جولداردى اقىلى ەتۋگە باعىتتالعان جوبا 2 كەزەڭدە ەنگىزىلەدى دەپ جوسپارلانۋدا. العاشقى كەزەڭدە, ياعني 2020 جانە 2021 جىلداردىڭ ارالىعىندا اۆتوموبيل جولدارىنىڭ 6 مىڭعا جۋىق شاقىرىمى اقىلى بولادى. بۇل – «باتىس ەۋروپا – باتىس قىتاي» حالىقارالىق ترانزيتتىك ءدالىزىنىڭ, نۇر-سۇلتان – قوستاناي – رف شەكاراسى, ششۋچينسك – پەتروپاۆل, نۇر-سۇلتان – پاۆلودار, قالباتاۋ – پاۆلودار – رف شەكاراسى (ومبىعا), تاسكەسكەن – باقتى, قاپشاعاي – تالدىقورعان, اتىراۋ – ورال, اتىراۋ – دوسسور – بەينەۋ – اقجىگىت – وزبەكستان رەسپۋبليكاسىنىڭ شەكاراسى جانە اقتاۋ – بەينەۋ جولدارىنىڭ ۋچاسكەلەرى. 2022 جانە 2023 جىلدار ارالىعىندا اۆتوموبيل جولدارىنىڭ قالعان 5 مىڭ شاقىرىمىن اقىلى ەتۋدىڭ ەكىنشى كەزەڭىن جۇزەگە اسىرۋ كوزدەلگەن.
ايتا كەتۋ كەرەك, بۇگىنگى تاڭدا اقىلى «نۇر-سۇلتان – ششۋچينسك», «نۇر-سۇلتان – تەمىرتاۋ, «الماتى – قورعاس» جانە «الماتى – قاپشاعاي» جولدارىنان تۇسكەن قاراجاتتىڭ جالپى سوماسى 4 ملرد تەڭگەدەن اسادى. جينالعان قاراجات اتالعان جول ۋچاسكەلەرى مەن تولەم قابىلداۋ جۇيەسىن كۇتىپ ۇستاۋعا جۇمسالادى.
