ىنتىماق مەكەنى رەتىندە تانىلارى انىق
تۇڭعىش پرەزيدەنتىمىز نۇرسۇلتان نازارباەۆتىڭ باستاماسىمەن كوركەيىپ كەلە جاتقان تۇركىستان بۇكىل تۇركى الەمىنىڭ ورتالىعىنا اينالۋ ماقساتىندا دامۋدا. بۇل ورايدا ەلباسىنىڭ: «تۇركىستان قالاسى – تۇركى دۇنيەسىنە ورتاق مادەني وردا. سوندىقتان تۇركىتىلدەس ەلدەر دە تۇركىستاننىڭ گۇلدەنۋىنە وزىندىك ۇلەستەرىن قوساتىن بولادى. رۋحاني شاھار وسىلايشا تۇركى الەمى ەلدەرىن جاقىنداستىرا تۇسەتىن ىنتىماق نىشانى بولماق», – دەگەن ءسوزى وبلىس ورتالىعىنىڭ ەرتەڭىنە دەگەن سەنىمىمىزدى نىعايتىپ وتىر.
تۇركىستان ەجەلدەن كۇللى تۇركى جۇرتشىلىعىنىڭ ءتاۋ ەتەر قاسيەتتى تۇراعىنا اينالعان. كۇن سايىن اعىلىپ كەلەتىن مىڭداعان ءتۋريستىڭ تولاستاماۋى – وسىنىڭ ايقىن دالەلى. اتى الەمگە ايگىلى شاھاردىڭ جاڭا مارتەبە الۋى, مۇراجايلاردىڭ كوپتىگى, «كۇلتوبە قالاشىعى» ارحەولوگيالىق پاركىن قۇرۋ دا ءتۋريزمنىڭ دامۋىنا وڭ اسەرىن تيگىزەرى انىق. تاريح تاسپاسىندا قالاتىن جارلىققا قول قويىپ, كوپ ۇزاماي تۇركىستانعا ارنايى كەلىپ, جاڭا وبلىس ورتالىعى رەتىندەگى دامۋ تۇجىرىمداماسىن بەكىتىپ بەرگەن ەلباسى مۇنداعى قارقىندى جۇمىستى ءبىر ءسات تە نازارىنان تىس قالدىرعان جوق. بۇل ماڭىزدى وقيعانىڭ ورىن العانى كۇنى كەشە عانا سياقتى ەدى. اراعا جىلدان اسا ۋاقىت سالىپ, العاشقى نىساندار ەلباسىنىڭ قاتىسۋىمەن اشىلىپ, ەل يگىلىگىنە بەرىلدى.
دالاسىنان تۇلپارلاردىڭ ءدۇبىرى ەستىلگەن, قويناۋى تاريح پەن سىرعا تولى تۇركىستان قالاسى بۇگىندە كوز الدىمىزدا گۇلدەنىپ كەلەدى. ەل بيلەگەن بيلەر مەن قانشاما ابىز, باتىرلاردىڭ سۇيەگىن قويناۋىندا ساقتاپ جاتقان كيەلى توپىراقتان تۇلەپ شىققان تۇلعالار مەن قالا تۇرعىندارى ىنتىماقتاستىق پەن بىرلىكتە تۇركىستاننىڭ كەمەل كەلەشەگىنە ءوز ۇلەسىن قوسارى انىق. كۇنى كەشەگى ساپارىندا وبلىس ورتالىعىندا اتقارىلىپ جاتقان جۇمىستارعا وڭ باعا بەرگەن ەلباسى قۇرىلىستىڭ قارقىندى جۇرگىزىلۋى, جاڭا نىسانداردىڭ كوپتەپ سالىنۋى جاستار ءۇشىن جاڭا جۇمىس ورىندارىن اشۋعا مۇمكىندىك جاسايتىنىن اتاپ ءوتتى. «بۇكىل قازاقستان جۇرتشىلىعى تۇركىستاننىڭ دامۋىن قولداپ وتىر. ءاربىر ءۇي, ءاربىر قالا – قازاقستاننىڭ بايلىعى. ەلوردانى سالعان كەزدە قارجىلاندىرۋعا بايلانىستى سۇراقتار بولعان ەدى. ەندى نۇر-سۇلتان قالاسى بارلىق شىعىنداردى وتەپ, جىل سايىن بيۋدجەتكە تريلليونداعان كىرىس اكەلىپ وتىر», دەدى ەلباسى. سول سياقتى كەشەگى شەشىمگە كۇمانمەن قاراعان كەيبىرەۋلەردىڭ كۇدىگى سەيىلىپ, تۇركىستاننىڭ جارقىن بولاشاعىنا دەگەن سەنىمى ارتتى. وسى قارقىنمەن رۋحاني قالا بارلىق باعىتتا دامىعان, تۇركى ەلدەرىنىڭ ىنتىماق مەكەنىنە اينالارى انىق.
