بۇگىنگى كۇن بيىگىنەن قاراستىرعاندا مۇنداي بيىك باعا ك.ا.تيميريازەۆ اتىنداعى ماسكەۋ اۋىل شارۋاشىلىعى اكادەمياسى تۇلەگى, كوزى تىرىسىندە كىسىلىك پەن كىشىلىك قاعيداتتارىنان اينىماي وتكەن اسىل ازامات ماقسوت يسقاقوۆقا ابدەن لايىقتى دەگەن ويدامىز. قاراپايىمدىلىق ول كىسىنىڭ بويىنا و باستان قانمەن سىڭگەن قاسيەت دەسەك قاتەلەسە قويماسپىز. ماقسوت اعا ۇزاق جىلدار بويى باسشىلىق قىزمەتتەردە بولعان كەزىندە بيىك لاۋازىمىن العا تارتىپ بىرەۋگە كوكىرەك كورسەتپەگەنىنە, ۇلى ابايدىڭ سوزىمەن ايتقاندا «وزىندە بارمەن كوزگە ۇرىپ, وزگەدەن ارتىلام دەمەگەنىنە» كۋا بولا الامىز.
ءبىز وسى ماتەريالدى گازەت وندىرىسىنە ازىرلەۋ بارىسىندا قىزى مەن كۇيەۋ بالاسى ءمادينا مەن بولاتتىڭ ۇيىندە ساقتالعان ماقسوت يسقاق ۇلىنىڭ ءوز قولىمەن جازىلعان ومىربايانىمەن تانىسقان ەدىك. سودان كوڭىلگە تۇيگەنىمىز ءوز ءداۋىرىنىڭ قاتارىنان وزا شاپقان ءدۇلدۇل 24 جاسىندا متس ديرەكتورى, 29 جاسىندا جىمپيتى اۋپارتكومىنىڭ حاتشىسى, ال 1962 جىلى 33 جاسىندا كازتالوۆ اۋداندىق پارتيا كوميتەتىنىڭ ءبىرىنشى حاتشىسى بولىپ تاعايىندالعانى. تۇتاستاي شيرەك عاسىرعا جۋىق ۋاقىت بويى كازتالوۆ جانە جىپميتى اۋداندارىنىڭ الەۋمەتتىك-ەكونوميكالىق تۇرعىدان العا باسۋىنا, اتالعان وڭىرلەردە رەنتابەلدىلىگى جوعارى شارۋاشىلىقتار قاتارىنىڭ وسۋىنە ىقپالىن تيگىزگەنى دە م.يسقاقوۆتىڭ بىلىكتى باسشى بولا بىلگەنىنىڭ ءبىر دالەلى.
سوناۋ سەكسەنىنشى جىلداردىڭ باسى مەن ورتا شەنىندە م.يسقاقوۆ باسقارعان اۋدانداردىڭ تىنىس-تىرشىلىگى سول كەزدەگى وداقتىڭ باس باسىلىمى, كوكپ ورتالىق كوميتەتىنىڭ ورگانى «پراۆدا» گازەتىنىڭ ءبىرىنشى بەتىندە جاريالانۋ مۇمكىندىگى دە ەكىنىڭ ءبىرىنىڭ ەنشىسىنە تيە بەرمەيتىن. وسىنداي جاعدايدا جىمپيتى اۋدانىنان «پراۆدادا» بىرقاتار ماتەريالدار جاريالانىپ تۇردى. ءتىپتى 1980 جىلدىڭ 30 تامىزى كۇنى «پراۆدا» گازەتىنىڭ ءبىرىنشى بەتىندە جىمپيتى اۋپارتكومىنىڭ ءبىرىنشى حاتشىسى م.يسقاقوۆتىڭ فوتوسۋرەتى كوكپ ورتالىق كوميتەتىنىڭ باس حاتشىسى لەونيد برەجنەۆپەن قاتار جارق ەتە قالعان كەزى دە بار.
