«فينالعا جەتۋ ءۇشىن الدىمەن قالالىق, سوسىن رەسپۋبليكالىق, ودان كەيىن قۇراماعا ەنۋ كەزەڭدەرى بار. وسىنىڭ بارلىعىنان وتكەننەن كەيىن عانا الەمدىك دوداعا اتتانا الاسىڭ. بۇل – ۇلكەن ەڭبەك. تۋرا وسى جارىسقا مەن 8-ءشى سىنىپتا وقىپ جۇرگەنىمدە دە قاتىستىم. بىراق سوڭىنا دەيىن جەتە المادىم. ول كەزدە كوماندامىز رەسپۋبليكالىق كەزەڭنەن ءىىى ورىن يەلەنگەن بولاتىن. كەيىنگى كەزەڭدەرگە بۇل كورسەتكىشپەن وتە المادىق. الايدا, بيىل وتتىك. ەكى جىل بۇرىن ءىىى ورىنعا رەسپۋبليكا بويىنشا تابان تىرەسەك, بيىل الەم بويىنشا», دەدى ليۋبوۆ دۋدچەنكو.
ل.دۋدچەنكونىڭ ايتۋىنشا, كوماندالاستارىمەن قۇراستىرعان روبوت العاشىندا ويىنداعىداي شىقپاي, ءبىراز الاڭداتقان. زياتكەر قىزدىڭ ۋايىمىن جارىستىڭ ماسشتابى, ونداعى ءارتۇرلى ەلدەردەن كەلگەن مىقتى باسەكەلەستەرىنىڭ بارى ەسەلەندىرسە كەرەك. حالىقارالىق جارىستىڭ اقتىق مارەسىنە الەمنىڭ 73 ەلىنەن 424 كوماندا قاتىسىپتى.
«كورەيا, جاپونيا, گەرمانيادان كەلگەن نەشە ءتۇرلى مىقتى كوماندالار بولدى. شىنىمدى ايتسام, روبوتتى قۇراستىرۋعا ارنالعان ءبىرىنشى كۇننىڭ سوڭىندا قاتتى ۋايىمدادىق. سەبەبى, قۇراستىرۋ بارىسىندا قيىندىقتار تۋىپ, قولىمىزدان كەلەر مە ەكەن, ەڭ بولماعاندا ۇزدىك وندىققا ەنسەك ەكەن دەگەن ويعا دا سالىندىق. بىراق, ەرتەسىندە ءوزىمىزدى بىردەن جيناپ الىپ, قايتادان ىسكە كىرىستىك. ماراپتتاۋ سالتاناتىندا ءبىزدى, ەلىمىزدى اتاپ شاقىرعانداعى ءسات بارىنەن ەرەكشە. تۋىمىزدى ۇستاپ الىپ, ساحناعا جۇگىرىپ شىقتىق. ارمانىم – قازاقستاندى الەمگە ايگىلى ەتۋ. اقىرىنداپ ورىندالىپ جاتقانداي», دەدى ول.
دۇنيەجۇزىلىك روبوتتار وليمپياداسى – 2004 جىلدان باستاپ 10-21 جاس ارالىعىنداعى وقۋشىلار مەن ستۋدەنتتەر اراسىندا وتكىزىلەتىن حالىقارالىق جارىس. جىل سايىن وليمپياداعا 2000-نان استام دارىندى بالالار قاتىسادى. بيىلعى جارىسقا «اقىلدى قالالار» تاقىرىبى بەكىتىلىپتى. قاتىسۋشىلارعا بولاشاقتىڭ قالاسىن قۇرۋداعى جاڭا تۇجىرىمدامالار, يدەيالار مەن تەحنولوگيالاردى ۇسىنۋ مىندەتتەلگەن.