شالاتاي مىرزاحمەتوۆ,
مەملەكەت جانە قوعام قايراتكەرى
تۇركىستان وبلىسى
ەلباسى ءسوزى اقيقاتقا اينالىپ كەلەدى
جۋىردا تۇركىستانعا جۇمىس ساپارىمەن كەلگەن ەلباسى ن.نازارباەۆ تاۋەلسىزدىك العان سوڭ تۇركىستاندى بولاشاق استانا رەتىندە قاراستىرعانىن, بىراق جاعداي بۇعان جول بەرمەگەنىن اتاپ ءوتتى. جالپى, نۇرسۇلتان ءابىش ۇلى تۇركىستاندى تۇلەتۋگە ەرەكشە دەن قويىپ كەلەدى. قالانىڭ وبلىس ورتالىعىنا اينالىپ, قۇرىلىستىڭ بۇرىن-سوڭدى بولماعان قارقىن الۋى – سونىڭ ءبىر ايعاعى.
بۇگىنگى تۇركىستان, بۇرىنعىدان الدەقايدا وزگەرە جاڭارىپ, جاسارعان. تۇڭعىش پرەزيدەنتىمىزدىڭ «كونە تۇركىستان جاڭا قازاقستاننىڭ شىرايلى شاھارىنا اينالادى» دەپ تاسقا قاشاپ جازدىرعان ءسوزى اقيقاتقا اينالىپ كەلەدى. قۇرىلىستىڭ قارقىنىن قالاعا كىرە بەرگەننەن-اق بايقاۋ قيىن ەمەس. بۇل الداعى ۇلكەن ىستەردىڭ باستاۋى عانا. قالانىڭ باس جوسپارىنا سايكەس ءالى تالاي جوبا جۇزەگە اسىرىلاتىنىنا سەنىم مول. بۇگىندە اكىمشىلىك عيماراتتاردى, تۇرعىن ۇيلەردى, الەۋمەتتىك جانە ينجەنەرلىك ينفراقۇرىلىمداردى قامتيتىن, تۇركىستاندا قولعا الىنعان جالپى قۇنى 275 ميلليارد تەڭگە كولەمىندەگى قارجى قاراستىرىلىپ, جۇزەگە اسىرۋ جوسپارلانعان 150 قۇرىلىس نىسانىنىڭ 102-ءسى بيىل پايدالانۋعا بەرىلمەك. قازىردىڭ وزىندە قالانىڭ اجارىن اشا تۇسكەن جاڭا نىساندار ەل يگىلىگىنە قىزمەت ەتە باستادى.
ەشقاشان ءسوزى مەن ءىسى الشاق بولىپ كورمەگەن نۇرسۇلتان ءابىش ۇلىنىڭ مۇرىندىق بولۋىمەن ءار جىلدارى تۇركىستان شاھارىنا باۋىرلاس تۇركيا ەلىنىڭ باسشىلارى تۇرعىت ءوزال, سۇلەيمەن دەميرەل, احمەت سەزەر, ابدۋللا گۇل, رەجەپ ەردوعان ارنايى كەلىپ, ياساۋي مازارىنىڭ باسىندا دۇعا وقىدى. بۇل ولاردىڭ تۇركىنىڭ قاراشاڭىراعىن ۇستاپ قالعان قازاق توپىراعىنا دەگەن رياسىز كوڭىلىنىڭ, شەكسىز قۇرمەتتىڭ بەلگىسى بولسا كەرەك. سونداي-اق تۇڭعىش پرەزيدەنتىمىز ق.ا.ياساۋي اتىنداعى حقتۋ-دىڭ اشىلۋىندا وقۋ ورنى «تۇركىستاندى وركەنيەت بيىگىنە كوتەرەدى» دەپ سەنىم بىلدىرگەن-ءدى. بۇگىندە وقۋ ورنى قالاشىعى اۋماعىنىڭ ۇلعايا باستاعانىنىڭ ءوزى بۇل ويىنىڭ اينىماستاي ورىندالىپ كەلە جاتقانىن اڭعارتادى. جالپى, تۇركىستاننىڭ ءوسىپ-وركەندەۋى تەك ەلىمىزدىڭ بەدەلىن بيىكتەتىپ, الەم الدىنداعى ابىرويىن اسقاقتاتىپ قانا قويماي, كۇللى تۇركى دۇنيەسىنىڭ مارتەبەسىن كوتەرە تۇسەرى ءسوزسىز.
جەڭىسبەك ماۋلەنقۇلوۆ,
تۇركىستان وبلىستىق ارداگەرلەر كەڭەسىنىڭ توراعاسى