قاي داۋىردە دە, قانداي قوعامدا دا مەملەكەتتىك ماراپات تەكتەن تەك بەرىلمەيتىنى بەلگىلى. بۇل ەل-جۇرت ءۇشىن توگىلگەن ماڭدايتەر مەن جۇمسالعان كۇش-قايراتتىڭ وتەۋى ەكەنى دە انىق. وسى ورايدا ماقسوت يسقاقوۆتىڭ كەڭەس وداعىنىڭ جوعارى ناگراداسى لەنين, ءۇش مارتە ەڭبەك قىزىل تۋ جانە حالىقتار دوستىعى وردەندەرىمەن ماراپاتتالعانى دا اتاپ ايتۋعا تۇرارلىق.
م.يسقاقوۆتىڭ ءومىرى مەن پارتيالىق باسشىلىق قىزمەتتەگى جولدارىنا قاتىستى العاندا ەلەۋلى جايتتار از ەمەس. سونىڭ ءبىرى 1966 جىلى لەنيندىك جانە نوبەل سىيلىقتارىنىڭ يەگەرى, ورىس جازۋشىسى ميحايل شولوحوۆقا اق بوتا سىيلاۋ ءراسىمىن ۇيىمداستىرعانى. وقىرماندارعا تۇسىنىكتى بولۋ ءۇشىن ايتا كەتسەك, 1965 جىلدىڭ مامىر ايىندا م.ا.شولوحوۆتىڭ الپىس جىلدىعى ماسكەۋدە كسرو جازۋشىلار وداعىندا سالتاناتتى تۇردە اتالىپ وتەدى. وسى ءراسىم كەزىندە سول كەزدەگى قازاقستان جازۋشىلار وداعىنىڭ ءبىرىنشى حاتشىسى عابيت مۇسىرەپوۆ قازاقستاندىقتار اتىنان ساڭلاق سۋرەتكەرگە ايرىقشا سىي تابىس ەتىلەتىنىن, ايتسە دە ونى ءدال قازىرگى جاعدايدا زالعا اكەلۋ قيىن ەكەنىن مالىمدەيدى. ماجىلىسكە قاتىسۋشىلار بۇعان قاپەلىمدە اڭ-تاڭ بولىپ قالادى. سول كەزدە سۇڭعىلا جازۋشى: «بۇل مولدىرەگەن قارا كوزدەرى سۇلۋلىقتىڭ سيمۆولىنداي كورىنەتىن, شىنايى دوستىق پەن باۋىرمالدىقتىڭ بەلگىسى بولا الاتىن تۇيەنىڭ ءتولى – اق بوتا دەپ ءتىل قاتادى. قازىر بۇل بوتا ءوزىڭىز ءجيى باراتىن اقجايىقتاعى شالقار كولىنىڭ جاعاسىندا ءجۇر. ونى الداعى جىلى سول جاققا بارعان ساپارىڭىزدا تابىس ەتەمىز», دەيدى ع.مۇسىرەپوۆ.
الايدا كەلەسى جىلى شولوحوۆ ورال وڭىرىنە كەلگەندە عابەڭنىڭ بۇل وڭىرگە جەتە قويۋىنىڭ ءساتى تۇسە قويمايدى دا بۇل جاۋاپتى تاپسىرما قازاقستان جازۋشىلار وداعىنىڭ اتىنان سول كەزدەگى ورال وبلىستىق پارتيا كوميتەتىنىڭ حاتشىسى بيسەن جۇماعاليەۆكە جۇكتەلەدى. ءوز كەزەگىندە بۇل جاۋاپتى ءىستى اتقارۋدى بيساقاڭ كازتالوۆ اۋداندىق پارتيا كوميتەتىنىڭ ءبىرىنشى حاتشىسى ماقسوت يسقاقوۆقا تاپسىرادى. كەيىننەن بۇل جايتتىڭ ويداعىداي ورىندالىپ, اتالعان اۋدانعا قاراستى «قۇرمانعازى» سوۆحوزىنىڭ ەڭبەككەرلەرى اتىنان سىيلانعان اق بوتا شولوحوۆتىڭ ءوز قالاۋى بويىنشا سول شارۋاشىلىقتا وسىرۋگە قالدىرىلعانى بيسەن جۇماعاليەۆتىڭ «شولوحوۆتىڭ قازاقستانمەن قارىم-قاتىناسى» دەگەن كىتابىندا كوركەم تىلمەن كەستەلەنگەن.
