سۇحبات بارىسىندا ەكولوگيا, تسيفرلىق دامۋ, گۋمانيتارلىق الماسۋ جانە تۇراقتى ءوزارا بايلانىس ماسەلەلەرى سەكىلدى پەرسپەكتيۆالى باعىتتار بويىنشا قازاقستان مەن ەۋروپالىق وداق اراسىنداعى ارىپتەستىك قاتىناستاردى نىعايتۋ ماسەلەلەرىن قوسا العاندا, حالىقارالىق جانە ءوڭىردىڭ كۇن تارتىبىندەگى وزەكتى ماسەلەلەر بويىنشا جان-جاقتى پىكىر الماسۋ ءوتتى.
سىرتقى ساياسات ۆەدومستۆوسىنىڭ باسشىسى 2019 جىل ورتالىق ازيا بويىنشا جاڭا ستراتەگيانىڭ قابىلدانۋىنا جانە 2015 جىلعى 21 جەلتوقساندا نۇر-سۇلتاندا قول قويىلعان قر-ەو كەڭەيتىلگەن ارىپتەستىك جانە ىنتىماقتاستىق تۋرالى كەلىسىمدى راتيفيكاتسيالاۋ ءراسىمىنىڭ اياقتالۋى ەكىجاقتى قارىم-قاتىناستار تاريحىندا ماڭىزدى وقيعا بولعانىن اتاپ ءوتتى.
ء«بىز قازاقستان-ەۋروپا قاتىناستارىن ساپالى جاڭا كەزەڭىنىڭ باستالۋىن بىلدىرەتىن وسى ستراتەگيالىق قۇجاتتارعا ۇلكەن ءۇمىت ارتامىز. ولاردىڭ تابىستى جۇزەگە اسىرىلۋى, ءبىرىنشى كەزەكتە, قازاقستان مەن ەۋروپالىق وداق اراسىنداعى ءوزارا ءتيىمدى ساۋدا-ەكونوميكالىق جانە ينۆەستيتسيالىق ىنتىماقتاستىقتى ارتتىرۋعا الىپ كەلەتىنىنە سەنىم بىلدىرەمىن», - دەدى ول.
ەۋروپالىق ديپلومات قازاقستان ورتالىق ازيا بويىنشا جاڭا ستراتەگيانى ىسكە اسىرۋ بويىنشا ەۋروپادا ماڭىزدى سەرىكتەس رەتىندە قابىلداناتىنىن اتاپ ءوتتى. پ.بۋريان ەلىمىزدىڭ ورتالىق ازيا مەن اۋعانستانداعى ساياسي جانە ساۋدا-ەكونوميكالىق ىنتىماقتاستىقتى, سونداي-اق حالىقارالىق قاۋىپسىزدىكتى نىعايتۋداعى رولىنە ەرەكشە توقتالىپ ءوتتى. وسى ورايدا ەۋروپالىق تاراپ ءوڭىر ءۇشىن جالپى بيۋدجەتى 55,6 ملن.ەۋرونى قۇرايتىن ءۇش جاڭا باعدارلامانىڭ ىسكە قوسىلعانى تۋرالى حاباردار ەتتى. بۇل جوبالار ورتالىق ازياداعى ينۆەستيتسيالاردى, باسەكەگە قابىلەتتىلىكتى جانە ساۋدانى قولداۋعا باعىتتالعان.
كەزدەسۋ اياسىندا جوعارى دەڭگەيدەگى كەزدەسۋلەردى, ىنتىماقتاستىق كەڭەسكە, كونفەرەنتسيالار مەن «دوڭگەلەك ۇستەلدەرگە» قاتىسۋدى قامتيتىن قر-ەو جانە
قر-وا ىنتىماقتاستىق فورماتى بويىنشا 2020 جىلعا ارنالعان ءىس-شارالاردىڭ پەرسپەكتيۆتى كۇنتىزبەسىنە ەرەكشە نازار اۋدارىلدى.
كەلىسسوزدەر قورىتىندىسى بويىنشا, تاراپتار ەۋروپالىق وداقتىڭ قازاقستانمەن جانە وڭىرمەن سىندارلى ىنتىماقتاستىق الەۋەتىن ىسكە اسىرۋ ماقساتىندا تۇراقتى جۇمىس بايلانىستارىن قولداۋعا ۋاعدالاستى.
