Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك تاۋەلسىزدىك جىلدارى تۇڭعىش پرەزيدەنت نۇرسۇلتان نازارباەۆتىڭ باسشىلىعىمەن ەلىمىزدە 2000-عا جۋىق جاڭا مەكتەپ جانە 900 بالاباقشا اشىلعانىن اتاپ ءوتتى.
اپاتتى جاعدايداعى مەكتەپتەر سانى سوڭعى 5 جىلدا 4 ەسەگە ازايدى. مۇعالىمدەردىڭ جالاقىسى 1997 جىلدان بەرى 17 ەسەگە وسكەن. ەلباسىنىڭ تاپسىرماسىمەن ءاربىر قازاقستاندىق وتباسىعا قاتىسى بار «پەداگوگ مارتەبەسى تۋرالى» زاڭ جوباسى ازىرلەندى.
«قازىر ءبىلىم بەرۋ سالاسىندا جارتى ميلليوننان استام قازاقستاندىق جۇمىس ىستەيدى. ولاردىڭ 81%-ى ايەلدەر. تامىز كونفەرەنتسياسىندا ەل پرەزيدەنتى قاسىم-جومارت توقاەۆ ۇلتىمىزدىڭ باسەكەگە قابىلەتتىلىگىن ارتتىرۋ ءۇشىن مۇعالىم مارتەبەسى بيىك دەڭگەيگە كوتەرىلۋ كەرەك دەپ اتاپ ءوتتى. جىل سايىن ديپلومدى مامانداردىڭ سانى ارتقانىمەن, پەداگوگتارعا دەگەن سۇرانىس ازايماي وتىر. پەداگوگ مامانداردىڭ 35%-ى باسقا سالاعا كەتىپ قالادى. بىلىكتى مۇعالىمدەردى مەكتەپتەرگە, اسىرەسە اۋىلدىق جەرلەرگە تارتۋ مەحانيزمى ماردىمدى جۇمىس ىستەمەي تۇر. بۇل شەشۋگە ءتيىستى ماسەلەلەردىڭ ءبىر بولىگى عانا», دەدى باۋىرجان بايبەك.
ونىڭ ايتۋىنشا, زاڭ جوباسىن ازىرلەۋ ءۇشىن عالىمدار, مۇعالىمدەر, زاڭگەرلەر, دەپۋتاتتار جانە ءبىلىم سالاسى كاسىپوداقتارىنىڭ وكىلدەرىنەن قۇرالعان جۇمىس توبى جاساقتالعان. جىل بويى ەلىمىزدە كوپتەگەن كەزدەسۋ وتكىزىلدى, 8600-دەن اسا ۇسىنىس ءتۇستى.
«پارتيا مۇشەلەرىنىڭ 30%-ى – پەداگوگتار, سوندىقتان Nur Otan زاڭ جوباسىنىڭ ازىرلەنۋ بارىسىن ەرەكشە باقىلاۋدا ۇستاپ وتىر. پەداگوگ قۇقىعىن كەڭەيتۋ جانە ونىڭ الەۋمەتتىك مارتەبەسىن جاقسارتۋ ماسەلەسى بار. اڭگىمە, بارىنەن بۇرىن, مۇعالىمدەردى ماتەريالدىق تۇرعىدان جانە باسقا دا ىنتالاندىرۋ جاعدايلارىن تۋعىزۋ, قاجەتسىز تەكسەرۋلەردەن ارىلتىپ, شىعارماشىل جانە ناتيجەلى جۇمىس ىستەۋگە جاعداي جاساۋ تۋرالى بولىپ وتىر. قازىرگى ۋاقىتتا ازىرلەنىپ جاتقان زاڭ جوباسى بويىنشا تاياۋ 5 جىلدا جالاقىنى ءوسىرۋ, ۇستازدىق شەبەرلىك پەن سىنىپ جەتەكشىلىگى ءۇشىن ۇستەمەاقى قوسۋ, ەڭبەك دەمالىسى مەن باسقا دا ىنتالاندىرۋلاردى قامتيتىن 5,2 تريلليون تەڭگە بولىنەدى دەپ مولشەرلەنۋدە. مۇنىڭ بارلىعى ەلباسى مەن پرەزيدەنت ساياساتىنىڭ ساباقتاستىعىنىڭ ناتيجەسى», دەپ اتاپ ءوتتى باۋىرجان بايبەك.
