وسىنداعى كوپ شاكىرتتەردىڭ ءبىرى بولسا دا, ادامعا جاقىندىعىمەن, ەلگەزەكتىگىمەن نازار اۋدارتقان. انا تىلىندە جاتىق سويلەيتىنى سۇيسىنتكەن. اراعا جىلدار سالىپ كەزدەسكەنىمىزدە دارداي جىگىت بولىپ قالعان ول كوزىمە وتتاي باسىلىپ, بۇرىننان ارالاس-قۇرالاس جاندارشا شۇرقىراسا تابىسقانبىز. تاعدىردىڭ جازۋىنا نە شارا, ءسالىمحان بەسىكتەن بەلى شىقپاي جاتىپ سال اۋرۋىنا شالدىقتى. جازىلماس كەسەلدىڭ زاردابىن ابدەن تارتتى. ءومىردىڭ قيىندىقتارىمەن كوبىرەك بەتپە-بەت كەزدەسكەندىكتەن ەرتە ەسەيدى. اعىسقا قارسى ءجۇزۋدى, مويىماۋدى, جەڭە ءبىلۋدى ۇيرەندى. اتا-اجەسى, اكە-شەشەسى, ۇستازدارى قوعامدىق ورتادان ءوز ورنىن تابۋىنا كوپ جاردەمدەستى. ءوزى دە مىندەتىن وزگەلەرگە ارتا سالماي كەز كەلگەن ماسەلەنى جەكە-دارا شەشۋگە داعدىلاندى, نامىسىن جانىدى, شيرىقتى, شيرادى. قايسارلىق, كۇرەسكەرلىك سەكىلدى تاباندى قاسيەتتەردى بويىنا جيناقتادى. باسى سالبىراپ تومەنشىكتەي, شەگىنشەكتەي بەرسە, نەسىبەسىنەن قۇر قالاتىنىن, تەك وزىنە عانا سەنۋ كەرەكتىگىن ۇعىندى. مەكتەپتى جاقسى ءبىتىرىپ, جوعارى وقۋ ورنىنا ءتۇستى. جۋرناليست ماماندىعىن الىپ شىقتى. كىممەن ارالاسسا دا, قاي ورتادا جۇرسە دە, مۇگەدەكپىن دەپ قىمسىنبادى. اياق-قولى ساۋ زامانداستارىنان وق بويى وزىپ جۇرۋگە, ول ءۇشىن جان-جاقتى بىلىمدىلىكپەن, عىلىم جەتىستىكتەرىن يگەرۋمەن مويىنداتۋعا ۇمتىلدى. مەكتەپ-ينتەرنات قابىرعاسىندا بىرگە وقىعان دوسى اقجان كارىموۆپەن ىنتىماقتاسا جۇمىس ىستەپ, كوپتەگەن وزىق يدەيالار مەن جارقىن باستامالاردىڭ جارشىسى بولدى. «اردوس جۇرەك» مۇگەدەكتەر بىرلەستىگىن قۇرىسىپ, ماڭايىنا ءتۋابىتتى كەسەل جابىسقان تاعدىرلاستارىن توپتاستىردى. ونداعى ماقسات – ويلارىن دا, بويلارىن دا سەرگەك ۇستاپ, قوعامنىڭ بەلسەندى, پايدالى مۇشەسى رەتىندە سەزىنۋ, دەربەس ءومىر سۇرۋگە يكەمدەلۋ, ەل قاتارلى قىزمەت ەتۋ ەدى. جاسىراتىنى جوق, ارالارىندا وزدەرىن باسقالاردان تومەن ساناپ, ءتورت قابىرعاعا تەلمىرىپ, ءتىپتى ماسىلدىق پيعىلعا بوي ۇرعاندارى جوق ەمەس-ءتى. سونداي ساناتتاعىلاردى قاتارعا تارتىپ, قيىندىققا مويىماۋعا, العا ۇمتىلۋعا, پايدالى كاسىپپەن اينالىسۋعا جىگەرلەندىردى.
