قازاقستان مەن قىتاي بىرلەسىپ تۇسىرگەن «كومپوزيتور» ءفيلمى لوس-انجەلەستە (اقش) وتكەن 4-ءشى كەزەكتى Golden screen awards ماراپاتتاۋ شاراسىندا 4 نوميناتسيا بويىنشا ۇزدىك دەپ تانىلدى.
سالتاناتتى جيىندا «كومپوزيتور» ءفيلمى جىلدىڭ «ەڭ ۇزدىك كينوسى», «ەڭ ۇزدىك مۋزىكا», «ەڭ ۇزدىك ەر ادام ءرولى» جانە «ەڭ ۇزدىك ايەل ءرولى» نوميناتسيالارى بويىنشا ماراپاتتالدى.
ەسكە سالا كەتەيىك, «كومپوزيتور» ءفيلمىنىڭ تۇساۋكەسەرى بيىلعى جىلدىڭ 17 مامىر كۇنى ەلوردادا وتكەن بولاتىن. فيلم الەمدىك ونەرگە ەلەۋلى ۇلەس قوسقان قىتايدىڭ تانىمال كومپوزيتورى سي سينحايدىڭ ءومىرى مەن ونەر جولىنا ارنالعان. ەكىنشى دۇنيەجۇزىلىك سوعىس جىلدارىندا (1941-1943 جىلدار ارالىعىندا) كومپوزيتور قازاقستاندا تۇرىپ, قازاقتىڭ تالانتتى كومپوزيتورى باقىتجان بايقاداموۆپەن دوس بولعان. كارتينا ەكى ەل اراسىنداعى ىنتىماقتاستىق پەن كومپوزيتورلاردىڭ دوستىعى تۋرالى سىر شەرتەدى. ءفيلمدى ش.ايمانوۆ اتىنداعى «قازاقفيلم» كينوستۋدياسى جانە قىتايلىق «Shineworks Pictures», «China film coproduction corporation» كومپانيالارى بىرگە تۇسىرگەن.
ايتا كەتەيىك, Golden screen awards شاراسى China Film Co Production كورپوراتسياسى, Hollywood Reporter جانە امەريكا كينو قاۋىمداستىعىنىڭ قولداۋىمەن 2016 جىلدان بەرى وتكىزىلىپ كەلەدى.
