ىسكەرلىك بايلانىستى قالىپتاستىرۋ ماسەلەلەرى جايلى جان-جاقتى پىكىر الماسۋعا سولتۇستىك ەۋروپاداعى قازاق دياسپوراسىنىڭ كوشباسشىلارى مەن بەلسەندىلەرى, سونىمەن قاتار قازاقستاننىڭ شۆەتسياداعى ەلشىسى قايرات ءابدىراحمانوۆ, دۇنيەجۇزى قازاقتارىنىڭ قاۋىمداستىعى توراعاسىنىڭ ورىنباسارى ارعىن وسپانوۆ, «وتانداستار» قورىنىڭ جاۋاپتى قىزمەتكەرلەرى, شۆەتسيانىڭ قازاقستانداعى تۇڭعىش ەلشىسى ماننە ۆەنبورگ, قازاقستاننىڭ دانيا, فينليانديا, شۆەتسياداعى قۇرمەتتى كونسۋلدارى قاتىستى.
ىسكەرلىك جيىنعا, سونداي-اق اتالعان ەلدەردىڭ كومپانيالارىندا جۇمىس ىستەيتىن قازاقستاندىقتار مەن ءجۇن وڭدەۋ, اۋىل شارۋاشىلىعى, اگروتۋريزم جانە باسقا دا جوبالارمەن اينالىساتىن تۇركىستان جانە قاراعاندى وبلىستارىنىڭ بيزنەسمەندەرى كەلدى.
دۇنيەجۇزى قازاقتارى قاۋىمداستىعى مەن قور وكىلدەرى قىزمەتتەرىنىڭ نەگىزگى باعىتتارى, ونىڭ ىشىندە شەتەلدەردەگى قانداستارمەن مادەني-گۋمانيتارلىق جانە ىسكەرلىك بايلانىستى كەڭەيتۋ ءارى نىعايتۋدى كوزدەگەن «وتانداستار» قورىنىڭ نەگىزگى جوبالارىنىڭ ءبىرى – «قازاق ءۇيى» قازاق مادەني-ىسكەرلىك ءۇيىنىڭ قۇرامىنا كىرەتىن ىسكەرلىك ۇيلەرى مەن مادەني ورتالىقتاردىڭ الەم بويىنشا جەلىسىن قۇرۋ جوسپارىمەن تانىستىردى.فورۋمعا قاتىسۋشىلارعا قازاقستاننىڭ ينۆەستيتسيالىق الەۋەتى مەن وڭىرلەردە بيزنەستى دامىتۋ ءۇشىن جاسالعان جاعدايلار جايىندا اقپارات بەرىلدى. شۆەتسياداعى قازاقستاندىق جاستار قاۋىمداستىعىنىڭ ءتورايىمى ايدانا بەكبەرگەن فورۋمعا قاتىسۋشىلار الدىندا تۇڭعىش رەت وتانداستاردىڭ جاس بۋىنعا ۇندەۋى جازىلعان ەلەكتروندى فورماتتاعى ۋاقىت كاپسۋلاسىن سالدى. ول تەك 2025 جىلى اشىلاتىن بولادى.
جيىنعا قاتىسۋشىلار دەلەگاتسيا قۇرامىنداعى كاسىپكەرلەردىڭ ۇسىنىستارىنا ايتارلىقتاي قىزىعۋشىلىق تانىتتى. «شىمكەنت كاشەمير» ءجۇن وڭدەۋ فابريكاسىنىڭ قۇرىلتايشىسى ءارى باسشىسى ش.قانجارباي ۇلى سكانديناۆيا ەلدەرىنە ونىمدەرىن وتكىزۋدى جولعا قويۋ جايىن قوزعاسا, «Toksumak» بىرەگەي ەكو-اگرو-اۋىل اۆتورى و.وماروۆ اۋىل تۇرعىندارىنىڭ الەۋمەتتىك احۋالىن نىعايتاتىن, ەلگە ورالعان قانداستارعا بەرىك بازا بولاتىن جوبالارعا ينۆەستيتسيا تارتۋ تۋرالى ويىن ورتاعا سالدى.
بيىل التىنشى رەت ۇيىمداستىرىلىپ وتىرعان ءىس-شارا الەمدەگى قازاق دياسپوراسى مەن قازاقستاندىقتاردىڭ تاريحي وتان توڭىرەگىندە بىرىگۋىنىڭ جەمىستى ۇلگىسى بولعانداي.