پارتيا توراعاسىنىڭ ءبىرىنشى ورىنباسارى ماجىلىستەگى Nur Otan پارتياسى فراكتسياسى دەپۋتاتتارىنىڭ جانە جۇمىس توبىنىڭ زاڭ جوباسىن تالقىلاۋ قورىتىندىسى بويىنشا قوسىمشا ۇسىنىستار ەنگىزىلگەنىن جەتكىزدى. سونداي-اق وقۋ جۇكتەمەسىن 16 ساعاتقا تومەندەتۋ, جەر تەلىمدەرىن ءبولۋ جانە «قازاقستاننىڭ ەڭبەك سىڭىرگەن ۇستازى» دارەجەسىنە يە بولعاندارعا ءبىر جولعى 2000 اەك كولەمىندەگى تولەم تولەۋ جانە پرەزيدەنتتىك وليمپيادالار, رەسپۋبليكالىق جانە حالىقارالىق جارىستاردىڭ جۇلدەگەرلەرىن دايىنداعاندارى ءۇشىن 3 ايلىق جالاقى بەرۋ تۋرالى ۇسىنىس ايتىلدى.
ءوز كەزەگىندە ءبىلىم جانە عىلىم ءمينيسترى اسحات ايماعامبەتوۆ جاڭا زاڭ جوباسىندا پەداگوگ قۇقىعىن قورعاۋ تۋراسىنداعى 10 جاڭا ۇستانىم قاراستىرىلعانىن حابارلادى. مۇعالىمدەردىڭ ساپالىق قۇرامىن ارتتىرۋ ءۇشىن ماگيستر دارەجەسى بارلارعا 10 اەك كولەمىندە ۇستەمە, بالاباقشالاردا ەڭ الدىمەن ورىن ءبولۋ جانە باسقا دا الەۋمەتتىك كومەكتەر قاراستىرىلماق.
وتىرىس بارىسىندا شىمكەنتتەگى №1 مەكتەپ-گيمنازياسىنىڭ بيولوگيا ءپانىنىڭ مۇعالىمى الينا سولوۆيوۆا ءوز ويىن جەتكىزدى.
«مەن قاراپايىم مەكتەپ مۇعالىمىمىن. اتا-انالاردىڭ بىزدەن نەنى كۇتەتىنىن بىلەمىن. كەز كەلگەن اتا-انا ونىڭ بالاسىنا تۇسىنىستىكپەن قاراپ, جاقسى كورگەنىمىزدى قالايدى. قوعام مۇعالىمدەردىڭ ەسەپ بەرۋمەن اينالىسپاي, بالالارعا دۇرىس ءمان بەرگەنىن جاقسى كورەدى. مۇعالىمدەردى وليمپيادادا ورىن العان وقۋشىلارى ءۇشىن ماراپاتتاۋ جايىنا كەلسەك, «دارىن», نزم سياقتى دارىندى بالالار وقيتىن مەكتەپتەردىڭ بار ەكەنىن ەسكەرە كەتكەن ءجون. ال مەنىڭ جاي مەكتەبىمنىڭ وزىندە 143 جەڭىمپازىم بار. ماقتانايىن دەپ تۇرعان جوقپىن, بىراق وسىلاردى دارەجەلەرگە ءبولۋ كەرەك سياقتى. كىمنىڭ وقۋشىسى جۇيەلى تۇردە جەڭىمپاز بولىپ جۇرسە, سولاردى ماراپاتتاۋ كەرەك», دەدى ول.
باۋىرجان بايبەك مۇعالىمنىڭ ۇسىنىسىن قولدادى. ونىڭ ايتۋى بويىنشا, وسى تەكتەس مەكتەپتەردىڭ اراسىندا سارالاۋدى ەنگىزۋ قاجەت.