ءسالىمحاننىڭ ءبىر ويى – مۇمكىندىگى شەكتەۋلى جاندارعا ارنالعان ارنايى اۆتومەكتەپ اشۋ ەدى. ونىڭ ەسەبىنشە, وبلىس ورتالىعىندا عانا تىرەك-قيمىل جۇيەسى زاقىمدانعان سەگىز مىڭعا جۋىق جان تۇرادى ەكەن. ارقايسىسىنىڭ كوكەيىندە شىركىن, كولىك جۇرگىزسەم دەگەن اپپاق ارماننىڭ بۇعىپ جاتقانى انىق. ەلباسىنىڭ «بەس الەۋمەتتىك باستاماسى» بويىنشا ەڭ ۇزدىك الەۋمەتتىك جوبا بايقاۋى جاريالانعانىن ەستىپ, باعىن سىناپ كورۋدى ۇيعاردى. ءبىر قايناۋى ىشىندە جۇرگەن يدەيانىڭ ءيىنىن قاندىرىپ, جەتىلدىرگەننەن كەيىن قاعاز بەتىنە ءتۇسىرىپ, بيزنەس-جوسپارعا اينالدىردى. رەسپۋبليكالىق كەزەڭدە وبلىستىڭ نامىسىن قورعاپ, ستارتاپ بايقاۋىنىڭ جەڭىمپازى اتاندى. ۇتىپ العان قاراجاتقا «Granta» جەڭىل كولىگى ساتىپ الىنىپ, رەسەيدىڭ چەليابى قالاسىندا مۇگەدەك ادامدارعا قولمەن باسقارۋعا ىڭعايلانىپ جاسالدى. ارنايى قوندىرعىلاردى ورناتۋعا جەرگىلىكتى مەتسەناتتار قارجىلىق قولداۋ كورسەتتى. تالاپقا ساي جاراقتاندىرىلعان كولىك تىركەۋدەن ءوتىپ, اۆتومەكتەپ اشىلعاندا مۇمكىندىگى شەكتەۋلى جاندار قانداي قۋاندى دەسەڭشى! بۇل جەردە نەگىزىنەن تىرەك-قيمىل اپپاراتى زاقىمدانعاندار وقيدى. ءتورت ادام كۋرستى اياقتاپ, ءتيىستى قۇجاتتارىن الدى. سولاردىڭ ءبىرى – ەكاتەرينا زالەتسكايا. ول قازىر اۆتوكولىكتى ەركىن جۇرگىزەدى.
جاقىندا نۇر-سۇلتان قالاسىندا «قازاقستاننىڭ ۇزدىك الەۋمەتتىك جوبالارى» رەسپۋبليكالىق بايقاۋىنىڭ قورىتىندىسى شىعارىلدى. ماراپاتتاۋ ءراسىمى تاۋەلسىزدىك سارايىندا پرەمەر-ءمينيستردىڭ ورىنباسارى بەردىبەك ساپارباەۆتىڭ قاتىسۋىمەن ءوتىپ, ۇزدىك جوبالار بەس باعىت بويىنشا باعالاندى. بايقاۋعا 224 ءوتىنىم ءتۇسۋى ماڭىزدىلىعىنىڭ جوعارى دارەجەدە بولعانىن ايعاقتاسا كەرەك. ولاردان 57 جوبا ىرىكتەلىپ الىنىپ, جۇزدەن وزعان جۇيرىكتەرگە قۇرمەت كورسەتىلدى. ءۇشىنشى جۇلدەلى ورىندى ماعجان ەلىنەن كەلگەن ءسالىمحان ءسابيتوۆ يەلەنىپ, جارتى ميلليون تەڭگەنىڭ سەرتيفيكاتى تاپسىرىلدى. كوميسسيا مۇشەلەرى ول ۇسىنعان «تەڭ جول» جوباسى قولمەن باسقارىلاتىن كولىكتە اۆتوموبيل كۋرستارىن ۇيىمداستىرۋ جانە جۇرگىزۋشى كۋالىگىن بەرۋ ارقىلى تىرەك-قيمىل اپپاراتى بۇزىلعان جانداردى وقىتۋدىڭ ۇتىمدى فورماسى ەكەنىن اتاپ ءوتتى. مۇگەدەكتەردى وڭالتۋ جۇيەسىنە ەنەتىن جاڭاشىلدىققا بالادى.
– ەندى جوبانى رەسپۋبليكا كولەمىندە جۇزەگە اسىرۋعا مۇمكىندىك تۋىپ وتىر. قىزىعۋشىلار كوپ. ولارعا فرانشيزا رەتىندە ساتپايمىن, سىيعا بەرەمىن. كەلەسى جىلى قوستاناي مەن جاڭاوزەن قالالارىندا ۇيىمداستىرماقپىز, – دەيدى جاس كاسىپكەر.
ءسالىمحان – سەگىز قىرلى, ءبىر سىرلى ازامات. قالامى جۇيرىك جۋرناليست. اڭگىمە, ولەڭ جازادى. سالاماتتى ءومىر سالتىن سەرىك ەتكەن, سپورتپەن شۇعىلدانادى. توعىزقۇمالاقتان جەرگىلىكتى جۋرناليستەر سپارتاكياداسىنىڭ بىرنەشە دۇركىن جەڭىمپازى. مۇمكىندىگى شەكتەۋلى جاندار اراسىندا ۇيىمداستىرىلعان ەل بىرىنشىلىگىندە ديسك, يادرو لاقتىرۋدان جۇلدەگەرلەر قاتارىنان كورىنىپ ءجۇر.
سولتۇستىك قازاقستان وبلىسى
