17 قازان مەن 1 قاراشا ارالىعىندا پرەزيدەنت جانىنداعى جوعارى اتتەستاتتاۋ كوميسسياسى وتكىزگەن اتتەستاتتاۋعا پرەزيدەنت اكىمشىلىگىنىڭ باسشىسى توراعالىق ەتتى. سونداي-اق كوميسسيا قۇرامىنا قاۋىپسىزدىك كەڭەس حاتشىسى, پرەزيدەنت اكىمشىلىگى باسشىسىنىڭ قۇقىقتىق ماسەلەلەر جونىندەگى ورىنباسارى جانە قۇقىق قورعاۋ جانە ارنايى ورگاندارىنىڭ باسشىلارى كىردى.
مۇنداعى ماقسات – پوليتسيا قىزمەتكەرلەرىنىڭ سەرۆيستىك مودەلگە كوشۋ جاعدايىندا ورگان باسشىلارىنىڭ كاسىبي دايىندىق دەڭگەيىن, قۇقىقتىق مادەنيەتىن جانە حالىقپەن جۇمىس ىستەۋ قابىلەتىن انىقتاۋ. سونداي-اق باسشىلار قۇرامىن جاڭارتۋ جانە كادر رەزەرۆىن قالىپتاستىرۋ ماسەلەسى دە نازاردان تىس قالمادى.
– كەزەكتەن تىس اتتەستاتتاۋعا كوميتەتتەر (اكىمشىلىك پوليتسيا جانە كوشى-قون قىزمەتى), ورتالىق اپپارات جانە وڭىرلەر دەپارتامەنتتەرىنىڭ, ءىىم جوعارى وقۋ ورىندارىنىڭ باسشىلارى لاۋازىمدارىن اتقاراتىن قىزمەتكەرلەر جانە ولاردىڭ ورىنباسارلارى قاتىستىرىلدى. وزدەرىڭىز بىلەتىندەي, كەزەكتەن تىس اتتەستاتتاۋ مەرزىمى ءساۋىر ايىنان قازان ايىنا اۋىستىرىلعان ەدى. الايدا, جۇرگىزىلىپ جاتقان كادر جانە سىبايلاس جەمقورلىققا قارسى ساياسات شەڭبەرىندە ءبىز باسشىلىق قۇرامدى ايتارلىقتاي جاڭارتتىق, – دەدى ەرلان تۇرعىمباەۆ.
ءمينيستردىڭ ايتۋىنشا, بۇل جۇمىس جۇرتشىلىقتى كادرلىق وزگەرىستەر تۋرالى اقپاراتتاندىرا وتىرىپ, اشىق جۇرگىزىلدى. ناتيجەسىندە, ءبىرىنشى باسشىلاردىڭ 60%-ى (21 ورگان باسشىسى) جاڭارتىلدى. ونىڭ ىشىندە, ءىىم ورتالىق اپپاراتىنىڭ (اكىمشىلىك پوليتسيا, شتاب, كريمينالدىق پوليتسيا, تەرگەۋ, ەكسترەميزمگە, ەسىرتكى قىلمىسىنا قارسى ءىس-قيمىل, وزىندىك قاۋىپسىزدىك, كادر ساياساتى, ىشكى اۋديت, جەدەل-كريميناليستيكالىق جانە 2 جەدەل دەپارتامەنتتەردىڭ) باسشىلارى بار. بۇدان بولەك, اۋماقتىق پوليتسيا دەپارتامەنتتەرىنىڭ 9 باستىعى اۋىستىرىلدى. ولاردىڭ قاتارىندا نۇر-سۇلتان قالاسى, اقمولا, اقتوبە, اتىراۋ, قاراعاندى, قىزىلوردا, پاۆلودار, سولتۇستىك قازاقستان وبلىستارىنىڭ جانە كولىكتەگى پوليتسيا دەپارتامەنتى باسشىلار بار.
سونداي-اق ورتالىق اپپاراتتا 15 باستىقتىڭ ورىنباسارلارى مەن اۋماقتىق پوليتسيا دەپارتامەنتتەرىنىڭ 35 ورىنباسارى جاڭارتىلدى. بۇل رەتتە, جوعارى وقۋ ورىن باسشىلارىنىڭ 40%-ى اۋىسقانىن العا تارتامىز. بارلىعى 4 ءبىرىنشى باسشى مەن 6 ورىنباسار (قاراعاندى اكادەمياسىندا – 3, الماتىدا – 2 جانە قوستانايدا – 1) اۋىستى.
ءوز كەزەگىندە, اڭگىمەلەسۋ قورىتىندىسى بويىنشا 19 باسشى جوعارى لاۋازىمعا ۇسىنىلدى.
راۋان قابيدولدا,
«Egemen Qazaqstan»
