ءبىز ۇلتتىق اس دەگەندە اۋىزعا ەت, قۋىرداق, قۇرت, قىمىز جانە تاعى ءبىردى-ەكىلى اتاۋلاردى عانا الامىز دا, سونىمەن شەكتەلىپ قالامىز. ال شىن مانىسىندە, قازاقتىڭ اسحاناسى سان قىرلى جانە ول بىرەگەيلىگىمەن تاڭداي قاقتىرادى. مىسالى, «حالىق قازىناسى» عزي ماتەريالدىق ەمەس مادەني مۇرا ءبولىمىنىڭ جەتەكشىسى, ەتنوگراف ايگەرىم مۇساعاجينوۆانىڭ ايتۋىنشا, بۇگىنگى كۇندە قازاقتىڭ 200-گە تارتا تاعامىنىڭ ازىرلەنۋ قۇپيالارى قالپىنا كەلتىرىلگەن ەكەن.
شارا بارىسىندا قوناقتارعا ءداستۇرلى ەت, ءسۇت تاعامدارى, ۇن ونىمدەرى مەن سۋسىنداردى ازىرلەۋ جانە ولاردىڭ بيولوگيالىق قۇندىلىعىنىڭ تەحنولوگياسى تۋرالى جان-جاقتى اقپارات بەرىلدى. سونداي-اق ۇمىتىلعان رەتسەپتەر بويىنشا ازىرلەنگەن تاعامدار فەستيۆال قاتىسشىلارىنىڭ زور قىزىعۋشىلىعىن تۋدىردى.
بايقاۋ ۇمىتكەرلەرىنىڭ جۇمىستارىنا اقپارات جانە قوعامدىق كەلىسىم مينيسترلىگىنىڭ وكىلدەرى, قازاقستان حالقى اسسامبلەياسىنىڭ مۇشەلەرى جانە قوعام قايراتكەرلەرى باعا بەردى. ولاردىڭ شەشىمىمەن باقىتتى قاناپينوۆا, گۇلميرا كارىباەۆا جانە گۇلجان ۇزدەنباەۆا اتالعان فەستيۆالدىڭ جەڭىمپازدارى بولىپ تانىلدى. بۇل ۇشتىك ەندى نۇر-سۇلتان قالاسىندا وتەتىن قورىتىندى كەزەڭدە باق سىنايتىن بولدى.
– قازاقستاندا گاسترونوميالىق ءتۋريزمدى باتىل تۇردە دامىتۋعا بولادى. ۇلتتىق تاعامدار تۋرالى ءسوز بولعاندا, ولاردىڭ ادامدى باۋراپ الاتىن ءۇش نەگىزگى ساپاسى – ءدامى, ءيىسى جانە ءتۇسى جونىندە ماقتانىشپەن ايتۋعا بولادى. ال ەت, ءسۇت جانە استىق ءدانى جاراسىمدى ۇيلەسىم تاپقان تاعامداردان ءدام تاتقان شەتەلدىك ازاماتتاردىڭ ءبىزدىڭ ەلگە قايتا كەلگىسى كەلىپ تۇرارىنا سەنىم مول. ءبىزدىڭ ۇلتتىق ءاسۇي بابالاردان قالعان اسىل مۇرا جانە ول ءىستىڭ قيۋىن تاپسا, ەل قازىناسىنا وراسان زور تابىس اكەلەتىن سالا, – دەيدى ۇيىمداستىرۋشىلار.
