«ەڭبەك» باعدارلاماسى ءوز ناتيجەسىن بەرۋدە

ايماقتار • 14 قاراشا، 2019

«ەڭبەك» باعدارلاماسى ءوز ناتيجەسىن بەرۋدە

2019 جىلعى 10 ايدىڭ قورىتىندىسى بويىنشا جامبىل وبلىسىندا 30 304 ادام 2017-2021 جىلدارعا ارنالعان «ەڭبەك» مەملەكەتتىك باعدارلاماسىنىڭ قاتىسۋشىسى بولدى. 23 793 ادام جۇمىسقا ورنالاستىرىلسا، ونىڭ 17 842-ءسى نەمەسە 75% تۇراقتى جۇمىس ورنىمەن قامتىلدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.

Egemen Qazaqstan

«جامبىل وبلىسىندا 3 322 ادام ەڭبەك نارىعىندا سۇرانىسقا يە كاسىپتەر بويىنشا كاسىبي داعدىلاردى قالىپتاستىرۋ ماقساتىندا ازاماتتاردىڭ جەكەلەگەن ساناتتارى ءۇشىن قىسقا مەرزىمدى كۋرستار وتكىزۋدى كوزدەيتىن «ەڭبەك» مەملەكەتتىك باعدارلاماسىنىڭ ءبىرىنشى باعىتى اياسىندا قامتىلعان. قىسقا مەرزىمدى كاسىپتىك وقۋدى اياقتاعاننان كەيىن جۇمىسپەن قامتۋ ورتالىقتارى مەملەكەتتىك باعدارلاماعا قاتىسۋشىلارعا جۇمىسقا ورنالاسۋدا كومەك كورسەتەدى.

مەملەكەتتىك باعدارلامانىڭ ەكىنشى باعىتىنىڭ نەگىزگى مىندەتى ازاماتتاردىڭ كاسىپكەرلىك باستامالارىن دامىتۋ بولىپ تابىلادى. ونىڭ شەڭبەرىندە باستاپقى بيزنەستى ىسكە اسىراتىن جانە ىسكە اسىرۋدى جوسپارلايتىن، سونداي-اق بۇرىن باسقا مەملەكەتتىك باعدارلامالار شەڭبەرىندە قارجىلاي قولداۋ الماعان ۇمىتكەرلەرگە وتەۋسىز جانە قايتارىمسىز نەگىزدە 100 جانە 200 اەك مولشەرىندە مەملەكەتتىك گرانتتار بەرىلەدى. بۇدان باسقا، اۋىلدا جانە قالالاردا كاسىپكەرلىك الەۋەتى بار، ءىسىن جاڭادان باستاعان كاسىپكەرلەرگە، اۋىل شارۋاشىلىعى كووپەراتيۆتەرىنە جانە زەينەتكەرلىك جاسىنا جەتپەگەن ولاردىڭ مۇشەلەرىنە، شارۋا جانە فەرمەر قوجالىقتارىنا ميكروكرەديتتەر بەرىلەدى.

جامبىل وبلىسىندا ميكروكرەديتپەن 1 561 ادام قامتىلدى. 100 اەك-كە دەيىنگى مەملەكەتتىك گرانتتاردى مەملەكەتتىك باعدارلامانىڭ 43 قاتىسۋشىسى، 200 اەك-كە دەيىن – 1 271 ادام الدى (جاستار، از قامتىلعان جانە كوپبالالى وتباسىلاردىڭ مۇشەلەرى، مۇگەدەكتىگى بار ادامدار).

مەملەكەتتىك باعدارلامانىڭ ءۇشىنشى باعىتى ازاماتتاردىڭ جەكەلەگەن ساناتتارىن جۇمىسپەن قامتۋ ءۇشىن مەملەكەت سۋبسيديالايتىن جۇمىس ورىندارىن قۇرۋدى قاراستىرادى. ونى جۇزەگە اسىرۋ اياسىندا جامبىل وبلىسىندا 8 967 ادام جۇمىسقا ورنالاستىرىلدى، ونىڭ ىشىندە 1 523-ى الەۋمەتتىك جۇمىس ورىندارىنا، 2 409-ى جاستار پراكتيكاسىنا جانە 5 035 ادام قوعامدىق جۇمىستارعا جىبەرىلدى»، دەلىنگەن حابارلامادا.