«قازاق ونەرىنىڭ حاس شەبەرلەرى ەلۋباي ومىرزاقوۆ, ەحسان ەسەتوۆ, باقىتجان بايقاداموۆ, قازبەك ابەنوۆ ىرگەسىن قالاعان ۇجىمنىڭ اتى قازىردە الىسقا تاراعان. ونەر شاڭىراعىنىڭ بەكي تۇسۋىنە ۇجىم ارداگەرلەرىنىڭ قوسقان ۇلەسى قوماقتى. ولار ۆلاديمير رىدچەنكو, الەكساندر كالۋگين, الەكساندر ەۆسيۋكوۆ, اناتولي زارۋبا, گەننادي ستاكانوۆ, گۇلبانۋ ابدۋللينا, سەرىك ابىلەۆ, قادىر مەن مايرا قارجاۋوۆتار, تاعى باسقا دا كوپتەگەن ونەرپازدار بولاتىن. وبلىستىڭ ايناسىنداي ونەر ۇجىمىنداعى قازاق جانە ورىس ۇلت اسپاپتارى وركەسترلەرىنىڭ, انسامبلدەردىڭ ونەرىن تەك وبلىس كورەرمەندەرى عانا ەمەس, الىس, جاقىن شەتەلدەردە تاماشالادى» دەدى ارحيمەد بەگەجان ۇلى. مۇنان كەيىن وبلىس باسشىسى فيلارمونيا ارتىستەرىن «مادەنيەت سالاسىنىڭ ۇزدىگى» توسبەلگىسىمەن, مادەنيەت جانە سپورت ءمينيسترىنىڭ, وبلىس اكىمىنىڭ گراموتالارىمەن ماراپاتتادى.
وبلىستىق فيلارمونيانى مەرەكەسىمەن ەلىمىزدىڭ ونەر جۇلدىزدارى دا قۇتتىقتاپ كەلىپتى. قازاق جانە ورىس ۇلت اسپاپتار وركەسترلەرىنىڭ سۇيەمەلدەۋىمەن ءان الەمىنىڭ جۇلدىزدارى بەرەكە ەڭسەباەۆا, سۇندەت بايعوجين ءان شىرقاسا, بەلگىلى قوبىزشى جانار جۇسىپبەكوۆا قوستانايلىق ارىپتەسى قوبىزشى باتىربەك باينازاروۆپەن بىرگە شىعارما ورىندادى. سونىمەن قاتار كورەرمەندەر قوستاناي فيلارمونياسىنىڭ انشىلەرى ماناپبەك قادىروۆتىڭ, گۇلبانۋ ابدۋللينانىڭ, گۇلميرا ۇمبەتوۆانىڭ, تالعات مولداعاليەۆتىڭ, تاعى باسقالاردىڭ ونەرىنە قول سوقتى.
