ءىس-شارانىڭ ماقساتى – زاڭ جوبالارىن مەملەكەتتىك تىلدە دايىنداۋعا قاتىستى ماسەلەلەردى تالقىلاۋ مەن ولار بويىنشا ۇسىنىمدار ازىرلەۋ, زاڭ جوبالارىن مەملەكەتتىك تىلدە دايىنداۋدا عىلىمي لينگۆيستيكالىق ساراپتاما جۇرگىزۋدىڭ ماسەلەلەرى جونىندە پىكىر الماسۋ.
دوڭگەلەك ۇستەل جۇمىسىنا پرەزيدەنت اكىمشىلىگىنىڭ, پارلامەنت پالاتالارى اپپاراتتارىنىڭ, ۇكىمەتتىڭ, ادىلەت مينيسترلىگىنىڭ جانە ورتالىق مەملەكەتتىك ورگانداردىڭ جاۋاپتى تۇلعالارى مەن وكىلدەرى, پارلامەنت دەپۋتاتتارى, سونىمەن بىرگە زاڭ, فيلولوگيا ءبىلىمى سالاسىنىڭ تانىمال عالىمدارى قاتىستى. ءىس-شارانى سەنات دەپۋتاتى, الەۋمەتتىك-مادەني دامۋ جانە عىلىم كوميتەتىنىڭ توراعاسى مۇرات باقتيار ۇلى جۇرگىزىپ وتىردى.
ادىلەت ءمينيسترى مارات بەكەتاەۆ ءوزىنىڭ كىرىسپە سوزىندە دوڭگەلەك ۇستەلدىڭ زاڭ جوبالارىن مەملەكەتتىك تىلدە ازىرلەۋ ماسەلەسىنە قاتىستى اعىمداعى جىلدىڭ 27 قىركۇيەگى كۇنى پارلامەنت سەناتىندا وتكىزىلگەن «زاڭ شىعارۋ پروتسەسىن ودان ءارى جەتىلدىرۋ» تاقىرىبىنا ارنالعان پارلامەنتتىك تىڭداۋلار ۇسىنىمدارىن ىسكە اسىرۋمەن بايلانىستىلىعىن جانە بۇل ۇلتتىق زاڭنامانى جەتىلدىرۋدە ناقتى مىندەتكە اينالۋى قاجەتتىگىن اتاپ ءوتتى. مينيستر سونىمەن قاتار بارلىق مەملەكەتتىك ورگاندى وسى دوڭگەلەك ۇستەلدىڭ ۇسىنىمدارىن ىسكە اسىرۋعا بايلانىستى ءىس-شارالاردى ۋاقتىلى جانە ساپالى وتكىزۋگە شاقىردى. ال ءىس-شارا اياسىندا تالقىلانعان تاقىرىپ زاڭ جوبالارىن مەملەكەتتىك تىلدە دايىنداۋدى قامتاماسىز ەتۋ شارالارىن ويلاستىرۋعا جانە ناتيجەگە قول جەتكىزۋگە سەپتىگىن تيگىزەتىن بولادى.
دوڭگەلەك ۇستەلدە ءسوز سويلەگەن سەنات دەپۋتاتى سارسەنباي ەڭسەگەنوۆ, ءماجىلىس دەپۋتاتتارى نۇرلان دۋلاتبەكوۆ, اسىلبەك سماعۇلوۆ زاڭ جوبالارىن مەملەكەتتىك تىلدە دايىنداۋدىڭ ەرەكشەلىكتەرىنە توقتالدى. پارلامەنت سەناتى اپپاراتى رەداكتسيالىق-باسپا ءبولىمى مەڭگەرۋشىسىنىڭ ورىنباسارى, فيلولوگيا عىلىمدارىنىڭ دوكتورى, پروفەسسور ەربول ءابدىراسىلوۆ, پارلامەنت ءماجىلىسى اپپاراتىنىڭ رەداكتسيالاۋ جانە اۋدارما ءبولىمىنىڭ مەڭگەرۋشىسى ءداۋىتالى وماش ۇلى, تاعى باسقالار زاڭ جوبالارىن مەملەكەتتىك تىلدە دايىنداۋدىڭ ۇيىمداستىرۋشىلىق, عىلىمي سۇيەمەلدەۋ, راسىمدىك ەرەكشەلىكتەرى مەن نورماتيۆتىك رەتتەۋ, وزگە دە ماڭىزدى ماسەلەلەرى بويىنشا ءسوز سويلەدى.
جارىسسوزدە ۇلتتىق زاڭنامانىڭ قازىرگى كەزدەگى جاي-كۇيىنىڭ ماسەلەلەرى مەن زاڭ جوبالارىن مەملەكەتتىك تىلدە دايىنداۋ بويىنشا اتقارىلاتىن ىستەر تالقىلاندى.
دوڭگەلەك ۇستەلدىڭ قورىتىندىلارى نەگىزىندە زاڭ جوبالارىن مەملەكەتتىك تىلدە دايىنداۋ بويىنشا ۇسىنىمدار قابىلداندى. ۇسىنىمدار ءىس-شاراعا قاتىسۋشىلاردىڭ پىكىرلەرىمەن تولىقتىرىلىپ پىسىقتالعاننان كەيىن, ۋاكىلەتتى مەملەكەتتىك ورگاندارعا جىبەرىلەتىنىن ايتا كەتۋ كەرەك.
