وسى ورايدا كەيىنگى كەزدە مەملەكەتتىك ورگاندار تاراپىنان حات پەن ارىز-شاعىم يەلەرىنە جاۋاپتار بەلگىلەنگەن ۋاقىتتا كەشىكپەي قايتارىلا باستاعانى ءسۇيىنىشتى ءجايت. ءتىپتى قازىرگى ەلەكتروندىق قۇجات اينالىمىنا سايكەس ءبىر كۇننىڭ ىشىندە ءوتىنىش حات يەسىنىڭ ۇيالى بايلانىس جەلىسىنە ونىڭ تىركەلگەنى ءارى ونى ورىندايتىن جاۋاپتى لاۋازىمدى تۇلعانىڭ اتىنا جىبەرىلگەنى, ءارى ءوتىنىش حاتتىڭ زاڭمەن بەلگىلەنگەن مەرزىمدە قارالاتىنى تۋرالى حابارلار كەلىپ تۇسەدى.
مۇندايدا كىمدە-كىم بولماسىن «يە, باسە» دەپ اجەپتاۋىر قاناتتانىپ قالاتىنى انىق. سودان سوڭ ارادا كوپ ۋاقىت وتپەي جازعان ءوتىنىش حاتقا قايتارىلعان جاۋاپتار دا كەلىپ تۇسەدى. ارينە جوعارىدا ايتىلعانداي تۇرعىنداردى تولعاندىرعان ماسەلەلەرگە مەملەكەتتىك ورگاندار تاراپىنان جاۋاپتاردىڭ ۋاقىتىندا كەلۋى ءسوز جوق وتە جاعىمدى ءجايت. ايتسە دە جاۋاپتىڭ ماتىنىنە كوز سالعاندار كوپ جاعدايلاردا ونى قاپەلىمدە تۇسىنە الماي, بەينە ءبىر جاڭىلتپاش وقىعانداي ءارى-ءسارى كۇيدە قالادى. ويتكەنى حاتتا ايتىلعان تولعاقتى ماسەلەگە ناقتى جاۋاپتار قايتارىلا بەرمەيدى. ەسەسىنە ونىڭ ورنىنا الدەبىر زاڭدار مەن كودەكستەردىڭ ۇزاق تارماقتارىنان تۇراتىن سالا-قۇلاش باپتارى كورسەتىلەدى. وسىلايشا قاراپايىم تۇرعىندار ءۇشىن ەشقانداي جىلۋى جوق, ءمانى مەن ماعىناسى بۇلدىر سىرعىتپا جاۋاپتار تۇسىنىكسىز كۇيىندە قالىپ قويا بەرەدى. تۇرعىندار تاراپىنان تۇسەتىن ءوتىنىش حاتتارعا ەشكىم تۇسىنبەيتىن قويىرتپا, جاڭىلتپاش جاۋاپتار قايتارۋ كورىنىسى اقتوبە وبلىستىق اكىمدىگىندە دە ورىن الىپ وتىرعانى اقپارات جيىنىندا اشىق ايتىلدى. وسى ماسەلەگە بايلانىستى اقتوبە وبلىسى اكىمىنىڭ اپپارات باسشىسى نۇرجاۋعان قالاۋوۆ ءوز تۇجىرىمىن بىلايشا جەتكىزدى.
-بۇعان دەيىن ازاماتتاردىڭ ارىز-شاعىمدارىنا بايلانىستى بەرىلگەن جاۋاپتاردىڭ بىرقاتارى ەشقانداي سىن كوتەرمەي كەلدى. مۇنداي ۇستىرتتىكتى بىلايشا جالعاستىرا بەرۋگە بولمايدى. سوندىقتان دا الداعى ۋاقىتتا سالدىر-سالاق ازىرلەنگەن جاۋاپتار تىكەلەي اكىمدىك اپپاراتىنىڭ سۇزگىسى مەن باقىلاۋىنان وتكىزىلمەك. مۇنداعى ماقسات – حات يەلەرىنە قاراپايىم دا تۇسىنىكتى, ەتەك-جەڭى جيناقى جاۋاپتار قايتارۋ.
لايىم دا, سولاي بولعانىنا نە جەتسىن!
اقتوبە
