بۇگىندە اتالعان كەشەندەگى 8 نىسان بويىنشا قۇرىلىس جۇمىستارى قىزۋ جۇرگىزىلۋدە. سونىمەن قاتار ۇكىمەت باسشىسىنىڭ ورىنباسارىنا ستەند ارقىلى «تەكتۇرماس» ەتنو-تاريحي كەشەنىندەگى جۇمىستار دا تانىستىرىلدى. وڭىرگە ساپارى بارىسىندا بەردىبەك ساپارباەۆ اتقارىلىپ جاتقان جۇمىستارعا وڭ باعاسىن بەرىپ, تاريحي تاراز شاھارىن تۋريستىك ورتالىققا اينالدىرۋ كەرەكتىگىن باسا ايتتى.
جامبىل وبلىسىنا جۇمىس ساپارى بارىسىندا بەردىبەك ساپارباەۆ حالىقارالىق تۇركى اكادەمياسىنىڭ ۇيىمداستىرۋىمەن م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە وتكەن «تالاس قۇرىلتايى: تاريح پەن تاعىلىم» اتتى التىن وردانىڭ 750 جىلدىعىنا ارنالعان حالىقارالىق عىلىمي-تاجىريبەلىك كونفەرەنتسياعا قاتىستى. ايتۋلى شارانى حالىقارالىق تۇركى اكادەمياسىنىڭ پرەزيدەنتى دارحان قىدىرالى جۇرگىزىپ, تالاس قۇرىلتايىنىڭ تاريحي ماڭىزىنا توقتالدى. «تاريحسىز بولاشاق بولمايدى. پرەزيدەنت قاسىم-جومارت توقاەۆ وسى باستامانى كوتەرىپ, تالاي عاسىرلىق تاريحى بار ەل ەكەنىمىزدى دۇنيەگە كورسەتۋ ءۇشىن ۇكىمەتكە تاپسىرما بەردى. قازاق ۇلتىنىڭ تاريحى تەرەڭدە جاتىر. تاراز قالاسىنىڭ 2000 جىلدىق, تۇركىستان قالاسىنىڭ 1500 جىلدىق, قازاق حاندىعىنىڭ 550 جىلدىق تاريحي تويىن اتاپ وتتىك. ەندى تاريحي تارازدى دامىتۋ كەرەك», دەدى بەردىبەك ساپارباەۆ. بۇدان كەيىن جامبىل وبلىسىنىڭ اكىمى اسقار مىرزاحمەتوۆ ءسوز الىپ, تاريحى تەرەڭ تارازدىڭ تاريحىن تالايعا تانىتۋ كەرەكتىگىنە توقتالدى. جالپى, اتالعان شاراعا موڭعوليا, قىرعىزستان, وزبەكستان, تاتارستان ەلدەرىنىڭ اتاقتى عالىمدارى قاتىسىپ, ءوزارا پىكىر الماستى.
وڭىرگە جۇمىس ساپارى بارىسىندا ب.ساپارباەۆ بايزاق اۋدانىندا دا بولىپ, قوستوبە اۋىلدىق وكرۋگىندەگى جاڭادان پايدالانۋعا بەرىلگەن العاشقى مەديتسينالىق-سانيتارلىق كومەك كورسەتۋ نىسانىنا باردى. نىساندى ارالاۋ بارىسىندا ۇكىمەت باسشىسىنىڭ ورىنباسارى بۇل باعىتتاعى جۇمىستاردى جامبىل وڭىرىندە جولعا مىقتاپ قويۋعا بولاتىنىن جەتكىزدى. ماسەلەن, وتكەن جىلى وڭىردە 30 العاشقى مەديتسينالىق-سانيتارلىق كومەك كورسەتۋ نىسانى سالىنعان بولسا, بيىل 65 نىساننىڭ قۇرىلىسى جۇرگىزىلۋدە. ولاردىڭ ءبارى دە جىل سوڭىنا دەيىن پايدالانۋعا بەرىلەتىن بولادى. جالپى, 95 نىساننىڭ العاشقى قۇنى وڭتايلاندىرۋ ارقىلى 2-3 ەسە ارزانداتىلعان. بەردىبەك ساپارباەۆ جامبىل وبلىسىنداعى بۇل باستامانى دا وڭ باعالاپ, وزگە وڭىرلەرگە دە ۇلگى ەتۋ كەرەكتىگىن جەتكىزدى.
جامبىل وبلىسىنا جۇمىس ساپارى بارىسىندا بەردىبەك ساپارباەۆ جامبىل وبلىستىق قازاق دراما تەاترىندا جەرگىلىكتى جۇرتشىلىقپەن جانە زيالى قاۋىم وكىلدەرىمەن دە كەزدەستى. ءوڭىر تۇرعىندارىنىڭ سۇراقتارىنا جاۋاپ بەرىپ, جالپى جامبىل وبلىسىن دامىتۋدىڭ ءتيىمدى جوبالارىن ۇسىندى.
جامبىل وبلىسى
