا باۋلۋ, قوعامدا «الماتى – ىزگى ىستەر قالاسى» تۇسىنىگىن قالىپتاستىرۋ جانە ونى ناقتى ىسكە اسىرۋ. سونىمەن قاتار وڭتۇستىك استانانىڭ ەلىمىزدىڭ مادەني ورتالىعى رەتىندەگى ءيميدجىن ودان ارمەن كوتەرۋدى كوزدەيتىن شارا شىعارماشىلىق الەۋەتى جوعارى تالانتتى جاستاردى انىقتاۋعا ۇلەس قوسپاق, – دەيدى قىزدار ۋنيۆەرسيتەتىنىڭ ءباسپاسوز قىزمەتىنىڭ جەتەكشىسى جاندار اسان.
